Д у қ җәнвә намайиши вә «5-июл үрүмчи қирғинчилиқи» ниң 10 йиллиқини хатириләш чақириқи елан қилди

Ихтиярий мухбиримиз әкрәм
2019-06-20
Елхәт
Пикир
Share
Принт
Д у қ рәиси долқун әйса әпәнди җәнвә намайиши вә «5-июл үрүмчи қирғинчилиқи» ниң 10 йиллиқини хатириләш чақириқи елан қилди. 2019-Йили 17-июн.
Д у қ рәиси долқун әйса әпәнди җәнвә намайиши вә «5-июл үрүмчи қирғинчилиқи» ниң 10 йиллиқини хатириләш чақириқи елан қилди. 2019-Йили 17-июн.
Social Media

Д у қ рәиси долқун әйса әпәнди 17-июн күни чақириқ елан қилип, явропадики уйғурларни б д т ниң җәнвәдики баш штаби алдида 24-июн күни өткүзүлидиған кәң көләмлик намайишқа иштирак қилишқа дәвәт қилди һәмдә 7-айниң 5-күни пүтүн дунядики уйғурларға «5-июл үрүмчи қирғинчилиқи» ниң 10 йиллиқини хатириләш мунасивити билән зор көләмлик намайиш яки хатириләш паалийәтлири өткүзүшни тәшәббус қилди.

Долқун әйса әпәндиниң билдүрүшичә, хитай һакимийити җаза лагерлири мәсилисидә дуняниң көзини бояш үчүн 24-июн күни җәнвәдики б д т мәркизидә өткүзүлидиған 41-нөвәтлик кишилик һоқуқ кеңишиниң йиғинида аталмиш шинҗаң уйғур аптоном райониниң муавин рәиси әркин туниязни сөзләтмәкчи болған болуп, муһаҗирәттики уйғурларниң хитайниң бу сахтикарлиқиға қарши өз наразилиқлирини ипадә қилиши зөрүр икән.

Долқун әйса әпәнди сөзидә йәнә, әркин туниязниң уйғурларға вакалитән б д т да сөзгә чиқип хитайниң җаза лагерлири сияситини ақлишиниң дуня җамаитини қаймуқтуридиғанлиқини һәмдә хәлқарада яман тәсирләр пәйда қилидиғанлиқини илгири сүргән.

Д у қ рәиси долқун әйса әпәнди бу қетимқи нутқида 2009-йили үрүмчидә йүз бәргән «5-июл үрүмчи қирғинчилиқи» ниң 10 йиллиқини пүтүн дунядики уйғурлардин дағдуғилиқ хатириләшни тәләп қилған. У сөзидә, 16-июн хоңкоңда 2 милйон хәлқниң кочиға чиқип хитай һакимийитигә болған наразилиқ ирадилирини җакарлиғанлиқини, милйонлиған хәлқи хитайниң җаза лагерлирида азаб чекиватқан уйғурларниң хоңкоңлуқларға қариғанда техиму көп җасарәт көрситиши лазимлиқини баян қилған. 

Д у қ муавин рәиси пәрһат муһәммиди әпәнди бу һәқтә тохталғанда, д у қ рәисиниң җиддий чақириқиниң дәврниң тәқәззаси икәнликини, бу чақириққа пүтүн дунядики уйғурларниң аваз қошушини арзу қилидиғанлиқини тилға алди.

Пикирләр (0)
Share
Толуқ бәт