D u q awstraliye parlamént ezasi, Uyghurlarning qollighuchisi kimberli xanimning wapatidin qayghurdi

Ixtiyariy muxbirimiz erkin tarim
2022-03-10
Share
D u q awstraliye parlamént ezasi, Uyghurlarning qollighuchisi kimberli xanimning wapatidin qayghurdi Uyghurlar awstraliye emgekchiler partiyesidin bolghan parlamént ezasi Uyghur dewasining qollighuchisi kimberly kitching xanim bilen. 2022-Yili 10-mart.
RFA/Erkin Tarim

Awstraliye emgekchiler partiyesidin bolghan parlamént ezasi Uyghur dewasining qollighuchisi kimberly kitching xanim 3-ayning 10-künituyuqsiz alemdin ötti.

Bu munasiwet bilen awstraliyediki Uyghur ammiwi teshkilatliri, dunya Uyghur qurultiyi ijtima'iy taratqular arqiliq teziyename élan qildi. Mezkur bayanatlarda: “Hörmetlik kimberly kitching xanim alemdin ötti, emdi 52 yashqa qedem qoyghanidi. Uning wapati sherqiy türkistan dewasi üchün zor bir yoqitish boldi, a'ilisige we uruq-tughqanlirigha sewr tileymiz!” déyilgen.

Awstraliye parlaméntida Uyghurlarning awazi bolghan kimberly kitching xanimning wapati we uning Uyghur dewasigha qoshqan töhpisi toghrisida téximu tepsiliy melumat igilesh üchün d u q re'isi dolqun eysa ependi we awstraliye Uyghur jem'iyitining sabiq bash katipi, dunya Uyghur qurultiyi ichki ishlar komitéti mudiri bextiyar böre ependiler bilen söhbet élip barduq.

Dolqun eysa ependi bu heqte munularni otturigha qoydi: “Awstraliyening parlamént ezasi bolghan kimberly kitching xanimning wapat xewirini anglap bekmu epsuslanduq. Özi 52 yashqa kirgen, qabiliyetlik yash siyasetchi idi. Sherqiy türkistanda xitayning irqiy qirghinchiliq siyasiti bashlan'ghandin kéyin Uyghur mesilisige nahayiti köp köngül bölgen. Uyghur irqiy qirghinchiliq qararini awstraliye parlaméntida maqulluqtin ötküzüshke tirishqan parlamént ezasi idi. Gerche bu qarar téxiche chiqmighan bolsimu buni chiqirish üchün tirishchanliq körsitiwatatti. ‛mejburiy emgek qanuni‚nimu awstraliye parlaméntida otturigha qoyghanidi. Xitayning dunyaning bixeterliki üchün zor tehdit ikenlikini, her yerde, her sorunda jesurluq bilen otturigha qoyup kelgenidi. Téxi yash idi, yürek késili bilen alemdin ötüptu. Bu peqet awstraliye siyasitidiki yoqitishla emes, belki awstraliyediki sherqiy türkistan dewasi üchünmu zor bir yoqitish. Biz dunya Uyghur qurultiyi bolush süpitimiz bilen merhumgha we a'ilisige chongqur teziyemizni bildürimiz”.

Bextiyar böre ependi parlamént ezasi, Uyghurlarning yéqin dosti kimberly kitching xanimning Uyghur dewasining eng aktip qollighuchisi, shundaqla xitayning awstraliyege bolghan tesirini toxtitish üchün izchil halda küch chiqarghanliqini otturigha qoydi.

Igilishimizche kimberly kitching xanim awstraliye parlaméntida Uyghurlarning awazi bolupla qalmastin, awstraliyediki Uyghur teshkilatlirining pa'aliyetlirige dawamliq qatniship Uyghurlarni qollap kelgen we ular bilen hemkarliship nurghun pa'aliyetlerni élip barghan. Bextiyar böre ependi bu heqte melumat berdi.

Kimberli kitching xanim 1970-yili 2-ayning 16-küni dunyagha kelgen. Uning kespi adwokat bolup, 2016-yilidiki saylamda emgekchiler partiyesidin parlamént ezasi bolup saylan'ghan. U, wiktoriye shtatining sénatori, yeni kéngesh palataning ezasi idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet