Massimo: shi jinpingning "Dana türmisi" ge xush keldingiz

Ixtiyariy muxbirimiz ekrem
2019-07-19
Élxet
Pikir
Share
Print
Uyghur rayonidiki xitayning 13-déwiziyesi "Terbiyelesh lagéri" ning aldi derwazisi. 2017-Yili aldinqi yérim yili, qumul.
Uyghur rayonidiki xitayning 13-déwiziyesi "Terbiyelesh lagéri" ning aldi derwazisi. 2017-Yili aldinqi yérim yili, qumul.
BITTER WINTER

Xitay merkizi komitétining "Türme xizmetlirini kücheytish we islah qilish toghrisida analiz" namliq mexpiy höjjiti Uyghurlarni nishan qilghan.

Italiyelik jem'iyetshunas massimo introwigne 19-iyul küni "Shi jinpingning dena türmisi" ge xush keldingiz-bir mexpiy höjjette ashkarilan'ghanlar" namliq bir maqale élan qildi.

Maqalida, bu yil aprélda "Zimistan" torining xitay merkizi komitéti teripidin tarqitilghan bir mexpiy höjjetni qolgha chüshürgenliki, höjjetning kélish menbesining ashkarilinip qalmasliqi üchün uni élan qilmighanliqi, emma bu höjjette nuqtiliq halda türmilerdiki Uyghurlarni xaraktér jehettin shi jinping ümid qilghandek özgertip chiqish idiyesining otturigha qoyulghanliqi bayan qilin'ghan.

Aptor maqalida, "Shi jinping teshebbus qilghan türme qandaq bolushi kérek?" dégen so'algha mexpiy höjjettin neqiller élip jawab béridu. Uning bayan qilishiche, mexpiy höjjette shular tilgha élinidu: "Xitaydiki hazirgha qeder dawam qilip kelgen türme bashqurush usuli kompartiyening siyasitining ijra qilinishigha zor hessiler qatqan bolsimu, dewrning tereqqiyatigha, shi jinpingning nöwettiki telipige maslishalmay qalghan. Türme xizmetliri choqum radikalliqqa, térrorizmgha qarshi xizmet wezipisini toluq ada qilishi, türlük zorawan küchler we suyiqestchi guruhlarni tazilishi, ularning idiyelirini qisqa muddet ichide islah qilip bolushi, partiye-hökümetke qarshi éqimlar tüptin yoqitilishi lazim. Dölet bixeterlikige, jem'iyetning muqimliqigha bashtin-axiri kapaletlik qilish, türme xizmetlirining eng muhimliri ichidiki hemmidin muhimidur. Bolupmu shinjangda ijra qiliniwatqan türme siyasitini yenimu ilgirilep pütün küch bilen qollash lazim."

Maqalida mundaq déyilidu: "Türme bashqurghuchi xadimlar shi jinpingning telipige layiq rewishte, kallisini özgertishke tégishlik bolghan türmidiki Uyghur tutqunlarni qisqa muddet ichide idiye hem héssiyat jehettin shi jinping rehberlikidiki xitayche alahidilikke ige sotsiyalistik yéngi dewrini we kommunistik partiyeni aptomatik halda qizghin söyidighan halgha keltürüshi lazim".

Maqalida tilgha élinishiche, shi jinpingning telipige bina'en türme xadimlirining wezipisi Uyghur tutqunlarni yene "Ulugh chong a'ilini, xenzu millitini, junggo medeniyitini, junggoche alahidilikke ige sotsiyalizm yolini mutleq étirap qildurush". Shuning bilen birge, türmilerde siyasiy ideyiwiy xizmetlerni kücheytip "Jinayi unsurlarda toghra dunya qarishi, turmushqa bolghan toghra pozitsiye we qimmet qarishini turghuzush, ularda saghlam xaraktér peyda qilish" iken.

Aptorning ilgiri sürüshiche, "Türme xizmetlirini kücheytish we islah qilish toghrisida analiz" namliq mexpiy höjjette xitay hakimiyiti shi jinping teshebbus qilghan "Dena türme" qurulushini derhal bashlashni, buni döletning téxnika jehettin qollaydighanliqini bildürgen. Bu qurulushning chong sanliq ambiri bolghan, torlashturulghan, eqliy küch bilen zamaniwi téxnika bir gewdige aylan'ghan telepke layiq 'dena türme' bolushi shert qilin'ghan".

D u q mu'awin re'isi perhat muhemmidi ependining bildürüshiche, bu maqale milyonlighan Uyghurni jaza lagérlirida qiynawatqan xitay hakimiyitining türmilerdiki Uyghurlargha téximu qebih rohiy bésim siyasiti yürgüzüwatqanliqini ashkarilap bergen.

Norwégiyediki sabiq adwokat, "Norwégiye Uyghur jem'iyiti" ning re'isi bextiyar ömer ependining bildürüshiche, xitay hakimiyiti türmilerdiki Uyghur tutqunlargha qarita rohiy jehettin özgertish élip bérish siyasitini 2002-yilliridin étibaren bashlighan iken. U sözide, türmilerde mehbuslarning méngisini yuyush üchün mexsus terbiyelen'gen psixika mutexessislirining xizmet qilidighanliqini, bolupmu bu xil psixikiliq özgertishning asasliq obyéktining Uyghurlar ikenlikini ilgiri sürdi.

Toluq bet