Сәуди әрәбистанлиқ аяллар өзлирини испатлимақта

Сәуди әрәбистан падишаһи абдулланиң пәрмани билән сәуди әрәбистан парламентиниң әзалириниң бәштин бирини аяллардин тәшкил қилиш һәққидики қарар сәуди әрәбистан тәвәсидә чоң бир хушаллиқ тәнтәниси яратти.
Ихтиярий мухбиримиз өмәрҗан
2013-01-15
Share
Seudi-padishahi-abdulla-305.jpg Сәуди әрәбистан падишаһи абдулла мәсчит нәбәвиниң кеңәйтилиш қурулушиға ул салмақта. 2012-Йили 25-сентәбир.
RFA/Omerjan

Мундин илгириму сәуди әрәбистан аяллири шәһәрлик һөкүмәт мәҗлислиригә әза болуп кириш арқилиқ өзлириниң ролини җари қилдурған иди. Һазир сәуди әрәбистаниниң һәр қайси гезит-журналлири вә радио-телевийилиридә әң көп сөзлиниватқан йеңилиқ сәуди әрәбистан аяллириниң парламентқа әза болуп кириш йеңилиқи болмақта. Бу һәқтә нәччә йүзлигән мақалиләр елан қилинмақта вә нәччә онлиған телевизийә сөһбәтлири давам қилмақта. Демәк, сәуди әрәбистан аяллириниң хәвири сәуди әрәбистан тәшвиқат васитилириниң баш мавзуси болуп қалмақта. Бир тәрәптин, зиялийлар аялларниң парламентқа киришини демократийиниң әвзәлликлиридин дәп тәбирлисә, йәнә бир тәрәптин диний өлималар бу ишниң қуран вә һәдисниң роһиға уйғун икәнликини сөзлимәктә.

Сәуди әрәбистаниниң тәшвиқат васитилириниң һәммиси аялла тоғрилиқ хәвәр тарқатмақта

Сәуди әрәбистанида чиқидиған "әлвәтән" гезиниң 2013-йили 15-январ санида "үмид пайтәхттин кәлмәктә" дегән темида бир мақалә елан қилинған болуп, мақалидә мундақ дәп йезилған:
"2013-йили көплигән әрәб дөләтлириниң пайтәхтлиридин уруш-җедәлләрниң, қан төкүлүшниң, намайишларниң вә инқилабларниң хәвири тарқалған болса, сәуди әрәбистанида бир иҗабий йеңилиқ билән башланди. Чүнки сәуди әрәбистан пайтәхти рияд шәһиридин аялларниң һәқ-һоқуқлирини қоғдаш вә җәмийәттики ролини җари қилдурушиға пурсәт яритип бериш һәққидики қарарлар келип хәлқни хушал қилмақта вә аялларниң өзигә болған ишәнчини ашурмақта. Сәуди әрәбистан аяллири һазирғичә көплигән саһәләрдә өзлирини испатлап кәлмәктә. Мәсилән: сәуди әрәбистанида тарқиливатқан гезитләрниң хәвиригә асасланғанда, мәмликәт ичидики һөкүмәт муәссәсилириниң 45 пирсәнти аял мудир вә иш башқурғучилар билән толған, мәктәпләрдики қиз оқуғучилар сани оғулларниңкидин көп, һәмдә аяллардин тәлим көргәнләр сани 80 пирсәнтни игиләйду, йәнә мәктәпләрдә имтиһандин өтүш вә синип атлаш нисбити оғулларниңкидин қизларниң көп болмақта. Буларниң һәммиси аялларниң әрләрдин кәм әмәс, бәлки бәзи җәһәтләрдә артуқ икәнликини испатлайду."

Һәр бәш парламент әзасиниң бири аял

Мақалидә йәнә мундақ дәп йезилған:
"сәуди әрәбистан парламенттики аяллар нисбити омумий әза саниниң 20 пирсәнтини игилигән болуп, 150 нәпәр парламент әзаси ичидә аяллар сани 30дин ашқан. Буниң билән парламенттики һәр бир бәш әзаниң бири аял болмақта. Бу сан буниң билән тохтап қалмайду, бәлки күнсайин аял әзалар саниниң көпийидиғини ениқ. Өтмүшләрдә сәуди әрәбистан тәвәсидә қизлар мәктипи йоқ иди. Мундин 50-60 йиллар илгири сәуди әрәбистаниниң сабиқ падишаһлиридин падишаһ пәйсәлниң әмри билән сәуди әрәбистанида тунҗи қизлар мәктипи ечилған. Шу заманлардин бири сәуди әрәбистанлиқ аяллар җәмийәтниң тәрәққиятиға әгишип һәр саһәдә өзлириниң қудритини вә иқтидарини көрситип кәлди вә өзлириниң җәмийәтниң асаслиқ тәркиблиридин бири икәнликини бир күнму унтуп қалмиди. Мундин кейинму сәуди әрәбистан аяллири өзлириниң карамитини испатлиғуси."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт