48 Neper dölet mejlisi ezasi tramp hökümitini Uyghur rayonidiki "Insanliqqa qarshi jinayetler" ge qarita küchlük inkas qayturushqa chaqirdi

Muxbirimiz erkin
2019-12-13
Élxet
Pikir
Share
Print
48 Neper dölet mejlisi ezasi tramp hökümitige sun'ghan mektupning mawzusi we bashlinishidiki mezmun.
48 Neper dölet mejlisi ezasi tramp hökümitige sun'ghan mektupning mawzusi we bashlinishidiki mezmun.
rubio.senate.gov

Amérika kéngesh palatasi we awam palatasining 48 neper jumhuriyetchi we démokratchilar partiyesidin bolghan ezasi amérika tashqi ishlar ministiri mayk pompéyo, maliye ministiri stéwén minuchin, soda ministiri wilbur ruslargha Mektup Yézip, xitay hökümitining shinjang Uyghur aptonom rayonidiki Uyghur we bashqa türkiy musulmanlirini keng kölemlik tutqun qilishi, mejburiy emgekke sélishigha keskin we küchlük inkas qayturushini telep qilghan.

Mektupta "Amérika qoshma shtatliri shinjang Uyghur aptonom rayonida sadir qiliniwatqan insanliqqa qarshi jinayetlerge taqabil turushta erkin dunyagha yétekchilik qilishi kérek. Eger 'hergiz qayta tekrarlanmisun' dégen sözning 21‏-esirde bir ehmiyiti bolsa, biz dewrimizde yüz bériwatqan eng éghir tragédiyege inkas qayturushimiz kérek. Eger amérika we amérika shirketliri heriketke ötüshni ret qilsa yaki heriketke ötmise, bu tariximizdiki bir dagh bolup qalidu," déyilgen.

Jumhuriyetchi kéngesh palata ezasi marko rubiyo bilen démokratchi awam palata ezasi jéymis mikgowérnning bashchiliqida yézilghan mezkur mektupqa marku rubiyo, jon kornin, richard bluméntal, marsha bilekburn, an'gus king, tam katton, suzan kolinis, mark warnér, tim kéyin qatarliq 28 neper kéngesh palata ezasi, jim mikgowérn, éli'ot en'gél, bred shérman, krést simis, ted yoxu en wagnér qatarliq 20 neper awam palata ezasi imza qoyghan.

Mektupta, hökümetning "Magnétiski'i qanuni" ni derhal ishqa sélishi telep qilinip, "Biz sizlerni shinjang Uyghur aptonom rayonluq partkom sékrétari chén chüen'go shundaqla xitayning milletler we din siyasitini tüzüsh, ijra qilishta rol oynawatqan yuqiri derijilik xitay emeldarlirigha, jümlidin xitay kompartiyesi merkiziy komitéti, shinjang Uyghur aptonom rayonluq birliksep bölümi, siyasiy-qanun komitéti, dölet xewpsizliki komitétlirigha qarita 'magnétiski'i qanuni' ni ishqa sélip émbargo yürgüzüshke chaqirimiz. Zor miqdardiki deliller chén chüen'goning yighiwélish lagérlirining achquchluq pilanlighuchisi ikenlikini ashkarilighan bir peytte 'yer shari magnétiskiy qanuni' ni yene ishqa salmasliqni kechürgili bolmaydu," déyilgen.

Bundaq mektup tramp hökümiti emeldarlirigha burunmu yézilghan bolsimu, lékin bu mektupta tunji qétim xitay birliksep bölümi we siyasiy-qanun komitétining ismi tilgha élin'ghan. 12‏-Dékabir küni yézilghan mezkur mektup "Uyghur kishilik hoquq qanun layihisi" kéngesh palatasida awazgha qoyulushni kütüp turghan mezgilde yézilghan.

Toluq bet