Chaqiliq sot mehkimisi mexpiy höjjetler qatarida ashkarilan'ghan bir hökümnamining özlirige a'it ikenlikini delillidi

Muxbirimiz shöhret hoshur
2019-12-11
Élxet
Pikir
Share
Print

26‏-Noyabir küni xelq'araliq tekshürüsh muxbirlar birleshmisi teripidin ashkarilan'ghan xitayning Uyghur rayonidiki lagérlarni bashqurush heqqidiki mexpiy höjjetliri qatarida chaqiliq nahiyesining bir sot hökümnamisimu ashkarilan'ghan. Bu hökümnamide melum bir mehkumning bashqilargha shehwaniy filim körmeslikni tewsiye qilghanliqi üchün 10 yilliq késilgenliki qeyt qilin'ghan idi. Emma xitay da'iriliri bu matériyallarni "Saxta we toqulma" dep inkar qilghan idi. Muxbrimizning chaqiliqqa qarita élip barghan téléfon ziyaretliri dawamida mezkur hökümnamining chaqiliq nahiyelik xelq sot mehkimisi teripidin chiqirilghanliqi delillendi.

Mexpiy höjjetler qatarida ashkarilan'ghan chaqiliq nahiyesige a'it bir sot hökümnamiside melum bir jawapkarning özi ishlewatqan shéghil zawutida (bir qurulush ornida) bashqilargha shehwaniy filimlerni körmeslik we haraq ichmeslikini tewsiye qilghanliqi, buninggha emel qilmighanlarning xitaydin perqi qalmaydighanliqi we dozaxqa kiridighanliqini bayan qilghanliqi üchün "Diniy esebiylik" we "Milliy kemsitishke qutratquluq qilish" bilen eyiblinip, 10 yilliq késilgenliki qeyt qilin'ghan.

Uyghur aptonom rayonluq hökümet ashkarilan'ghan mexpiy höjjetlerge qayturghan inkasida bu matériyallarning omumyüzlük halda "Saxta we toqulma" ikenlikini, bularni "Dölet ichi sirtidiki bölgünchilerning yasap chiqqanliqi" ni ilgiri sürgen. Emma "Shinjang Uyghur aptonom rayoni chaqiliq nahiyelik xelq sot mehkimisi jinayi ishlar hökümnamisi" namidiki bu hökümnamide sotchilarning bolsa patigül rozi we noruzgül barat ikenliki, bash sotchining erkin ghoja'imir, pütükchining rahile qurban ikenliki qeyt qilin'ghan.

Biz chaqiliq nahiyelik sot mehkimisige téléfon qilip, aldi bilen mezkur isimdiki sot xadimlirining bu mehkimide bar-yoqluqini soriduq. Nöwetchi xadim patigül rozi we noruzgül baratning nöwette ish ornida barliqini ashkarilidi. U yene pütükchi rahile qurbanningmu, bash sotchi erkin ghoja'imirningmu nöwette wezipide ikenliki we ishxanilirida ikenlikini bayan qildi. Biz yene bu xadimdin mezkur hökümnamida ismi qeyt qilin'ghan xadimlarning wezipisi heqqidimu izahat soriduq. Mezkur xadim patigül we noruzgüllerning sotchi ikenliki, erkin ghoja'imirning bash sotchi ikenliki we rahile qurbanning pütükchi ikenlikini delillidi.

Bu mehkimidin téléfonimizni qobul qilghan bir bölüm bashliqimu mezkur hökümnamide tilgha élin'ghan sot xadimlirining nöwette wezipide ikenlikini delillidi. Emma u bu xadimlarning tepsiliy kimlik uchurliri heqqide melumat bérishni ret qildi. Biz uninggha qolimizdiki hökümnamining bir qismini oqup bérip, bu hökümning bu sot mehkimisige a'it yaki emeslikini soriduq. Bu xadim buning 2018‏-yildiki bir délo ikenlikini bayan qildi. Sot hökümidimu hökümning 2018‏-yili 6‏-ayda chiqirilghanliqi qeyt qilin'ghan idi. Biz uningdin mehkumning kimliki we nöwette qeyerde ikenlikini sorighinimizda u özining bu délogha biwasite arilashmighanliqini bayan qilip, bu heqte jawab bérishni ret qildi.

Toluq bet