Дуня уйғур қурултийиниң 7-нөвәтлик сайлимиға қатнишидиған вәкилләр демократик усулда сайлап чиқилған

Ихтиярий мухбиримиз әкрәм
2021.08.23
Share on WhatsApp
Share on WhatsApp
Дуня уйғур қурултийиниң 7-нөвәтлик сайлимиға қатнишидиған вәкилләр демократик усулда сайлап чиқилған Д у қ ниң рәиси долқун әйса әпәнди сайламға назарәтчилик вә риясәтчилик қилиш һәйитиниң назарәтчиликидә биләт ташлимақта. 2021-Йили 22-авғуст, германийә.
RFA/Ekrem

Асия, явропа, америка, авистралийә қитәлиридики уйғурлар тунҗи қетим өзиниң әркин ирадиси билән 7-нөвәтлик д у қ вәкиллирини сайлап чиқти.

Д у қ ниң тәшәббуси билән 22-авғуст күни 4 қитәдики 30 ға йеқин дөләттә охшимиған шәкилләрдә 7-нөвәтлик д у қ ниң вәкиллирини бекитиш сайлими өткүзүлди һәмдә д у қ тәләп қилған 200 нәпәр вәкил хәлқниң әркин ирадиси билән сайлап чиқилди.

Шу күни явропа әллиридин германийә, норвегийә қатарлиқ дөләтләрдиму сайлам елип берилған иди. Биз германийәниң мюнхен шәһридә өткүзүлгән сайлам мәйданиға йетип кәлгән вақтимизда, зал ичидики уйғурлар қандақтур бүйүк бир мурасимға тәйярлиқ қиливатқандәк һаяҗанлиқ кәйпиятқа чөмгән иди. Йиғин риясәтчисиниң “бу қетимқи сайлам истиқлал маршимиз билән башлиниду” дегән изаһати билән кишиләр орунлиридин турушуп, қоллирини көксигә қоюп шәрқий түркистанниң истиқлал маршиға җөр болди.

7-Нөвәтлик д у қ ниң 7-нөвәтлик вәкиллирини бекитиш сайлимидин көрүнүш.  2021-Йили 22-авғуст, норвегийә.
7-Нөвәтлик д у қ ниң 7-нөвәтлик вәкиллирини бекитиш сайлимидин көрүнүш. 2021-Йили 22-авғуст, норвегийә.

Истиқлал маршидин кейин сәһнигә чиқип сөз қилған д у қ ниң рәиси долқун әйса әпәнди, бу қетимқи демократик сайламниң уйғур миллитигә хәйирлик болушини тилиди. Андин сайламға назарәтчилик вә риясәтчилик қилидиған 4 кишилик бир һәйәт қол көтүрүп аваз бериш усули билән сайлап чиқилди. Буларниң арисида д у қ ниң сабиқ рәиси әркин алптекин әпәндиму бар иди. Бу һәйәт сәһнидин орун алғандин кейин, әркин сайлам йепиқ аваз бериш шәклидә рәсмий башланди. Кишиләр өзи халиған адәмни д у қ ға вәкил қилип сайлиди.

7-Нөвәтлик д у қ сайлам комитетиниң рәиси пәрһат муһәммиди әпәнди бу қетимқи сайлам тоғрилиқ зияритимизни қобул қилғанда, бу күни дуняниң һәрқайси әллиридә елип берилған сайлам нәтиҗисидә, 200 нәпәр вәкилниң бу йил 11-айда чехийә пайтәхти парагада чақирилидиған 7-нөвәтлик қурултайға рәсмий вәкил болуп талланғанлиқини билдүрди.

Д у қ сайлам комитети вәкилләр бөлүминиң мәсули турғунҗан алавудун әпәнди бу һәқтә тохталғанда, бу қетимқи сайламниң наһайити әркин, мәдәний бир усулда елип берилғанлиқини тилға алди. Д у қ ниң сабиқ рәиси әркин алптекин әпәнди болса бу тарихий сайламни уюштурған д у қ рәһбәрлирини һәмдә сайламға қатнашқан, сайламда ғәлибигә еришкән барлиқ вәтәндашлирини қизғин тәбрикләйдиғанлиқини ипадә қилди.

22-Авғуст күни норвегийәдики уйғурларму сайлам елип барған. Норвегийәдә яшайдиған д у қ иҗраийә комитетиниң муавин рәиси сәмәт абла әпәнди бу хусуста мәлумат бәргәндә, ослода өткүзүлгән бу сайламниң наһайити тәртиплик, демократик бир рәвиштә давам қилғанлиқини тилға алди. Мәзкур сайламни уюштурған норвегийә уйғур комитетиниң рәиси бәхтияр өмәр әпәндиму норвегийәдики сайламниң нәтиҗилик елип берилғанлиқини әскәртти.

Булардин башқа, германийәниң карлисрухе вә стутгарт шәһәрлиридики уйғурларму илгири-кейин сайлам өткүзгән болуп, уларму әркин сайлам арқилиқ өзлири халиған кишиләрни 7-қурултай үчүн вәкил қилип сайлап чиққан. Германийәниң башқа шәһәрлири вә явропаниң башқа дөләтлиридики уйғурларму охшимиған усулларда өзлириниң вәкиллирини сайлап чиққан. Карлисрухе шәһридики уйғур зиялийси әнвәр әһмәт әпәнди бу һәқтә бизни қисқичә мәлумат билән тәминлиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.