D u q re'isi gérmaniye parlaméntida ziyarette boldi

Ixtiyariy muxbirimiz ekrem
2019-03-19
Élxet
Pikir
Share
Print
D u q re'isi dolqun eysa ependi gérmaniye parlaméntida fédératip jumhuriyetning diniy étiqad erkinliki boyiche alahide komissari markus rübel ependi bilen körüshti. 2019-Yili 19-mart, bérlin.
D u q re'isi dolqun eysa ependi gérmaniye parlaméntida fédératip jumhuriyetning diniy étiqad erkinliki boyiche alahide komissari markus rübel ependi bilen körüshti. 2019-Yili 19-mart, bérlin.
RFA/Ekrem

D u q re'isi dolqun eysa ependi 18-mart küni gérmaniye paytexti bérlin'gha bérip, gérmaniye parlaméntida fédératip jumhuriyetning diniy étiqad erkinliki boyiche alahide komissari markus rübel ependi bilen söhbet élip barghan.

Bérlindin ziyaritimizni qobul qilghan dolqun eysa ependining bildürüshiche, markus grübel ependi bash ministir anjéla mérkil xanim biwasite wezipige teyinligen fédératip jumhuriyetning alahide xadimi bolup hésablinidiken.

Bu qétimqi uchrishishta Uyghur diyaridiki diniy étiqad erkinlikining xitay hakimiyiti teripidin éghir derijide depsende qilinish mesilisi muzakire qilin'ghan. Söhbette yene nuqtiliq halda xitayning islamgha qiliwatqan türlük shekillerdiki düshmenliki asasiy téma süpitide tilgha élin'ghan.

D u q re'isi bu uchrishishta, gérmaniye hökümitining Uyghurlar mesilisige köngül bölüwatqanliqigha minnetdarliqini bildürüsh bilen birge, hökümetning xitaygha tesir körsiteleydighan téximu ünümlük charilerge muraji'et qilishini telep qilghan.

D u q ning bérlindiki wakaletchisi sitéfan ependining bildürüshiche, uzun'gha sozulghan bu söhbette Uyghur diyarining omumiy weziyiti toghrisida öz'ara etrapliq pikir almashturushlar bolghan. U mundaq deydu: "Sherqiy türkistandiki éghir zulumlarning eng béshida Uyghurlarning diniy étiqadigha bolghan qattiq basturush orun tutmaqta. Biz markus grübel ependidin fédératip jumhuriyetning diniy étiqad erkinliki ishlirigha mes'ul alahide xadimi bolush süpiti bilen, Uyghurlarning diniy étiqad mesilisini parlaméntta otturigha qoyushini, gérmaniye hökümitining bu sahede jiddiy qararlar qobul qilip, xitaygha nisbeten tesir körsiteleydighan küchlük bésim shekillendürüshini telep qilduq".

So'al-jawab sheklide dawamlashqan bu qétimqi söhbette köpligen mesililer muzakire témisi bolghan. D u q re'isining eskertishiche, markus grübel ependi Uyghurlarning diniy étiqad erkinliki mesilisi boyiche bir qisim gherb démokratik döletlirining munasiwetlik xadimliri bilen alaqilerde bolmaqta iken.

D u q re'isi bu qétimqi ziyariti esnasida yene parlaméntning bir qisim ezaliri bilen uchrishishlar ötküzgen we telep-isteklirini otturigha qoyup ötken.

Melum bolushiche, gérmaniye hökümiti Uyghur diyaridiki jaza lagérliri mesilisige jiddiy köngül bölüwatqan döletlerning biri bolup, jaza lagérliri mesilisining b d t da küntertipke kélishige töhpe qoshqan hemde 2018-yili 10-ayning 4-küni firansiyening shitrasburg shehiride ötküzülgen yawropa ittipaqining omumiy yighinida jaza lagérlirigha munasiwetlik 15 maddiliq qararning qobul qilinishigha türtke bolghan döletlerning biri hésablinidiken. Gérmaniye parlaménti yéqinqi mezgillerdin buyan d u q rehberliri bilen uchrishishni köpeytip, jaza lagérliri mesilisi toghrisidiki muzakirilirini dawamlashturup kelmekte iken.

Toluq bet