Чақилиқ сот мәһкимиси мәхпий һөҗҗәтләр қатарида ашкариланған бир һөкүмнаминиң өзлиригә аит икәнликини дәлиллиди

Мухбиримиз шөһрәт һошур
2019-12-11
Елхәт
Пикир
Share
Принт

26‏-Ноябир күни хәлқаралиқ тәкшүрүш мухбирлар бирләшмиси тәрипидин ашкариланған хитайниң уйғур районидики лагерларни башқуруш һәққидики мәхпий һөҗҗәтлири қатарида чақилиқ наһийәсиниң бир сот һөкүмнамисиму ашкариланған. Бу һөкүмнамидә мәлум бир мәһкумниң башқиларға шәһваний филим көрмәсликни тәвсийә қилғанлиқи үчүн 10 йиллиқ кесилгәнлики қәйт қилинған иди. Әмма хитай даирилири бу материялларни «сахта вә тоқулма» дәп инкар қилған иди. Мухбримизниң чақилиққа қарита елип барған телефон зиярәтлири давамида мәзкур һөкүмнаминиң чақилиқ наһийәлик хәлқ сот мәһкимиси тәрипидин чиқирилғанлиқи дәлилләнди.

Мәхпий һөҗҗәтләр қатарида ашкариланған чақилиқ наһийәсигә аит бир сот һөкүмнамисидә мәлум бир җавапкарниң өзи ишләватқан шеғил завутида (бир қурулуш орнида) башқиларға шәһваний филимләрни көрмәслик вә һарақ ичмәсликини тәвсийә қилғанлиқи, буниңға әмәл қилмиғанларниң хитайдин пәрқи қалмайдиғанлиқи вә дозахқа киридиғанлиқини баян қилғанлиқи үчүн «диний әсәбийлик» вә «миллий кәмситишкә қутратқулуқ қилиш» билән әйиблинип, 10 йиллиқ кесилгәнлики қәйт қилинған.

Уйғур аптоном районлуқ һөкүмәт ашкариланған мәхпий һөҗҗәтләргә қайтурған инкасида бу материялларниң омумйүзлүк һалда «сахта вә тоқулма» икәнликини, буларни «дөләт ичи сиртидики бөлгүнчиләрниң ясап чиққанлиқи» ни илгири сүргән. Әмма «шинҗаң уйғур аптоном райони чақилиқ наһийәлик хәлқ сот мәһкимиси җинайи ишлар һөкүмнамиси» намидики бу һөкүмнамидә сотчиларниң болса патигүл рози вә норузгүл барат икәнлики, баш сотчиниң әркин ғоҗаимир, пүтүкчиниң раһилә қурбан икәнлики қәйт қилинған.

Биз чақилиқ наһийәлик сот мәһкимисигә телефон қилип, алди билән мәзкур исимдики сот хадимлириниң бу мәһкимидә бар-йоқлуқини соридуқ. Нөвәтчи хадим патигүл рози вә норузгүл баратниң нөвәттә иш орнида барлиқини ашкарилиди. У йәнә пүтүкчи раһилә қурбанниңму, баш сотчи әркин ғоҗаимирниңму нөвәттә вәзипидә икәнлики вә ишханилирида икәнликини баян қилди. Биз йәнә бу хадимдин мәзкур һөкүмнамида исми қәйт қилинған хадимларниң вәзиписи һәққидиму изаһат соридуқ. Мәзкур хадим патигүл вә норузгүлләрниң сотчи икәнлики, әркин ғоҗаимирниң баш сотчи икәнлики вә раһилә қурбанниң пүтүкчи икәнликини дәлиллиди.

Бу мәһкимидин телефонимизни қобул қилған бир бөлүм башлиқиму мәзкур һөкүмнамидә тилға елинған сот хадимлириниң нөвәттә вәзипидә икәнликини дәлиллиди. Әмма у бу хадимларниң тәпсилий кимлик учурлири һәққидә мәлумат беришни рәт қилди. Биз униңға қолимиздики һөкүмнаминиң бир қисмини оқуп берип, бу һөкүмниң бу сот мәһкимисигә аит яки әмәсликини соридуқ. Бу хадим буниң 2018‏-йилдики бир дело икәнликини баян қилди. Сот һөкүмидиму һөкүмниң 2018‏-йили 6‏-айда чиқирилғанлиқи қәйт қилинған иди. Биз униңдин мәһкумниң кимлики вә нөвәттә қәйәрдә икәнликини сориғинимизда у өзиниң бу делоға биваситә арилашмиғанлиқини баян қилип, бу һәқтә җаваб беришни рәт қилди.

Пикирләр (0)
Share
Толуқ бәт