D u q re'isi dolqun eysa gérmaniye we amérikaning dölet rehberliri bilen uchrashti

D u q re'isi dolqun eysa ependi gérmaniye paytexti bérlinda uyushturulghan “Körbér dunya lidérliri di'alogi” namliq yighinda gérmaniyening sabiq prézidénti kiristiyan wolf ependi bilen birge. 2019-Yili 8-noyabir. Bérlin, gérmaniye.

Bügün, yeni 8-noyabir küni d u q re'isi dolqun eysa ependi gérmaniye paytexti bérlinda gérmaniye we amérikaning dölet rehberliri bilen uchrashti.

D u q re'isi dolqun eysa ependining bügün gérmaniye paytexti bérlindin bergen melumatlirigha asaslan'ghanda, “Bérlin témi” yiqilghanliqining 30 yilliqi munasiwéti bilen merkizi bérlindiki “Körbér jem'iyiti” teripidin uyushturulghan “Körbér dunya lidérliri diyalogi” namliq yighinda u amérikaning tashqiy ishlar ministéri pompéyo we gérmaniyening sabiq prézdénti kiristiyan wolf qatarliq dölet erbabliri bilen uchrashqan. 

Melum bolghinidek, 1989-yili 11-ayning 9-küni gherbiy gérmaniye we sherqiy gérmaniyeni ayrip turghan “Bérlin témi” ghulighan kün bolup, bu künni xatirilesh munasiwéti bilen uyushturulghan mezkur yighin'gha köpligen döletlerning muhim erbabliri qatnashqan.

Yighinda amérika tashqiy ishlar ministéri mayk pompéyo ependi kommunizim lagérining ghulishi we démokratiyening ghelibisi toghriliq nutuq sözligen. U sözide yene Uyghurlar mesilisini alahide tilgha élip ötken. Uning nutuqidin kéyin so'al-jawablar bolghan. 

300 Din artuq yuqiri derijilik dölet erbabliri ishtirak qilghan bu yighin'gha d u q re'isi dolqun eysa ependimu teklipke bina'en qatnashqan bolup, u yighinda pompéyo ependidin Uyghurlar we jaza lagérlirigha munasiwetlik 2 so'al sorash pursitigha érishken. 

Bu yighinda yene xongkong mesilisi, süriye mesilisi we nato toghruluqmu so'al-jawaplar, bes-munaziriler bolup ötken. 

Yighindin kéyin dolqun eysa ependi amérika tashqiy ishlar ministéri mayk pompéyo bilen körüshkende uning jaza lagérliridiki Uyghurlarning erkinliki üchün körsitiwatqan tirishchanliqigha rehmetler éytqan. 

Dolqun eysa ependi bu yighin jeryanida yene gérmaniyening sabiq prézdénti kiristiyan wolf we bezi ministérliri bilen uchriship, jaza lagérliri we Uyghurlarning éghir weziyiti toghrisida melumat bergen.