Лоп наһийисидики “мәсчиткә кириш кинишкиси” ниң баш ахири

Мухбиримиз әзиз
2015.10.20
Share on WhatsApp
Share on WhatsApp
meschitke-kirish-kenishkisi-1.jpg Лоп наһийисиниң һаңгия йезисиниң аяғ ханиқа ериқ кәнти тарқатқан мәсчиткә кириш кинишкиси.
Social Media

2014-Йилиниң ахирида хотән вилайитигә қарашлиқ лоп наһийисиниң һаңгия йезисиниң аяғ ханиқа ериқ кәнти пүткүл уйғур аптоном райони бойичә тунҗи болуп йәрлик уйғур мусулман аммиға қарита “мәсчиткә кириш кинишкиси” тарқитишни башлиған иди. Алақидар мәнбәләрдин хәвәр тепишимизчә, бу кинишка йәрлик уйғур аммидин мәсчитләргә вә башқа алақидар диний паалийәт сорунлириға кирмәкчи болғанлар үчүн тарқитилған болуп, бүгүнки телефон зияритимиз арқилиқ бу кинишкиниң һазир һаңгия йезисидин кеңийип, лоп наһийисигә қарашлиқ бирнәччә чоң йезида омумлашқанлиқи мәлум болди. Лекин, лоп наһийилик хәлқ һөкүмити ишханисида нөвәтчиликтә туруватқан хитай хадим мәзкур кинишкиниң тарқитилиши һәққидә сориған соалимизға җаваб берип, “лоп наһийисидики мусулман аммиға ‛мәсчиткә кириш кинишкиси‚ тарқатқан бундақ әһвал мәвҗут әмәс” деди. Лекин, телефон зиярити арқилиқ йәрлик уйғурлардин игилигән әһваллар кинишка тарқитишниң растлиқини, шундақла бу хилдики “мәсчиткә кириш кинишкиси” ниң нөвәттә һаңгия йезисидин һалқип униңға қошна башқа йезиларға кеңәйгәнликини дәлиллиди. Бө һәқтә соралған соалға җаваб бәргән шу йәрлик бирәйлән бу әһвалниң растлиқини тилға алди.

Лоп наһийисигә қилған телефон зиярити арқилиқ шу нәрсә мәлум болдики, бу кинишка пәқәт ашу тәвәликтики диний паалийәт билән шуғуллинишқа иҗазәт берилгән кишиләрниң өз тәвәликидики мәсчиткә кириши үчүнла ишләнгән икән. Әмма, һөкүмәт хизмәтчилири, оқуғучилар вә намаз оқуши мәни қилинған башқа кишиләргә бу кинишка берилмәйдикән. Мәзкур кинишкиси бар киши өзи тәвә болған йеза яки кәнттин һалқип башқа мәһәллидики мәсчитләргә кирмәкчи болса ашу мәсчит алдидики тәкшүргүчиләр өз тәвәсидә болмиған бу хилдики кишиләрниң мәсчиткә киришини тосидикән. Хилаплиқ қилғучилар көрүлсә қанун бойичә җазаға тартилидикән. Һаңгия йезилиқ базарда олтурушлуқ бир уйғур ханим телефон арқилиқ соралған соалларға җаваб бәргәндә бу әһвални тилға алди.

Биз бу һәқтә чәтәлләрдики уйғур зиялийлириниң бу мәсилигә қандақ қарайдиғанлиқини билип беқиш үчүн сәуди әрәбистандики уйғур өлима сираҗидин һаҗини зиярәт қилдуқ. Намаз оқушниң ислам динидики бәш пәрһизниң бири икәнликини, намазни җамаәт болуп оқушниң өз алдиға оқуштин әвзәл болидиғанлиқини тәкитлигән сираҗидин һаҗи бу хилдики “мәсчиткә кириш кинишкиси” ниң мәқсити йәрлик уйғурларниң мәсчиткә топлинишниң алдини елиш вә уни чәкләш икәнликини көрсәтти, шундақла буниң әң әқәллий инсан һәқлириниң дәпсәндә болуши һесаблинидиғанлиқини әскәртти. Униң қаришичә, йәрлик даириләрниң бу хилдики йолсиз тәдбирлири әмәлийәттә ислам диниға җәң елан қилғанлиққа баравәр икән.

Тәпсилатини юқиридики аваз улинишидин аңлиғайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.