Массимо: ши җинпиңниң «дана түрмиси» гә хуш кәлдиңиз

Ихтиярий мухбиримиз әкрәм
2019-07-19
Елхәт
Пикир
Share
Принт
Уйғур районидики хитайниң 13-девизийәси «тәрбийәләш лагери» ниң алди дәрвазиси. 2017-Йили алдинқи йерим йили, қумул.
Уйғур районидики хитайниң 13-девизийәси «тәрбийәләш лагери» ниң алди дәрвазиси. 2017-Йили алдинқи йерим йили, қумул.
BITTER WINTER

Хитай мәркизи комитетиниң «түрмә хизмәтлирини күчәйтиш вә ислаһ қилиш тоғрисида анализ» намлиқ мәхпий һөҗҗити уйғурларни нишан қилған.

Италийәлик җәмийәтшунас массимо интровигнә 19-июл күни «ши җинпиңниң дәна түрмиси» гә хуш кәлдиңиз-бир мәхпий һөҗҗәттә ашкариланғанлар» намлиқ бир мақалә елан қилди.

Мақалида, бу йил апрелда «зимистан» ториниң хитай мәркизи комитети тәрипидин тарқитилған бир мәхпий һөҗҗәтни қолға чүшүргәнлики, һөҗҗәтниң келиш мәнбәсиниң ашкарилинип қалмаслиқи үчүн уни елан қилмиғанлиқи, әмма бу һөҗҗәттә нуқтилиқ һалда түрмиләрдики уйғурларни характер җәһәттин ши җинпиң үмид қилғандәк өзгәртип чиқиш идийәсиниң оттуриға қоюлғанлиқи баян қилинған.

Аптор мақалида, «ши җинпиң тәшәббус қилған түрмә қандақ болуши керәк?» дегән соалға мәхпий һөҗҗәттин нәқилләр елип җаваб бериду. Униң баян қилишичә, мәхпий һөҗҗәттә шулар тилға елиниду: «хитайдики һазирға қәдәр давам қилип кәлгән түрмә башқуруш усули компартийәниң сияситиниң иҗра қилинишиға зор һәссиләр қатқан болсиму, дәврниң тәрәққиятиға, ши җинпиңниң нөвәттики тәлипигә маслишалмай қалған. Түрмә хизмәтлири чоқум радикаллиққа, терроризмға қарши хизмәт вәзиписини толуқ ада қилиши, түрлүк зораван күчләр вә суйиқәстчи гуруһларни тазилиши, уларниң идийәлирини қисқа муддәт ичидә ислаһ қилип болуши, партийә-һөкүмәткә қарши еқимлар түптин йоқитилиши лазим. Дөләт бихәтәрликигә, җәмийәтниң муқимлиқиға баштин-ахири капаләтлик қилиш, түрмә хизмәтлириниң әң муһимлири ичидики һәммидин муһимидур. Болупму шинҗаңда иҗра қилиниватқан түрмә сияситини йәниму илгириләп пүтүн күч билән қоллаш лазим.»

Мақалида мундақ дейилиду: «түрмә башқурғучи хадимлар ши җинпиңниң тәлипигә лайиқ рәвиштә, каллисини өзгәртишкә тегишлик болған түрмидики уйғур тутқунларни қисқа муддәт ичидә идийә һәм һессият җәһәттин ши җинпиң рәһбәрликидики хитайчә алаһидиликкә игә сотсиялистик йеңи дәврини вә коммунистик партийәни аптоматик һалда қизғин сөйидиған һалға кәлтүрүши лазим».

Мақалида тилға елинишичә, ши җинпиңниң тәлипигә бинаән түрмә хадимлириниң вәзиписи уйғур тутқунларни йәнә «улуғ чоң аилини, хәнзу миллитини, җуңго мәдәнийитини, җуңгочә алаһидиликкә игә сотсиялизм йолини мутләқ етирап қилдуруш». Шуниң билән биргә, түрмиләрдә сиясий идәйивий хизмәтләрни күчәйтип «җинайи унсурларда тоғра дуня қариши, турмушқа болған тоғра позитсийә вә қиммәт қаришини турғузуш, уларда сағлам характер пәйда қилиш» икән.

Апторниң илгири сүрүшичә, «түрмә хизмәтлирини күчәйтиш вә ислаһ қилиш тоғрисида анализ» намлиқ мәхпий һөҗҗәттә хитай һакимийити ши җинпиң тәшәббус қилған «дәна түрмә» қурулушини дәрһал башлашни, буни дөләтниң техника җәһәттин қоллайдиғанлиқини билдүргән. Бу қурулушниң чоң санлиқ амбири болған, торлаштурулған, әқлий күч билән заманиви техника бир гәвдигә айланған тәләпкә лайиқ ‹дәна түрмә' болуши шәрт қилинған».

Д у қ муавин рәиси пәрһат муһәммиди әпәндиниң билдүрүшичә, бу мақалә милйонлиған уйғурни җаза лагерлирида қийнаватқан хитай һакимийитиниң түрмиләрдики уйғурларға техиму қәбиһ роһий бесим сиясити йүргүзүватқанлиқини ашкарилап бәргән.

Норвегийәдики сабиқ адвокат, «норвегийә уйғур җәмийити» ниң рәиси бәхтияр өмәр әпәндиниң билдүрүшичә, хитай һакимийити түрмиләрдики уйғур тутқунларға қарита роһий җәһәттин өзгәртиш елип бериш сияситини 2002-йиллиридин етибарән башлиған икән. У сөзидә, түрмиләрдә мәһбусларниң меңисини ююш үчүн мәхсус тәрбийәләнгән психика мутәхәссислириниң хизмәт қилидиғанлиқини, болупму бу хил психикилиқ өзгәртишниң асаслиқ обйектиниң уйғурлар икәнликини илгири сүрди.

Пикирләр (0)
Share
Толуқ бәт