Myunxéndiki amérika bash konsuli d u q re'isi dolqun eysa bilen ochuq tor söhbiti ötküzdi

Ixtiyariy muxbirimiz ekrem
2020-10-26
Élxet
Pikir
Share
Print
Myunxéndiki amérika bash konsuli méghan grégonis xanim bilen d u q re'isi dolqun eysa ochuq tor söhbiti ötküzüwatqan körünüsh. 2020-Yili 26-öktebir.
Myunxéndiki amérika bash konsuli méghan grégonis xanim bilen d u q re'isi dolqun eysa ochuq tor söhbiti ötküzüwatqan körünüsh. 2020-Yili 26-öktebir.
RFA/Ekrem

Bash konsul mégan grégons bilen d u q re'isi dolqun eysa ependining söhbet témisi keng sahelerge chétildi.

22-Öktebir küni amérikaning myunxéndiki konsulxanisi sherqiy türkistanning ay-yultuzluq kök bayqirining kölenggisi astida "1 Milyon Uyghur lagérda" dégen simwolluq belge bilen ijtima'iy taratqularda uchur tarqatti. Mezkur uchurda bash konsul mégan grégons bilen d u q re'isi dolqun eysa ependining 26-öktebir küni Uyghurlar weziyiti toghrisida ochuq tor söhbiti élip baridighanliqini élan qilghan idi. Bu tor söhbiti bügün chüshtin kéyin sa'et 15:30 da bashlandi.

Bügünki bu tor söhbitide bash konsul megan grégons xanimning dolqun eysadin sorighan tunji so'ali "Siz aldi bilen d u q we uning xizmetliri toghrisida chüshenche bersingiz, siz qachandin buyan bu teshkilatta xizmet qiliwatisiz we uninggha rehberlik qilip keldingiz?" dégendin ibaret boldi.

Dolqun eysa ependi bu heqte toxtalghanda d u q ning 2004-yili qurulghanliqini we qurulghandin buyan muhajirettiki Uyghurlarning wekil xaraktérlik aliy orgini süpitide dunya miqyasida Uyghurlar mesilisini tonutush bilen shughullinip kelgenlikini, 2017-yili özining re'is bolup saylan'ghandin buyan élip barghan pa'aliyetlirini qisqiche izahlap ötti.

Söhbette yene "Shinjangning hazirqi weziyiti qandaq? siz özingizning qisqiche kechmishliri toghrisida melumat bérelemsiz hemde Uyghur kishilik hoquq körüshi musapiside qolgha keltürgen netijiler toghrisida toxtilip ötemsiz? biz igiligen melumatlargha qarighanda, xitay xelq jumhuriyiti xitaygha qarita pikir bayan qilghanlarning a'ile-tawabi'atlirigha nispbeten bésim qilidiken. Bundaq ish siz yaki a'ilingizdikilerge qarita yüz bérip baqtimu? silerning yéqinqi yillardin buyan élip bériwatqan pa'aliyetliringlarda mu'eyyen bir özgirishler, ilgirileshler boldimu? siz xitay hökümitining toxtimay qarilashliri we eyibleshlirige qandaq taqabil turup keldingiz? xelq'ara jem'iyet bu zulumlargha xatime bérishi üchün qandaq qilishi lazimliqini teshebbus qilisiz?. . ." dégendek so'allar soraldi.

D u q re'isi dolqun eysa ependi so'allargha Uyghur diyarining nöwettiki ré'al weziyitini, özining, a'ilisining emeliy kechmishlirini chiqish qilip turup etrapliq jawablarni berdi. Jaza lagérlirida yüz bériwatqan paji'eler, Uyghur narisidelirining béshigha kéliwatqan külpetler, mejburiy tughut cheklesh, mejburiy emgek we nesil qurutush xaraktérlik zulumlar, medeniyet qirghinchiliqi, xitaylashturush assimilyatsiye qatarliqlar uning jawabining asasiy mezmunini teshkil qildi.

D u q ning mu'awin re'isi perhat muhemmidi ependi amérika konsulining d u q re'isi bilen ötküzgen bu ochuq tor söhbitige qarita pikir bayan qilghanda, "Bu pa'aliyet amérikaning Uyghur milliy herikitini qollashining bundin kéyin yenimu küchiyidighanliqidin dérek béridu," dédi. D u q ning re'is wekili, "Sherqiy türkistan ölimalar birliki" ning mu'awin re'isi turghunjan alawudun ependi bu heqte toxtalghanda, amérika konsulxanisining d u q bilen ish birliki hem ochuq söhbet élip bérishining d u q ning xelq'aradiki ornini téximu yükseldüridighanliqini ilgiri sürdi.

Myunxéndiki amérika konsulxanisining d u q bilen birliship uyushturghan bu pa'aliyiti "Uyghur heptiliki pa'aliyiti" dep atalghan bolup, bash konsul mégan grégons xanim yene 28-öktebir küni d u q ning yawropagha mes'ul wekili esqerjan bilen, 30-öktebir küni d u q ning programma yétekchisi zumret'ay erkin bilen ochuq tor söhbiti élip baridiken.

Toluq bet