Dostlirigha ayet ögetken we haraq tashlighan abdulmijit ablet 7 yilliq késilgen

Muxbirimiz shöhret hoshur
2016.12.26
haraq-wiwiska-bay-nahiye.jpg Bay nahiyesining qizil yéza merkizidiki bir Uyghur ashxanisigha ésilghan alahide wiwiska. 2015-Yil awghust.
Social Media

Uyghur rayoni da'iriliri tüzüp chiqqan diniy esebiylikning 75 xil alamiti namliq qollanmida ushtumtut haraq tashlashningmu diniy esebiyliktin bésharet ikenliki bayan qilin'ghan idi. Uyghur rayonida 2014-yili bashlan'ghan “Bir yil qattiq zerbe bérish” we “Esebiylikni tazilash” herikiti dawamida Uyghur rayoni boyiche nechche minglighan kishining késilgenliki ashkarilan'ghan bolsimu, ularning néme üchün késilgenliki, yeni atalmish jinayetliri xitayning dölet mexpiyetlikliri katégoriyeside sir tutup kéliniwatqan idi. Muxbirimizning ehwal éniqlashliri dawamida, ene shu qattiq zerbe bérish herikitide 7 yilliq késilgen mehbus abdulmijit memetning ikki xil gunahi barliqi, biri ushtumtut haraq tashlash, yene biri bolsa besh neper dostigha 10 namaz ayitini ögitish ikenliki ashkarilandi.

Uyghur rayonidiki bir adwokatlar torida élan qilin'ghan diniy esebiylikning 75 xil konkrét alamiti namliq qollanmida, yeni uning 10-maddisida diniy esebiylikning yene bir alamiti körsitilip mundaq déyilgen: “Haraq ichidighan, tamaka chékidighanlar tuyuqsiz haraq-tamakini tashlash, haraq ichidighan, tamaka chékidighan dost-buraderliri hetta ata-anisi bilen bardi-keldi qilmasliq.”

Muhajirettiki Uyghur közetküchiliri teripidin gheyriy, ajayip we külkilik dep qaralghan bu madda élan qilin'ghinigha 2 yilche bolghan bolsimu, uning ijra'atigha da'ir hazirgha qeder uchur bolmighan, hetta bezi közetküchiler, mezkur qollanmidiki bu maddining peqet teshwiqat üchün, kishilerni agahlandurush we qorqutush üchün tüzülgenlikini, bundaq bir maddini ijra qilishning hem mentiqiy, hem exlaqiy jehettin mumkinsizlikini bayan qilishqan. Emma biz ötken hepte yéngisarning lop yézisidin igiligen uchurlirimizdin qarighanda, bultur tutqun qilin'ghan we ikki ayning aldida 7 yilliq késilgen mehbus abdulmijit memetning eng deslepte tutulushigha uning ushtumtut haraq tashliwetkenliki seweb bolghan. Mehbus abdumijitning tutulushida saqchilargha hemkarlashqan we uning sotigha bashtin axir qatnashqan kent amanliq mudirining bayan qilishiche, abdulmijit haraq tashliwetkenliki üchün tutup ekélip soralghandin kéyin, uning yene bir atalmish gunahi- besh neper dostigha namaz ayetlirini ögetkenliki “Pash” bolghan. Yene bu amanliq mudirining bayanliridin, uning bir meschit imamining perzenti bolushi, dadisining diniy ilimlirini ögen'genlikimu, uning esebiylikni tazilashta tekshürüsh obyékti bolup qélishigha seweb bolghan.

Yene radi'omizgha kelgen inkaslardin melum bolushiche, haraq tashlighanliqi, keypi-sapa yolidin qol üzgenliki üchün gumaniy közde qarilish, tutqun qilinish yalghuz yéngisarning lop yézisidila bolghan ish emes. Nöwette türkiyede yashawatqan, Uyghur rayonidin ayrilghinigha bir yilche bolghan arzugül nurmemetning bildürüshiche, oxshash weqe xoten we aqsulardimu yüz bergen.

Yuqirida Uyghur rayonida diniy esebiylik bilen eyiblinip nöwette türmilerde yétiwatqan nechche minglighan mehbustin peqet bir nepiriningla jazalinish sewebi heqqide yeni atalmish jinayitining haraq tashlash ikenliki heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.