Uyghur ilidiki ramizanliq cheklimilerge qarita inkaslar
2015.06.22
B b s, fransiye awazi, gérmaniye dolqunliri qatarliq bir qisim gherb axbarat wastiliride xitayning bu yil Uyghur ilida yolgha qoyghan ramizanliq cheklimisining yenila qattiq bolghanliqi, kishilerning roza tutmasliq, diniy murasimlargha qatnashmasliq, namaz oqumasliq toghrisidiki ehdinamilerge qol qoyushqa mejbur bolghanliqi ilgiri sürülmekte.
Fransiye awazining 19 - iyundiki “Shinjyangda xizmetchiler, oqutquchi - oqughuchilarning roza tutushi bu yilmu cheklendi” namliq xewiride, gérmaniye dolqunlirining 18 - iyundiki “Xitay shinjyangda ramizanni cheklidi” namliq xewiride hemde b b s ning 16 - iyundiki “Xitay da'iriliri ramizandin ilgiri bashqurushni kücheytti” namliq xewerliride, xitay hökümitining bu yil Uyghur ilida yolgha qoyghan ramizanliq cheklimisining her yilqigha oxshash yenila qattiq bolghanliqi bayan qilindi. Xewerlerde, kishilerning roza tutmasliq, diniy murasimlargha qatnashmasliq, namaz oqumasliq, ashxanilarni taqimasliq qatarliqlar toghrisidiki ehdinamilerge qol qoyushqa mejbur bolghanliqi ilgiri sürülmekte.
Chet'ellerdiki Uyghur siyasiy pa'aliyetchiliri, xelq'ara kishilik hoquq organliri we Uyghur diniy zatliri yillardin béri bu mesilige izchil diqqette bolup kéliwatmaqta. Bu programmimizda Uyghur wetinidiki ramizanliq pa'aliyetlerning cheklinish mesilisige qarita, d u q rehberliridin ijra'iye komitéti mudiri dolqun eysa, neshriyat - teshwiqat komitéti mudiri perhat muhemmidi we diniy ishlar komitéti mudiri turghunjanhajim qatarliqlar bilen élip barghan söhbet xatirisini diqqitinglargha sundüq.