Qaraqashta balisini misirda oqutqanlar bilen qoshnisida oqutqanlar oxshashla 5 yil 6 ayliqtin késilgen

Muxbirimiz shöhret hoshur
2018.05.10
tekshurush-saqchi-herbiy-mashina.jpg Xitay qoralliq eskerlirining bir Uyghur yashning mashinisini aqturuwatqan körünüshi. 2009-Yili 14-iyul, ürümchi.
AP

Qaraqash nahiyesining urchi yézisida balisini öz mehellisidiki atalmish “Yer asti diniy mektep” ke bir kün bergini üchün 5 yil alte ayliq késilgen diniy zat abduxeber exmet heqqide ehwal igilishimiz dawamida, uning qoshnisi abdullétip abduraxmanning bir oghlini misirda oqutqanliqi üchün oxshashla 5 yil 6 ayliq késilgenliki ashkarilandi.

Melum bolushiche, urchidiki mezkur “Yer asti diniy mektep” ni achqan erkin tursunmu 5 yil 6 ayliq késilgen. Bu uchurlar qaraqashtiki bu hökümlerning sot hökümi emes, belki siyasiy höjjetke asasen chiqirilghan zakaz hökümler ikenlikini isharetlimekte.

Uyghur aptonom rayonida dawam qiliwatqan “Yépiq terbiye” dolquni heqqide ehwal éniqlishimiz dawamida, qeshqer, xotenlerde atalmish “Qanun'gha xilap qilmishi barlar” ning derhal késiliwatqanliqi, “Qanun'gha xilapliq qilish éhtimali bolghanlar” ning “Yépiq lagér” largha qamiliwatqanliqi shikayet qilin'ghan idi. Yene kélip, késilgenlerge eng töwen chekning 5 yil 6 ay qilip békitilgenlikimu delillen'gen idi. Bu hepte xoten qaraqashqa qarita élip barghan éniqlashlirimiz dawamida mezkur shikayetlerning toghriliqi yene bir qétim ashkarilandi. Qaraqash döngbagh meschitining imami, “Beshte yaxshi diniy zat” abduxeber exmetning udul qoshnisi abdullétip abduraxman bir oghlini misirgha oqushqa ewetkenliki üchün 5 yil 6 ayliq késilgen.

Abduxeber exmetning balisini oqutqan, mehelliside atalmish “Yer asti diniy mektep” achqan erkin tursunmu oxshashla besh yil 6 ayliq késilgen. Aldinqi künidiki éniqlishimizda “Beshte yaxshi diniy zat” abduxeber exmetning bir balisini ene shu atalmish “Yer asti diniy mektep” ke bir kün bergenliki üchün 5 yil 6 ayliq késilgenliki we nöwette korlada jaza mudditini ötewatqanliqi ashkarilan'ghan idi.
Yene melum bolushiche, abduxeber exmet a'iliside 8 qérindash bolup, uning qalghan 7 qérindishining hemmisining “Terbiyelesh” te ikenliki éniqlandi.

Muhajirettiki bezi Uyghur közetküchiler bu uchurlargha asasen tutqunlarning sot hökümige emes, belki memuriy hökümge, yeni siyasiy bir höjjetke asasen toplan'ghanliqini, toplan'ghanlar sani heddidin ziyade köp bolghanliqi üchün her bir déloni éniqlashqa memuriy xadimlarningmu yétishmeywatqanliqini, netijide tutqunlarni guruppilargha bölüp kolléktip höküm chiqiriwatqanliqini, délolarning tepsilatida xéli chong perqliqler bolsimu, lékin jaza mudditining oxshash boluwatqanliqini perez qilishmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.