Lop charbaghdiki monek meschiti kentning köngül échish pa'aliyet öyige özgertilmekte

Muxbirimiz shöhret hoshur
2017.09.06
partiyeni-soyush-teshwiqati-meschit.jpg Qaghiliq nahiyisidiki ottura mektep oqughuchiliri “Partiyege egishish” heqqidiki qizil teshwiqat pa'aliyitide. 2017-Yili may.
xjyc.gov.cn

Uyghur rayonida ötken yilning ottura -axirliri bashlan'ghan “Meschitlerni elalashturush” nami astidiki meschitlerni qisqartish herikiti bu yilmu dawam qilmaqta.

Melum bolushiche, mezkur heriket dawamida bezi meschitler chéqiwétilgen bolsa, beziliri quluplan'ghan, yene beziliri bolsa, bashqa xil pa'aliyet sorunlirigha özgertilmekte.

Ötken yilqi éniqlashlirimiz dawamida qeshqer toqquzaqta we xoten qaraqashta köp sandiki meschitlerning chéqilghanliqi ashkarilan'ghan idi. Biz bügün lop nahiyesining charbagh yézisidin ehwal éniqlishimiz dawamida, meschitlerni elalashturush nami astidiki mezkur heriketning téxiche dawamlishiwatqanliqi ashkarilandi.

Melum bolushiche, aramehellidiki monek meschit dep atilidighan bir meschit, étiqadchi ammining iradisi we diniy héssiyatigha zit halda, köngül échish sorunigha özgertilmekte. Medeniyet pa'aliyet öyi dep nam bérilgen bu orunda buningdin kéyin, yighin we köngül échish pa'aliyetliri ötküzülidu. Esebiylikke qarshi teshwiqat dolqunida teshkillen'gen 15 kishilik déhqan sen'et ömiki, bu orunda naxsha, usul we tansa ögitidu. Bu meschitning nöwette méhrabliri chéqilip bolghan, peqet bézek ishliri dawamlashmaqta.

Bügün amérikada yashawatqan siyasiy közetküchi, doktor qahar barat ependi, aramehellidiki monek meschitning köngül échish sorunigha aylandurulushi heqqide pikir bayan qildi. Uning bildürüshiche, bu yalghuz diniy étiqadqa hörmetsizlik emes, belki diniy étiqadni depsende qilish.

Qahar barat ependi yene, xitayning medeniyet inqilabiy dewrde memliket miqyasida ijra qilghan diniy étiqadqa qarshi hujumni emdilikte Uyghur rayonida eyni shekil we salmaqta tekrarlawatqanliqini bayan qildi. Xitayning bu qilmishni atalmish diniy esebiylikni tügitish meqsitide ijra qiliwatqanliqini tilgha alghan qahar barat ependi, insanning qelbide yiltiz tartqan étiqadni bu zorawanliq yoli bilen yoqitishning mumkinsizlikini tekitlidi. Uning qarishiche, eslide xitayning basturush siyasiti netijiside Uyghurlarda keng omumlashqan we chongqurlashqan diniy étiqad, bu xil ijra'atlarning türtkiside téximu chongqur yiltizi tartishi we mustehkemlinishi mumkinki, xitay kütkendek ajizlash bolushi mumkin emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.