D u q 9 neper jaza lagéri shahitigha "Jasaret mukapati" berdi

Ixtiyariy muxbirimiz erkin tarim
2021-02-17
Share
D u q 9 neper jaza lagéri shahitigha 13-Féwral dunya Uyghur qurultiyi tor arqiliq ötküzgen omumiy kéngesh yighinida 9 neper lagér shahitigha "Jasaret mukapati" bérildi. 2021-Yili 13-féwral.
RFA

13-Féwral dunya Uyghur qurultiyi tor arqiliq ötküzgen omumiy kéngesh yighinida 9 neper lagér shahitigha "Jasaret mukapati" bérildi.

D u q 6-féwral küni tor arqiliq omumiy yighini chaqirip, 3 yilliq xizmet doklatini bergendin kéyin, 13-féwral küni dawamlashqan yighinda xitayning tehdit sélishi we qorqutushigha qarimastin jaza lagérlirida béshigha kelgen we körgen külpetlerni dunya jama'etchilikige anglatqan 9 neper lagér shahitigha "Jasaret mukapati" tarqitip bérildi. D u q rehberliri d u q ning her qaysi döletlerdiki wekilliri, qurultaygha eza teshkilatlar bilen qurultayni izchil halda qollap kéliwatqan teshkilatlarning mes'ulliri, lagér shahitliri, d u q ning qollighuchiliridin bolup 20 dölettin 220 etrapida kishi qatnashqan 13-féwral künidiki omumiy kéngesh yighinida shahitlargha üstige sherqiy türkistanning ay yultuzluq kök bayriqi bilen xeritisi chüshürülgen, astigha "Sherqiy türkistanda xitay döliti yürgüzüwatqan irqiy qirghinchiliqni dunyagha ashkarilashta körsetken jasaritingiz üchün rehmet éytimiz" dégen xet yézilghan longqa bilen pul bérildi.

D u q ijra'iye komitétining mu'awin re'isi semet abla ependi riyasetchilik qilghan yighinda aldi bilen dolqun eysa ependi söz qilip, hazirghiche xelq'arada xitayning jaza lagérlirini pash qilghan 9 neper shahitqa, bu heqte qoshqan töhpiliri üchün "Jasaret mukapati" ni bérishni qarar qilghanliqini bayan qildi.

Arqidin semet abla ependi "Jasaret mukapati" gha érishken lagér shahitliridin tursun'ay ziyawuddin, zümret dawut, sayragül sawutbay, qelbinur sidiq, gülbaxar jélilowa, gülbahar mexmutjan (xatiwaji), gülzire awulxan, méhrigül tursun xanimlar we ömerbeg aliy ependining isimlirini jakarlidi.

Tor arqiliq yighin ehlige bérilidighan mukapatlar körsitilgendin kéyin ular arqa-arqidin söz élip, mukapatni alghandin kéyinki tuyghulirini otturigha qoyup ötti.

Hazir firansiyede turuwatqan gülbahar jélilowa xanim, özige bérilgen bu mukapatni alghandin kéyin xushal bolghanliqini, buni wetende lagérlarda yétiwatqan xanim-qizlargha wakaliten alghanliqini bayan qildi.

Hazir amérikada turuwatqan lagér shahitliridin méhrigül tursun xanim "Jasaret mukapati" ni alghandin kéyin öz tuyghulirini bayan qilip, bu mukapatni Uyghur xelqining özige bergenlikini ilgiri sürdi.

Méhrigül tursun xanim xitay hökümitining hayatini ümidlirini berbat qilghanliqini, xitaygha qarshi qet'iy boshashmastin menggü küresh qilidighanliqini bayan qildi.

Hazir amérikada turuwatqan lagér shahiti zümret dawut xanim d u q ning kéngesh yighinida bérilgen mukapatni élip özini bextlik hés qilghanliqini, xushal bolghanliqini bayan qildi.

En'gliyening dunyagha dangliq BBC axbarat qanilining ziyaritini qobul qilip, ayal tutqunlarning lagérda basqunchiliq we jinsiy zorawanliqqa uchraydighanliqini pash qilip, dunyada zor ghulghula qozghighan 2017-we 2018-yilliri ikki qétim jem'iy 9 ay ilining künes nahiyesidiki lagérigha solan'ghan, hazir amérikada dawaliniwatqan lagér shahiti tursun'ay ziyawudun "Jasaret mukapati" ning özige ilham we küch béghishlighanliqini bayan qildi.

Hazirghiche xelq'arada 9 neper lagér shahiti guwahliq bergen bolup, bularning ichide sekkizi ayal, biri er. U, bolsimu chet'elde tunji qétim guwahliq bergen, bir mezgil türkiyede turghandin kéyin gollandiyege chiqip ketken ömer bek'éli ependidur. U, mukapatni alghandin kéyin tuyghulirini bayan qilip, el söygenni elning qoynigha alidighanliqini, xelqning qoynining insanlar üchün jennet ikenlikini yene bir qétim chüshinip yetkenlikini tekitlidi.

D u q re'isi dolqun eysa ependi ziyaritimizni qobul qilip, 6-féwral küni bilen 13-féwral küni tor arqiliq ötküzülgen d u q omumiy kéngesh yighinining muweppeqiyetlik ötkenlikini tekitlidi.

Dolqun eysa ependi 2017-yili noyabirda myunxénda ötküzülgen 6-nöwetlik qurultayda d u q re'isi bolup saylan'ghandin kéyinki d u q élip barghan 3 yilliq pa'aliyetni 15 nuqtigha ixchamlap anglatqan idi. 13-Féwraldiki yighinda 20 dölettin qatnashqan 220 etrapida wekilning so'allirigha jawab bérip ötüldi we teklip-pikirliri élindi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet