Шиветсийәдики уйғурлар мәсчитигә сутуқ буғрахан мәсчити дәп нам бәрди

Ихтиярий мухбиримиз еһсан
2016-10-11
Share
shiwetsiye-roza-heyit-namaz.jpg Ситокһолм шәһириниң рнкибий районидики мәсчиттә шиветсийәдики уйғурлар роза һейт намизи өтимәктә. 2016-Йили 5-июл, шиветсийә.
RFA/Éhsan

Шиветсийәдә яшаватқан уйғурлар тарихида тунҗи қетим барлиққа кәлгән Уйғур мәсчитиниң Даимий һәйәтлири йеңи ечилған мәсчитидә, мәсчитниң кәлгүси тәрәққияти үчүн һәйәтләр йиғини өткүзди.

Йиғин шиветсийәдики юрт ақсақаллиридин фаруқ садиқ әпәндиниң риясәтчиликидә, 9-өктәбир йәкшәнбә күни чүштин кейин шиветсийә вақти саәт 14:00 дә башланди. Мәзкур мәсчиттә елип берилидиған диний вә иҗтимаий хизмәтләрниң техиму йүксилиши, әл-җамаәтниң мәсчит әтрапиға техиму зич уюшуп техиму кәң даирилик бирлик сәп бәрпа қилиши қатарлиқ мәсилиләр тоғрисида әтраплиқ пикир -тәклипләр сунулди.

Мәзкур йиғинға қатнашқан һәйәтләр, алдимиздики 12-ноябир күни, мәсчитниң ечилиш мурасимини өткүзүш билән биргә, мәзкур мәсчитниң исмини уйғурлар тарихидики мәшһур шәхс сутуқ буғрахан һәзрәтлириниң нами билән " сутуқ буғрахан мәсчити" дәп аташ тоғрисида қарар алди.

Мәсчит һәйәтлири, шиветсийәдики уйғурлар тарихида қурулған бу тунҗи мәсчитниң ечилиш мәрикисини дағдуғилиқ билән өткүзүшни, шундақла мәсчитни иқтисад билән қоллаватқан йирақ йеқиндики барлиқ вәтәндашларни мәсчит мәрикисигә тәклип қилип рәһмитини билдүрүшни қарар қилди.

Биз бу тоғрисида техиму көп мәлумат елиш үчүн, шиветсийәдики җамаәт ақсақаллиридин фаруқ садиқ әпәндини зиярәт қилдуқ.

У зияритимизни қобул қилип, мәсчитниң уйғур җамаитини иттипақлаштуруп, диний вә миллий кимликни сақлашта муһим роли барлиқини, мәсчитиниң исмини елан қилиш күниниң 12-ноябирдәк әһмийәтлик күнгә орунлаштурғанлиқини һәмдә мәсчитниң наминиң бирдәк аваз билән қарар қилғанлиқини һәққидә оттуриға қойди.

Тәклимакан ислам мәдәнийәт мәркизиниң баш катипи абдулла көкяр шиветсийәдики уйғурларниң өзи тәрипидин қурулған мәсчитниң яхши ишларға сәвәбчи болушини үмид қилидиғанлиқини билдүрүп өз тиликини баян қилди.

Йиғин ахирида, уйғур маарип уюшмисиниң мәсули йиғин әһлигә сөз қилип, әл-җамаәтни мәсчит лайиһәсини қоллашқа вә мәсчитниң иқтисади киримини ашуруш үчүн барлиқ уйғур мусулманлириниң мәсчит үчүн аптоматик бәдәл төләш җәдвилини толдурушиниң зөрүрлүкини әскәртти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт