Yéngisarliq déhqan abdushükür ömér 7 perzentlik bolghanliqi üchün 7 yil késilgen

Muxbirimiz méhriban
2020-04-23
Élxet
Pikir
Share
Print
7 Perzentlik bolghini üchün 7 yil késilgen yéngisarliq déhqan abdushükür ömerning oghli bilen chüshken süret. (Waqti éniq emes)
7 Perzentlik bolghini üchün 7 yil késilgen yéngisarliq déhqan abdushükür ömerning oghli bilen chüshken süret. (Waqti éniq emes)
Xatip Sultan teminligen

Türkiyede yerliship qalghan xatip sultan ependi 22-aprél radiyomiz ziyaritini qobul qilip, yurtidiki tughqanliridin 14 kishining tutqun qilinip türmige qamalghanliqini bildürgen idi.

Söhbet jeryanida xatip sultan ependi tughqanlirining tutqun qilinish sewebi hemde ulargha artilghan atalmish "Jinayet" ler heqqide özi igiligen bir qisim ehwallarni bayan qildi.

Uning bildürüshiche, xitay da'iriliri teripidin qamaq jazasi höküm qilin'ghan tughqanliridin newre akisi abdushükür ömer 61 yashliq déhqan iken. Da'iriler abdushükür ömer bilen uning ayali buxelchem sawutqa "Pilanliq tughut siyasitige xilapliq qilip köp perzentlik bolghan, hashar emgikidin qachqan, yéziliq hökümetning ruxsitisiz yaqa yurtlarda tijaret qilghan…" dégendek bahane-seweblerni ularning atalmish "Jinayiti" qilip körsetken.

23-Aprél küni bu a'ilining bashqa ezaliridin zöhre xanimmu ziyaritimizni qobul qilip abdushükür ömer we uning ayali buxelchem sawut heqqide özi bilidighan ehwallarni bayan qildi.

Zöhre xanimning bildürüshiche, lagér ichidila 7 yilliq we 5 yilliq qamaq jazasigha höküm qilin'ghan yéngisarliq déhqan abdushükür ömer we uning ayali buxelchem sawut 2016-yili köz peslide aldi bilen ürümchidiki beyge meydani baziridin yurti yéngisargha qoghlan'ghan iken. Birnechche aydin kéyin da'iriler ularni tutqun qilip, yéngisardiki lagérgha qamighan. Ular üstidin lagér ichidila sot hökümi élan qilghan. Yéngisardiki tughqanlirining ündidar arqiliq bildürüshiche, da'iriler bu bir jüp er-ayalgha "2000-Yillarning deslepki mezgilide yéngisardin 3 balisini élip ürümchige ketken. Ürümchide pilanliq tughut siyasitige xilapliq qilip, normidin artuq 4 perzentlik bolghan," dégendek bir qatar seweblerni "Jinayi pakit" qilip eyibligen.

Xatip sultan ependi yene tutqundiki tughqanliri ichide 25 yilliq éghir qamaq jazasi bérilgen newre singlisi, 26 yashliq bumeryem xudaberdi, uning éri 30 yashliq abdukérim mamut we jéjyangning yiwu shehiride tutqun qilin'ghandin buyan héchqandaq xewirini alalmighan inisi memet'éli heqqidimu melumat berdi.

Xatip ependining bildürüshiche, uning jéjyangning yiwu shehiridin tutqun qilin'ghan inisi memet'éli sabirning ayali ayzöhre nöwette türkiyede oqumaqtiken.

Ayzöhre xanimmu 23-aprél radiyomiz ziyaritini qobul qildi.

Uning bildürüshiche, u memet'éli bilen 2014-yili ürümchide toy qilghan iken. Ayzöhre xanim 2016-yili oqush bilen türkiyege kelgendin kéyin deslepki chaghlarda yiwu shehiride tijaret qiliwatqan éri memet'éli bilen normal téléfon alaqisini dawamlashturghan. Emma 2017-yili 10-ayda éri bilen bolghan téléfon alaqisi tuyuqsiz üzülgen. Kéyin sürüshtürüsh arqiliq uning yiwu shehiridin tutqun qilinip, qeshqerge élip kétilgenlikini bilgen.

Éri memet'éli sabirning qanche yilliq késilgenliki we néme sewebtin tutqun qilin'ghanliqi heqqide hökümet da'iriliridin uchur alalmighanliqini bildürgen ayzöhre xanim érining tutqun qilinishigha uning kichikide diniy telim alghanliqi, ürümchidiki "Sada" namliq ereb tili kursida bir yil oqughanliqi we türkiyediki tughqanliri bilen téléfon alaqisida bolghanliqi qatarliqlar seweb bolghan bolushi mumkinlikini bildürdi.

Yuqiriqi awaz ulinishidin söhbetning tepsilatini anglighaysiler.

Toluq bet