Ili pédagogika uniwérsitétining oqutquchisi dilmurat awutning “Dölet tilini közge ilmasliq” bilen eyiblinip késiwétilgenliki ashkarilandi

Muxbirimiz shöhret hoshur
2022-05-12
Share
Ili-Pidagogika-Inistitoti-Mektep-derwazisi.jpg Ili pédagogika instituti mektep derwazisida közetchilik qiliwatqanlar.
Ili pédagogika instituti amanliq bölümining tor bétidin élin’ghan bwc.ylsy.edu.cn

Ili pédagogika uniwérsitétining tutqundiki oqutquchiliri heqqide ötken ayda radiyomizgha kelgen inkasta, mektepning péshqedem oqutquchisi, markisizm inistitotining mu'awin sékritari dilmu'arat awutningmu ismi tilgha élin'ghan. Inkasta déyilishiche, mektepte Uyghur tilida ders ötüsh emeldin qaldurulghandin kéyinmu, u birqanche qétim derslerni Uyghurche sözligenliki üchün, 2017 ‏-yiligha kelgede üstidin tekshürüsh élip bérilghan we arqidin késiwétilgen. Muxbirimizning éniqlashliri dawamida, bu uchurning toghriliqi delillendi.

Ghulja weziyitidin xewerdar kishilerdin birining radiyomizgha yetküzgen mezkur inkasida, ili pédagogika uniwérsitétidin 20 din artuq oqutquchining tutqunda ikenliki melum qilinip, bulardin 8 nepirining isimliri tilgha élin'ghan idi. Inkasta déyilishiche, bulardin biri pishqedem edebiyat oqutquchisi dilmurat awut bolup, u2018 ‏-yili tutqun qilin'ghan'gha qeder, mektepning siyasiy ma'arip we filologiye institotlirida rehberlik wezipisinimu ötigen iken.

Melum bolushiche, bu yil 64‏-65 yashlarda bolghan dilmurat awut özining musteqil ish béjirish iqtidari bilen xizmette közge körünüpla qalmastin, yene mektepning xitay rehberliri bilen talash-tartish we sürkülüshlerdimu bolghan iken. Biz dilmurat awut heqqidiki bu uchurlarning toghra-xataliqini aydinglashturush üchün, ghuljadiki ma'arip tarmaqlirigha téléfon qilduq.

Inkasta yene eskertilishiche, ili pédagogika uniwérsitétide Uyghur tilida ders ötüsh emeldin qaldurulghandin kéyin, dilmurat awut oqughuchlirining ders özleshürüshtürüshte qiyniliwatqini körüp, zörür tépilghanda derslerni Uyghurchimu chüshendürgen. 2017-Yili‏ mektepte “Ikki yüzlimichilikke qarshi herket” qozghalghanda, uning birqanche yil awwalqi ene shu Uyghurche ders sözligenliki mesile qilip tartip chiqirilip, üstidin tekshürüsh élip bérilghan iken. Tekshürüsh netijiside uning bu qilmishi “Dölet tiligha qarshi turush” dep békitilgen.

Biz inkasta qaldurulghan téléfon nomurigha asasen, mezkur mektepning intizam tekshürüsh xadimi bilen alaqilashtuq. Mezkur xadim, özi tekshürigen kishiler qatarida dilmurat awutningmu barliqi we shu tekshürüshtin kéyin tutqun qilin'ghanliqini delillidi. Emma u dilmuratning qachan we qanchi'e yilliq késilgenliki we qeyerde jaza mudditini ötewatqanliqini dep bérelmidi. U özining bu xil uchurlarni bilishke hoquqluq emeslikini ashkarilidi.

Nöwette gollandiyede yashawatqan bextiyar nasir ependi ilgiri ili pédagogika uniwérsitétida oquwatqan mezgilide dilmurat awuttin ders alghan. U dilmurat awutning ochuq-yoruq, xushchaxchaq we pa'aliyetchan bir kishi ikenlikini eslep ötti.

Nöwette türkiyede yashawatqan, ilgiri ghuljada ma'arip saheside xizmet qilghan yasinjan ependimu, dilmurat awut heqqide anglighanlirini eslep ötti. Uning déyishichimu dilmurat awut “‏Dölet tiligha qarshi turush” gumani bilen ilgiri bir qanche qétim soraq qilin'ghan iken.

Dilmurat awutning chet eldiki oqughuchiliridin biri radiyomizgha uchur bérip, dilmuratning ikki perzenti barliqi, dilyar isimlik oghlining nöwette amérikada yashawatqanliq éhtimalliqini otturigha qoydi. Biz amérikadiki Uyghur jama'itidin sürüshte qilghan bolsaqmu, emma amérikida dilyar dilmurat isimlik birining barliqi téxi aydinglashmidi.

Radiyomizgha kelgen inkasta eskertilishiche, Uyghur élida 2017‏-yilidin ilgiriki zerbe bérish herketliride, xitaygha qarshi pozitsiyesi bayqalghan kishiler pütünley dégüdek tutqun qilinip bolghan. 2017 ‏-Yildin kéyinki tutqunda héchqandaq qarshiliq pozitsiyesi bayqalmighan bolsimu, emma mijez-xaraktéri we jem'iyettiki inawiti sewebidin “Qarshilishish éhtimali bar” dep qaralghan kishiler tutqun qilin'ghan. Ili pédagokika uniwérsitétidin tutqun qilin'ghan 20 nechche oqutquchi mana mushu türdiki kishilerdin iken.

Biz ili pédagogika uniwérsitéti oqutush bashqarmisidin dilmurat awut qatarliq oqutquchilarning qandaq jinayet bilen késilgenlikini sorighinimizda, alaqidar xadim buning “Dölet mexpiyetliki” ikenlikini tekitlep, bu heqte sheherlik ma'arip idarisidin melumat sorishimizni tewsiye qildi.

Yoqurida ili pédagogika uniwérsitétining oqutquchisi dilmurat a'u'utning tutqunda ikenlikining delillen'genliki toghriliq melumat berduq.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet