Roza éyida qeyseridiki hajetmen Uyghurlargha maddiy yardem tarqitip bérildi

Ixtiyariy muxbirimiz erkin tarim
2016-06-28
Élxet
Pikir
Share
Print

Ramizan éyi musulmanlarning eng chong ibadet éyi hésablinidu. Bu ay ichide musulmanlar rozi tutidu, qur'an oquydu. Zakat we fitre qatarliq diniy ibadetlirini ada qilidu. Ramizan éyi munasiwiti bilen 6-ayning 25-küni qeyseridiki musapir Uyghurlar olturaqlashqan qoru jayning ichide hajetmen yétim balilargha, tul xotun, késel we namrat Uyghurlargha neq pul, talla bazarlardin yémek-ichmek alidighan karta tarqitip bérildi. Chüshtin kéyin sa'et birdin aqsham iptar waqtighiche dawamlashqan bu pa'aliyette qeyseri wilayetlik diniy ishlar idarisi mu'awin mes'uli salih sezin ependi, merkizi istanbulda turushluq heqyol wexpining mes'ulliridin ismet jontar ependi we sherqiy türkistan medeniyet we hemkarliq teshkilati re'isi séyit tümtürk ependilerdin terkib tapqan bir komitét hajetmen Uyghurlargha qol qoydurup yardem puli we kartilarni tarqitip berdi.

Séyit tümtürk ependi qeyseride 1600 etrapida Uyghur barliqini, bularning ichide hajetmen kishilerning sanining köp ikenlikini, 6-ayning 25-küni bir kün yardem puli tarqitilghanliqini tekitlidi.

Qeyseri wilayetlik diniy ishlar idarisi mu'awin mes'uli salih sezin ependi 6-ayning 25-küni 55 karta tarqitip bergenlikini bayan qilip mundaq dédi: "Biz wilayetlik diniy ishler idarisi bolush süpitimiz bilen her biri 100 türk liraliq 55 karta tarqitip berduq. Bu soda qilish kartisi. Ötkende 200 xaltida yardem buyumliri apirip bergen iduq. Yene ötkende her xalta ichide 10-15 kilodin shéker bar xaltidin yüz ellikni apirip tarqitip berduq. Héyttin burun xuda buyrusa her a'ilige bir xaltidin un apirip tarqitip bérimiz. Ulargha yardem qilishni dawamlashturimiz."

Salih sézin ependi ramizan éyining qérindashliq éyi ikenlikini bu ayda yétimlerge, kembeghellerge yardem qilishning sawabining zor bolidighanliqini bayan qilip mundaq dédi: "Ramizan éyi rehmet we beriket éyidur. Kishiler bu ayda rozi tutush arqiliq, ach qalghan kishilerni téximu yaxshi hés qilalaydu. Shunga sediqilirini, fitrelirini we zakatlirini hajetmen kishiler bilen ortaqlishidu. Uning üstige ramizan éyi qérindashliq tuyghuliri kücheygen bir ay. Musulmanlar otturisidiki öz ‏- ara hemkarliqni kücheytidighan bir aydur. Shunga dölitimizge kelgen bu musapir qérindashlirimizgha her jehettin yardem qilishimiz kérek."

Uyghur mehellisining imami emin qarim 6-ayning 25-küni qeyseri diniy ishlar idarisidin kelgen kishiler bilen istanbuldin kelgen kishilerning hajetmen Uyghurlarning hemmisige yardem tarqitip bergenlikini bayan qildi.

Emin qarim chet'eldiki Uyghurlarni yéngi kelgen hajetmen Uyghurlargha yardem qilsa köp sawap alidighanliqini tekitlidi.

Qimmetlik radiyo anglighuchilar, biz igiligen melumatlargha asaslan'ghanda, 2014-2015-yillirida sherqiy jenubi asiya arqiliq türkiyege kelgen Uyghurlarning sani 7 ming etrapida bolup, bu Uyghurlarning ichide köpligen tul ayal we balilar bar. Bular türk ammiwi teshkilatliri we bezi Uyghurlarning yardimi bilen turmush köchürmekte.

Toluq bet