Xotendiki saqchixanilar abdulletip abdurehim damollamning qolgha élin'ghanliq xewirini inkar qilmidi

Muxbirimiz qutlan
2017-05-10
Élxet
Pikir
Share
Print
Xitay memliketlik islam dini jem'iyitining mu'awin re'isi, Uyghur aptonom rayonluq siyasiy kengesh we islam diniy jem'iyitining mu'awin re'isi, xoten nawagh jamesining xatipi abdulétip abdurehim damollining yéqinqi süriti (menbe: shinjang Uyghur aptonom rayonluq siyasiy kéngesh tori)
Xitay memliketlik islam dini jem'iyitining mu'awin re'isi, Uyghur aptonom rayonluq siyasiy kengesh we islam diniy jem'iyitining mu'awin re'isi, xoten nawagh jamesining xatipi abdulétip abdurehim damollining yéqinqi süriti (menbe: shinjang Uyghur aptonom rayonluq siyasiy kéngesh tori)
Shinjang uyghur aptonom rayonluq siyasiy kéngesh toridin élin’ghan

Aldinqi ayda ijtima'iy taratqularda xitay memliketlik islam diniy jem'iyitining mu'awin re'isi, Uyghur aptonom rayonluq siyasiy kéngeshning mu'awin re'isi, xoten wilayetlik islam diniy jem'iyitining re'isi, xoten nawagh jamesining xatipi abdulletip abdurehim damollamning qolgha élinip, 3 yil késiwétilgenliki heqqide xewer tarqalghan idi.

Radi'omizning bu heqtiki éniqlashliri dawamida xotendiki saqchixanilar bilen qanun organliri abdulletip abdurehim damollamning qolgha élin'ghanliqini inkar qilmidi.

Abdulletip abdurehim damollamning qolgha élinip 3 yil késiwétilgenliki heqqidiki xewer eng destlep "Hoylam" tori bilen "Uyghur nidasi" tor radiyosi arqiliq aldinqi ayda melum bolghan idi.

Emma, xitay hökümet taratquliri bu heqte hazirgha qeder héchqandaq xewer bermidi.

Biz bu xewerni delillesh üchün xotendiki herqaysiy saqchixanilar, islam diniy jem'iyetliri we teptish mehkimiliri bilen alaqilashtuq.

Xoten shehirige qarashliq shorbagh yéziliq saqchixanining bir neper resmiy saqchisi bu heqtiki so'allirimizgha mundaq jawab berdi: "Shundaq, u nawagh meschitining xatipi idi, biraq bu so'alingizgha téléfonda jawab bérelmeymen. Bu saqchixanining ichkiy mexpiyetliki hésablinidighan ish. Buni kim sorisa shuninggha dégili bolmaydu. Xapa bolmang!"

Xoten shehirige qarashliq gujanbagh yéziliq saqchixanining bashliqi téléfon ziyaritimiz jeryanida abdulletip abdurehim damollamning qolgha élin'ghanliq xewirini inkar qilmidi. U "Bu so'alingizgha jawab bérelmeymen. Buni xoten sheherlik j x idarisining bashliqidin sorang!" dep téléfonni qoyiwetti.

Biz arqidin xoten wilayetlik islam dini jem'iyiti bilen alaqilashtuq. Téléfonimizni qobul qilghan nöwetchi xadim bu heqte héchnéme déyelmeydighanliqini, téléfonda bu toghriliq gepleshse bolmaydighanliqini éytip téléfonni qoyiwetti.

Melum bolushiche, abdulletip abdurehim damolla ilgiri gujanbagh jamesiningmu xatipi bolghan iken. Shunga biz xoten shehirige qarashliq gujenbagh saqchixanisigha qayta téléfon qilduq. Téléfonimizni qobul qilghan bir neper xitay nöwetchi saqchi  so'allirimizgha jawab bérishni intayin qopalliq bilen ret qildi.

Biz arqidin xoten wilayetlik teptish idarisige téléfon qilduq. Téléfonimizni qobul qilghan bir neper xitay teptish xadimi téléfonning muxbirdin kelgenlikini uqqandin kéyin qéshidiki bashliqigha "Muxbir iken, héliqi abdulletip damollamning délosini sürüshtüriwatidu, buninggha özingiz birnerse deng" dep téléfonni xitay bashliqigha berdi. Xitay teptish emeldari: "Buni bizdin sorima, bu sot mehkimisining ishi, biz bilmeymiz!" dep téléfonni qoyiwetti.

Biz axirida xotenning nawagh saqchixanisigha téléfon qilduq. Nöwetchi saqchi bu heqtiki so'allirimizgha: " Buni sizge dep bergili bolmaydu. Eger bu heqtiki ehwallarni bek bilmekchi bolsingiz, saqchixanimizgha kéling. Téléfonda bu toghriliq gep qilsaq bolmaydu. Biz adette bir déloni ishlisek, uni béjirip teptish mehkimisige ötküzimiz. Déloni ötküzüp bolghandin kéyin, bu délo bilen saqchixanining héchqandaq munasiwiti qalmaydu.  Biz bu ishni tügitip, teptish mehkimisige ötküzüp bolduq, shunga bu toghriliq bizdin sorimang"dep jawab berdi.

Biz uningdin bu heqte yenimu tepsiliy uchur bérishini, abdulletip abdurehim damollamning zadi néme sewebtin qolgha élin'ghanliqini ichkirilep sorighinimizda, u jawab bérishni ret qildi.

Igilishimizche, abdulletip abdurehim damolla 1946-yili 11-ayda xotende tughulghan. Eyni yilliri qeshqerdiki dangliq ölimalardin ders élip, diniy bilimini chongqurlashturghan.

1987-Yilidin bashlap hökümetning körsitishi bilen gujanbagh jameside xatip bolghan. 1991-Yilidin kéyin xoten wilayetlik islam dini jem'iyitige mu'awin re'is, re'is we xotendiki birqanche dangliq jamelerge xatip bolghan.

2000-Yilidin taki 2017-yilighiche ilgiri-kéyin bolup, xoten wilayetlik islam diniy jem'iyitining re'isi, Uyghur aptonom rayonluq islam diniy jem'iyitining mu'awin re'isi, Uyghur aptonom rayonluq siyasiy kéngeshning mu'awin re'isi, xitay memliketlik islam diniy jem'iyitining mu'awin re'isi qatarliq wezipilerde bolghan iken.

Uning "5-Iyul weqesi", yeken qirghinchiliqi we "Diniy esebiylik" ke qarshi dolqunda xitay hökümitining teripini élip, téléwiziye, radiyo we bashqa hökümet taratqulirida sözligen sözliri hélihem torda tarqilip yürmekte.

Toluq bet