D u q wekilliri bérlinda gérmaniyening dölet erbablirigha Uyghurlar mesilisini anglatqan

Myunxéndin ixtiyariy muxbirimiz ekrem teyyarlidi
2024.02.21
Annalina-bayerbok-dolqun-eysa Ongdin solgha gérmaniye tashqi ishlar ministiri annalina bayérbok bilen dunya Uyghur qurultiyining re'isi dolqun eysa. 2024-Yili 19-féwral, bérlin
RFA/Ekrem

19-Féwral chüshtin burun bérlinda gérmaniye parlaménti kishilik hoquq komitétining orunlashturushi, parlamént bayanatchisi méxa'él brandining riyasetchiliki astida “Xitayning chégra halqighan basturush siyasiti heqqide guwahliq bérish” dégen témida bir yépiq yighin chaqirilghan. Yighin'gha bir qisim parlamént ezaliri we mutexessisler qatnashqan. Yighinda gérmaniye asasi qanunni qoghdash idarisi jasusluqqa qarshi turush bölümining mes'uli fiyér ependi, tetqiqatchi markos ependi we d u q re'isi dolqun eysa ependiler doklat bergen.

Dolqun eysa ependining tilgha élishiche, ular 19-féwral küni chüshtin kéyin yene bérlinda chaqiriliwatqan “Démokratiye, téxnologiye we insaniyetning kélechiki” namliq dunya munbiri yighinigha qatnashqan. Yighinda mustebit döletlerdiki kishilik hoquq depsendichiliki mesilisi muzakire qilin'ghan. Dolqun eysa we d u q bérlin ishxanisining mudiri gheyur qurban ependiler bu yighinda xitayning diktatorluq réjimining dunyagha kéngiyish weziyiti we Uyghur élidiki jaza lagérliri mesilisi toghrisida pikirler bayan qilishqan.

19-Féwral kechte bérlindiki “Tinchliq kinoxanisi” namliq teshkilatning orunlashturushi bilen kishilik hoquqqa béghishlan'ghan filimlarni mukapatlash murasimi we kechlik ziyapet uyushturulghan. Bu ziyapetke b d t ning sabiq bash katipi bankimun, amérikaning sabiq tashqi ishlar ministiri hilari kélinton, gérmaniyening tashqi ishlar ministiri annalina bayérbok, bir qisim döletlerning rehberliri, gérmaniye parlamént ezaliri we holliwodning dangliq kino artisliri bolup köpligen kishiler qatnashqan. Mezkur ziyapetke daxil bolghan dolqun eysa ependi, bu sorunda gérmaniye tashqi ishlar ministiri annalina bayérbok xanim bilen körüshüp, uning kishilik hoquq yolida körsitiwatqan tirishchanliqlirigha rehmet éytish pursitige érishken.

Gheyur qurban ependining bayan qilishiche, uzun mezgillik tirishchanliqlar netijiside Uyghurlar mesilisi hazir gérmaniyening yuqiri qatlam siyasiy sehniside aktip we janliq rewishte muzakire qilinidighan bir weziyet shekillen'gen. Ularning bu bir qanche künde bérlinda hökümetning yuqiri derijilik rehberliri bilen élip barghan uchrishishliri buning yarqin misalliri hésablinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.