Dolqun eysa: “Xizmet yighinimizni barsélonada ötküzüshimizdiki meqsitimiz ularning musteqilliq kürishini öginish”

Ispaniyening barsélona shehiride ötküzülgen d u q ning xizmet yighinida “Kataloniye milliy qurultiyi” ning sabiq re'isi dolors feli'u (Dolors Feli'u) xanimgha xatire buyum teqdim qildi. 2023-Yili 14-yanwar.

Uyghur mesilisining xelq'aralishishigha egiship, dunya Uyghur qurultiyi dunyaning herqaysi jaylirida ishxanilar échip pa'aliyetlirini téximu kücheytishke tirishmaqta. Bu meqset bilen 2023-yili 1-ayning 14-künidin 16-künigiche ispaniyening barsélona shehiride dunya Uyghur qurultiyining xizmet yighini ötküzülgen. Yighin'gha d u q re'isi dolqun eysa ependi, d u q ning merkiziy ishxanisida ishlewatqan xadimlar we her qaysi döletlerdiki ishxana mes'ulliri, d u q ning axbarat merkizi we fondining mes'ul xadimliri ishtirak qilghan.

RFA/Erkin Tarim

D u q re'isi dolqun eysa ependi biwasite riyasetchilik qilghan xizmet yighinida aldi bilen d u q ning 2022-yilliq xizmetliri toghrisida doklat bérilgendin kéyin 2023-yilida qilishqa tégishlik xizmetler toghrisida muzakire élip bérilghan. Muzakire netijiside, 2023-yilida birleshken döletler teshkilati, yawropa parlaménti, london, bashqa dölet we rayonlarda élip bérilidighan pa'aliyetlerning kaléndari tüzüp chiqilghan. D u q re'isi dolqun eysa ependi bu heqte radiyomizgha melumat berdi.

RFA/Erkin Tarim

D u q re'isi dolqun eysa ependining éytishiche, bu xil yighin her yilining béshida ötküzülüp kéliwatqan bolup, buning bu yil ispaniyening barsélona shehiride ötküzülüshidiki meqset mezkur rayonning uzun yillardin buyan musteqilliq kürishi élip béziwatqan rayon ikenliki iken. Dolqun eysa ependi bu heqte toxtilip mundaq dédi: “Bu yilqi xizmet yighinining barsélonada ötküzülüshidiki seweb 2023-yilliq pa'aliyetlirimizni kaléndar boyiche muzakire qilip tüzüp chiqishtin bashqa, 2023-yili sherqiy türkistanning bésiwélin'ghan zémin ikenlikini ispatlaydighan doklatimizni tamamlighandin kéyin xelq'aradiki lobi pa'aliyetlirimizde hökümetler we döletler bilen élip bérilidighan uchrishishlirimizda sherqiy türkistan xelqining öz teqdirini özi belgilesh nuqti'inezirini chiqish qilip turup, sherqiy türkistanning igilik hoquqini qolgha élish pa'aliyetlirimizni dawamlashturushtin ibaret. Kataloniye 2010-yilidin tartip musteqilliq teleplirini ochuq-ashkara otturigha qoyup, 2017-yili bu telepni awazgha qoyup, xelqning 90 pirsent awaz bilen musteqilliqini jakarlighanidi. Emma buni ispaniye étirap qilmidi, dunya döletliri étirap qilmidi. Bash ministir qatarliq 4 ministir chet'elge qéchishqa mejbur boldi, 8 ministir késiwéitildi. Biz bu yerde bularning musteqilliq kürishini öginish, mezkur küreshte ghelibe qilghan terepliri qaysi? meghlup bolghan terepliri qaysi? bularni öginish arqiliq özimizning musteqilliq kürishimizdiki tejribilirimizini yekünlep, bundin kéyin némilerni qilish mesilisimu muhim küntertiplirimizning biri idi. Shunga biz kataloniyening paytexti barsélonada bu yighinni chaqirduq”.

RFA/Erkin Tarim

D u q re'isi dolqun eysa ependi kataloniyeliklerning musteqilliq kürishini öginish üchün “Kataloniye milliy qurultiyi” ning sabiq re'isi dolors feli'u (Dolors Feli'u) xanim bilenmu mexsus uchrishish élip bérip tejribe almashturghanliqini otturigha qoydi.

D u q ning xizmet yighinigha ishtirak qiliwatqan hey'et barsélonadiki tibet medeniyet merkizinimu ziyaret qilip, tibetlikler bilen hemkarlishish toghrisida pikir almashturghan. Dolqun eysa ependi bu toghriliqmu bizge melumat berdi.

D u q ning xizmet yighinigha türkiyedin bérip ishtirak qilghan istanbuldiki d u q wexpisining re'isi abduréshit abdulxemit ependi yighinda nuqtiliq halda “Qandaq qilip téximu köp kishini dewaning ichige élip kireleymiz” dégen témimu muzakire qilin'ghanliqini ilgiri sürdi.

Dunya Uyghur qurultiyining programma diréktori zumret'ay erkin xanim, d u q ning 2023-yilliq xizmet yighinining burunqi yillardikige oxshimaydighan teripi we ehmiyiti toghrisida toxtaldi.

D u q re'isi dolqun eysa ependi barsélonadiki pa'aliyetlirining kataloniye axbaratidimu orun alghanliqini ilgiri sürdi.

Dunya Uyghur qurultiyining 3 kün dawamlashqan xizmet yighinigha ishtirak qilghan 21 xizmetchi xadim yighin jeryanida öz'ara pikir we tejribe almashturush pursitigimu ige bolghan.