D u q ning bérlindiki ish béjirish ornining échilish murasimi ötküzüldi

Ixtiyariy muxbirimiz ekrem
2019-10-23
Élxet
Pikir
Share
Print
D u q ning bérlindiki ish béjirish ornining échilish murasimidin körünüsh. 2019-Yili 22-öktebir, gérmaniye.
D u q ning bérlindiki ish béjirish ornining échilish murasimidin körünüsh. 2019-Yili 22-öktebir, gérmaniye.
RFA/Ekrem

D u q Uyghur dewasini yenimu küchlendürüsh üchün gherbtiki siyasiy merkezlerde mexsus ishxana tesis qilmaqta.

22-Öktebir küni gérmaniye paytexti bérlinda d u q teripidin tesis qilin'ghan ish béjirish orginining qurulush murasimi ötküzülgen. Murasimgha gérmaniye parlaméntining bezi ezaliri, tibet, teywen wekilliri hemde gérmaniyediki bir qisim kishilik hoquq teshkilatlirining rehberliri, Uyghur teshkilatlirining mes'ulliri we jama'et erbabliri qatnashqan.

D u q re'isi dolqun eysa ependi échilish murasimida qilghan sözide, "Xitay hakimiyitining sherqiy türkistanda élip bériwatqan étnik qirghinchiliqliri toghrisida tepsiliy melumat bérish bilen birge, Uyghurlarning nöwettiki éghir derd-elemlirini yawropa ittipaqining parawozi bolghan gérmaniye we bu arqiliq pütün yawropagha yenimu ilgiriligen halda anglitish yüzisidin d u q ning paytext bérlinda bir ishxana tesis qilish qararigha kelgen" likini ilgiri sürgen.

Bu murasimda gérmaniye parlaméntining ezasi, Uyghurlarning yéqin dosti margaréta bawzé xanimmu nutuq sözligen. U sözide, d u q ning bérlinda mexsus bir ishxana tesis qilghanliqini qizghin tebriklesh bilen birge, Uyghur diyaridiki zulumlar shu qeder ewjige chiqqan turghuluqmu yawropadiki hökümetler we metbu'atlarning yéterlik derijide zuwan sürmeywatqanliqini qattiq tenqidligen.

D u q diniy ishlar komitétining mudiri, sherqiy türkistan ölimalar birlikining re'isi turghunjan alawudén ependi bu heqte toxtilip, margaréta bawzé qatarliq parlamént ezaliri we teywenning yawropadiki elchisi hemde kishilik hoquq organlirining mes'ullirining bu murasimda muhim nutuqlar sözligenlikini tekitlidi.

Bérlindin ziyaritimizni qobul qilghan Uyghur jama'et erbabi ablimit tursun ependi bu murasim heqqide toxtalghanda, "Uyghur milliy dewasining jiddiy éhtiyaji, sherqiy türkistandiki xeterlik weziyetning teqezzasi tüpeyli yawropadiki siyasiy merkezlerde ishxana tesis qilishning muhim ehmiyetke ige" ikenlikini tilgha aldi.

D u q fondining re'isi abdujélil emet ependi bu qétimqi murasimgha gérmaniyediki herqaysi partiyeler we kishilik hoquq organlirining muhim erbabliridin 45 etrapida kishi qatnashqanliqini eskertti.

D u q ning bérlindiki ishxanisigha stéfan isimlik bir yash gérman ziyaliysi xizmetke orunlashturulghan bolup, u d u q bilen gérmaniye parlaménti we hökümiti otturisida köwrüklük rol oynaydiken.

U bérlindin ziyaritimizni qobul qilip, Uyghur dewasini gérmaniye hökümiti we xelqige yenimu ilgirilep anglitishning yalghuz xizmet mejburiyiti bolupla qalmastin, özining bir kishilik insaniy mejburiyiti bolghanliqini bayan qildi.

U sözide yene, 22-öktebir küni ötküzülgen murasimda bezi parlamént ezaliri we kishilik hoquq teshkilatlirining rehberliri bilen tonushush pursitige érishkenlikini, ular bilen bundin kéyin yéqindin hemkarliship xizmet qilidighanliqini tilgha aldi.

D u q bu yil 7-aylarda en'gliye paytexti londondimu ishxana tesis qilghan bolup, aldimizdiki aylarda yene firansiye paytexti parizh we amérikining nyu-york shehiridimu mexsus ishxana tesis qilishni emelge ashurushqa térishidiken.

Toluq bet