Ürümchi ghalibiyet yoli saqchixanisi xadimi: "muhemmed salih hajimning ölümidin xewirimiz bar, emma waqtini bilmeymiz"

Muxbirimiz shöhret hoshur
2018-01-29
Élxet
Pikir
Hembehr
Print
  • Print
  • Hembehr
  • Pikir
  • Élxet
Merhum muhemmed salih damolla hajim.
Merhum muhemmed salih damolla hajim.
Social Media

Birqanche kündin béri muhajirettiki uyghur torbetliride ataqliq diniy alim muhemmed salih hajimning wapat bolghanliqi heqqide uchurlar tarqalmaqta. Tarqalghan uchurlar arisida muhemmed salih hajimning chet'eldiki uruq-tughqanliriningmu bu zat heqqide éniq uchur alalmaywatqanliqi tilgha élinmaqta.

Muxbirimiz bügün uyghur aptonom rayonluq milletler we din ishliri idarisi, uyghur aptonom rayonluq birliksep bölümi we islam jem'iyitige téléfon qilip bu heqte melumat soridi. Ziyaritimizni qobul qilghan xadimlarning hemmisi ehwaldin xewersizlikini éytti. Saqchi xadimliridin biri muhemmed salih hajimning wapat bolghanliqidin xewer tapqanliqini, emma wapat bolghan waqtini bilmeydighanliqini éytti. U yene bu uchurning menbesi heqqidimu melumat bermidi. 

Uyghur aptonom rayonluq da'iriler her waqittikige oxshashla uyghur jem'iyiti keng kölemde köngül bölgen bu xewer heqqide melumat bérishtin özlirini qachurdi.

Uyghur aptonom rayonluq milletler we din ishliri kométining bir xadimi bu ehwaldin xewersizlikini éytish bilen birlikte xewerning rastliqinimu késip ret qilalmidi. U, "aptonom rayonluq milletler we din ishliri komitéti muhemmed salih hajimning ölümidin xewersiz dep yazsaq bolamdu?" dégen so'alimizgha, buning özining shexsiy jawabi ikenlikini, milletler we din ishliri komitétigha wekillik qilalmaydighanliqini éytti. U yene bu heqte biwasite alaqidar orunlar bilen alaqilishishimizni tewsiye qildi.

Uyghur aptonom rayonluq islam jem'iyitining bir neper xadimi bu heqtiki so'alimizgha estayidil we tepsiliy jawab bermidi. Bu xadim so'alimiz axirlashmay turupla téléfonini qoyuwetti.

Biz yene milletler ishliri komitéti teminligen alaqe uchurlirigha asasen uyghur aptonom rayonluq partkom teshwiqat bölümi we birliksep bölümi bilenmu alaqileshtuq. Bu yerdiki xadimlardin biri özining kamandiropkidin yéngi kelgenlikini bildürüp, so'alimizdin özini qachursa, yene bir xadim muhemmed salih hajim bilen özining xizmet alaqisi yoqluqini ilgiri sürüp, ehwaldin xewersizlikini éytti. U yene bezi ehwallarni téléfonda déyishke bolmaydighanliqini eskertti.

Biz yene muhemmed salih damollamning burunqi ish orni bolghan ürümchidiki uyghur aptonom rayonluq islam institutigha téléfon qilduq. Institutning mudiri abdureqipke téléfonimiz baghlan'ghan bolsimu, emma u téléfonni qobul qilmidi.
Biz arqidin ürümchidiki ghalibiyet yoli, baxulyang, beyge meydani qatarliq rayonlardiki birqanche saqchixanigha téléfon qilduq. Bu saqchixanilardiki xadimlar xizmet tewelikidiki perqini otturigha qoyup, ehwaldin xewersizlikini éytti. Ürümchidiki qarlighach saqchixanisining bir xadimi muhemmed salih hajimning wapatidin xewiri barliqini, emma wapat bolghan waqtini bilmeydighanliqini éytti. 

Biz yene ishenchlik menbelerdin alghan téléfon uchurlirigha asasen, memet salih hajimning küy'oghli bilen birlikte achqan "nur kitabxanisi" bilen "qelem kitabxanisi" gha téléfon qilduq. Emma her ikki kitabxanidin téléfonni alidighan adem chiqmidi.
Muhajirettiki uyghur teshkilatliridin dunya uyghur qurultiyi bilen amérikidiki uyghur kishilik hoquq qurulushi bu heqte arqa-arqidin bayanat élan qilip, muhemmed salih hajimning buningdin texminen bir yérim ay ilgiri qizi nezire we küy'oghli adil tuniyaz bilen birge tutup kétilgenlikini, muhemmed salih hajimning bu yil yigirme tötinchi yanwar küni "terbiyilesh merkizi" de wapat bolghanliqini ilgiri sürdi.
Hörmetlik radi'o anglighuchilar, ijtima'iy taratqularda chiqqan eng yéngi, emma gheyriy-resmiy xewerlerde muhemmed salih damollamning depne murasimi ötküzülüp bolghanliqi, hetta bu murasimda saqchilar bilen ahaliler arisida toqunush chiqqanliqi heqqidimu uchurlar tilgha élinmaqta.

Toluq bet