Dörbiljindiki jama'et erbabi dawut abletning lagérdiki mezgilide bir qétim doxturxanigha apirilghanliqi delillendi

Muxbirimiz shöhret hoshur
2019.03.29
Dawut-Ablet.jpg Abdul'ehed dawut ependining dadisi dawut ablet ependi.
RFA/Shöhret Hoshur

Awstraliyediki ABC axbarat agéntliqi ötken yili awstraliyelik Uyghur pa'aliyetchi abdul'ehed dawutning dörbiljindiki bir türküm uruq-tughqanlirining lagérda ikenlikini, bu tutqunlar arisida 69 yashliq dadisi dawut abletningmu barliqini xewer qilghan idi.

Yéqinda pa'aliyetchi abdul'ehed dawutning radiyomizgha bildürüshiche, dadisi ötken yili 4‏-ayda bir qétim lagérdin dörbiljin nahiyilik doxturxanisigha dawalashqa élip chiqilghan iken. U bu uchurni shu künlerde mezkur doxturxanida aghriq yoqlighan bir dosti arqiliq uqqan.

Muxbirimizning bügün dörbiljin'ge qarita élip barghan téléfon ziyaretliri dawamida abdul'ehedning dadisi, yeni dörbiljinde tonulghan jama'et erbabi dawut abletning ötken yili bir qétim lagérdin doxturxanigha apirilghanliqi türme xadimliri teripidin delillendi. 

Melum bolushiche, dörbiljin bazarliq hökümet sheher qurulush ishxanisining sabiq mudiri dawut ablet aldinqi yilning béshida namelum seweb bilen lagérgha ekétilgen. Uning nöwette awstraliyede yashawatqan oghli, pa'aliyetchi abdul'ehed dawutning bayan qilishiche, bu yil 69 yashlargha kirgen dawut ablet dörbiljinde jama'etchilik ishliridiki aktipliqi bilenmu tonulghan. Dawut ablet 2008‏-yili awstraliyediki oghlini bir qétim ziyaret qilip barghan, emma salametliki yar bermigechke awstraliyedin baldur ayrilishqa mejbur bolghan. Dawut abletning jama'etchilik ishliri seweblik we yaki chet'el ziyariti seweblik tutulghanliqi melum emes. 

Téléfonimizni qobul qilghan dörbiljindiki alaqidar xadimlar dawut abletning tutulush sewebi heqqide éniq melumat bérelmigen bolsimu, emma uning jama'et erbabi ikenliki we nöwette tutqunda ikenlikini inkar qilmidi. Yene bir xadim dörbiljinde köp sanda kishining lagérda ikenlikini isharet qilish bilen birlikte dawut abletningmu qolum-qoshniliri bilen birlikte lagérda ikenlikini ashkarilidi. 

Pa'aliyetchi abdul'ehed dawutning bayan qilishiche, u dörbiljindiki melum bir tonushi arqiliq dadisi dawut abletning ötken yili 4‏-ayda lagérdin nahiyilik doxturxanigha dawalashqa ekilin'genliki we shu doxturxanining 13‏-qewitidiki balnést bölümide yatqanliqidin xewer tapqan. Téléfonimizni qobul qilghan dörbiljindiki bir saqchi xadimi dawut abletning ötken yili bir qétim dörbiljin nahiyilik doxturxanigha apirilghanliqini delillidi. Mezkur xadim dawut abletning doxturxanigha türmidin apirilghanliqi we kéyin yene türmige yandurup ekilin'genlikini éytti.

Inkaslardin melum bolushiche, türme bilen lagérlarning arisida asasen dégüdek perq yoqluqi, hetta bezi jaylarda lagér shara'itining türmidinmu éghir ikenliki seweblik kishilerning lagér bilen türmige oxshash közde qaraydighanliqi melum. Shunga dawut abletning nöwette rastinila türmide ikenliki we yaki lagérda ikenliki melum emes. Uning salametlik ehwalining qaysi derijide ikenlikimu éniq emes. 

Dadisining awstraliyeni ziyaret qilishining tutqun'gha bahane qilin'ghanliq éhtimalliqini ilgiri sürgen abdul'ehed dawut bu tutqun'gha dadisining mijezidiki keskinlik, xizmet we jama'et ishliridiki heqqaniyetchilikiningmu seweb bolup qalghanliq éhtimalliqini eskertidu. Abdul'ehed sözining axirida özining awstraliyediki hayati heqqidimu qisqiche toxtaldi. Abdul'ehed 2002 ‏-yili awstraliyege kelgen؛ birqanche yil mélborin shehiride turmush helekchiliki bilen bolghan؛ 2009 ‏-yili adalay shehirige köchüp kélip Uyghur teshkilatlirida wezipe ötigen. Uyghur pa'aliyetlirige arilashmighan chaghliridimu dörbiljindiki a'ilisining xitayning awarichilikidin xaliy bolalmighanliqini eskertken abdul'ehed dawut, buningdin kéyinmu p ‏-yili kelgenliki, bir mehel turmush helekchilikide bolghanliqi, 2009 ‏-yilidin bashlap Uyghur teshkilatlirining pa'aliyetlirige aktip qatnashqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.