Дуня уйғур қурултийиниң қазақистандики вәкиллири йеңи хизмәт пиланлирини түзди

Ихтиярий мухбиримиз ойған
2021-11-24
Share
Дуня уйғур қурултийиниң қазақистандики вәкиллири йеңи хизмәт пиланлирини түзди Д у қ ниң 7-нөвәтлик вәкилләр қурултийиға қазақистанлиқ вәкилләрдин 39 адәм тор арқилиқ иштирак қилған. 2021-Йили 14-ноябир, алмута.
RFA/Oyghan

Мәлумки, бу йил 12-14-ноябир күнлири чехийә пайтәхти пирагада дуня уйғур қурултийиниң 7-нөвәтлик вәкилләр қурултийи болуп өткәниди. Униңға 25 мәмликәттин 200 дин ошуқ вәкил биваситә қатнашқан болуп, қалғанлири, шу җүмлидин қазақистанлиқ вәкилләрдин 39 адәм тор арқилиқ иштирак қилған. 14-Ноябирда демократик усулда сайлам елип берилип, д у қ ниң йеңи нөвәтлик рәһбәрлик гурупписи сайлап чиқилған.

Хәвәрләргә қариғанда, дуня уйғур қурултийиниң рәһбәрлик гурупписи тәркибидә қазақистанлиқларму болған. Җүмлидин әркин әхмәтоф дуня уйғур қурултийи иҗраийә комитети рәисиниң орунбасари, абдурәһим қурбаноф баш тәптиши орунбасари, дилнара қасимова маарип комитетиниң мудири болуп сайланған. Шуниңдәк дуня уйғур қурултийиниң иккинчи мәртәм сайланған рәиси долқун әйса қәһриман ғоҗамбәрдини алий мәслиһәтчи қилип тәйинлигән.

Игилишимизчә, йеқинда дуня уйғур қурултийиниң қазақистандики вәкиллири бир йәргә жәм болуп, йиғин өткүзгән һәм нөвәттә беҗиридиған иш-пиланлирини муһакимә қилип, бәлгилигән.

Д у қ ниң қазақистандики вәкиллири бир йәргә җәм болуп өткүзгән йиғиндин кейин хатирә сүрәт. 2021-Йили ноябир, алмута.
Д у қ ниң қазақистандики вәкиллири бир йәргә җәм болуп өткүзгән йиғиндин кейин хатирә сүрәт. 2021-Йили ноябир, алмута.

Биз дуня уйғур қурултийи маарип комитетиниң мудири, тилшунас доктор дилнара қасимова ханимни зиярәт қилдуқ. У миллий маарипниң уйғурлар үчүн биринчи орунда турған муһим мәсилиләрниң бири икәнликини оттуриға қоюп, мундақ деди: "әлвәттә, вәтәндин сирт маарип қазақистандила сақлинип қалған. 63 Уйғур вә арилаш мәктәпләрдә уйғур синиплири ечилмақта. Шу мәктәпләрни сақлап қелиш керәк. Мумкин қәдәр уларниң саниниму көпәйтиш қолимиздин келиду, дәп ойлаймән. Бу мушу йәрдә яшаватқан хәлқниң биринчи вәзиписи дәп чүшәндүрүватимиз. Униңға җумһурийәтлик уйғур мәдәнийәт мәркизи, маарип фонди вә явроасия уйғур академийәси билән һәмкарлиқта ишларни елип баримиз, дәп ойлаймән. Қурултай алдида болған маарип комитети йиғинида ана тил мәктәплири үчүн оқуш китаблирини ишләп чиқиш тәләплири болған. Шу тәләпләргә бинаән йеқинда пиланларни муһакимә қилмақчимиз".

Дилнара қасимова йәнә башқиму мәмликәтләрдә ечиливатқан уйғур синиплири үчүн оқуш қораллирини, методикилиқ қолланмиларни, луғәтләрни вә башқиларни ишләп чиқишниң муһимлиқини көрсәтти.

У қазақистанға қошна қирғизистан вә өзбекистан уйғурлириниң миллий маарип мәсилисигә тохталди.

Радийомиз зияритини қобул қилған д у қ баш тәптиши орунбасари абдурәһим қурбаноф әпәнди алмутада өткән дуня уйғур қурултийиниң қазақистандики вәкиллири йиғининиң мәзмуни һәққидә мундақ деди: "7-дуня уйғур қурултийиниң пакиз, сүзүк, демократик йолда өткәнликини, сайланған рәислиримизни йәнә бир қетим тәбриклидуқ. 2022-Йили қилинидиған ишларни қәһриман ғоҗамбәрди вә әркин әхмәтоф бизгә бөлүп бәрди. Дилнара қасимова өзиниң тегишлик ишлирини бәлгиләп, ишләйдиғанлиқини билдүрди. Биз болсақ хәлақара ишта бирлишип иш қилиш, өрп-адитимизни, мәдәнийитимизни, маарипимизни, тарихимизни сақлап қелиш, қазақистан асасий қанунидин сиртқа чиқмаслиқ охшаш мәслиһәтләргә кәлдуқ."

Дуня уйғур қурултийиниң 7-нөвәтлик вәкилләр қурултийиға қазақтистандин қатнашқанлар ичидә алмута вилайитиниң талғир, әмгәкчиқазақ, уйғур, панфилоф вә башқиму наһийә вә шәһәрлиридинму вәкилләрниңму болғанлиқи ениқ. Шуларниң бири уйғур наһийәсиниң турғуни сәйдалим амутоф әпәнди чехийәгә бериш үчүн виза һөҗҗәтлириниң тегишлик органлар тәрипидин қобул қилинмай, барлиқ қазақистанлиқларниң биваситә қурултайға қатнишиш имканийитидин мәһрум болғанлиқидин қаттиқ әпсусланди вә шундақла қазақистандики уйғурларниң ғәпләт уйқисидин ойғиниш вақтиниң кәлгәнликини билдүрди.

Мәлуматлардин игилишимизчә, қазақистан оттура асия бойичә уйғурлар әң көп олтурақлашқан җумһурийәт. Рәсмий мәлуматларға қариғанда, 300 миңға йеқин уйғур яшайдиған қазақистанда миллий мәктәпләр, уйғур тилида гезит-журналлар, академийә дәриҗилик уйғур тиятири, көплигән уйғур тәшкилатлири вә башқилар мәвҗут. Һазир қазақистанлиқ уйғурлар өзлириниң миллий қәдрийәтлирини сақлап қелиш үчүн һәр хил иш-паалийәтләрни йүргүзмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт