Д у қ германийәниң һакимийәт бешидики партийә әрбаблири билән сөһбәт өткүзди

Ихтиярий мухбиримиз әкрәм
2020-07-03
Елхәт
Пикир
Share
Принт

Д у қ рәһбәрлири германийә парламентида 5 партийәниң мәсуллири вә парламент әзалири билән бир һәптә учришиш елип барди.

Д у қ рәиси долқун әйса, қурултайниң программа йетәкчиси ева стокер вә д у қ берлин ишханисиниң мудири ғәюр қурбан қатарлиқлардин тәркиб тапқан бир гуруппа вәкилләр 6-айниң 29-күнидин башлап германийә пайтәхти берлинда бир һәптигә созулған парламент әзалири билән учришиш паалийәтлирини елип барған.

Д у қ рәиси долқун әйса әпәндиниң бүгүн берлиндин бәргән мәлуматлириға асасланғанда, бу учришишниң даириси һазир германийәдә һакимийәт бешида болған христиан демократлар партийәси, сотсиял демократлар партийәси, йешиллар партийәси, әркин демократлар партийәси вә солчиллар партийәси қатарлиқ 5 партийәниң парламенттики муһим әрбаблириға қәдәр кеңәйгән.

Долқун әйса әпәнди бу қетимқи бир һәптилик сөһбәтниң мәқсити тоғрисида тохталғанда, 7-айниң 1-күнидин башлап явропа иттипақиниң вә б д т хәвпсизлик кеңишиниң рәисликини үстигә алған германийәниң ролидин уйғурлар үчүн үнүмлүк пайдилиниш икәнликини тилға алди.

Д у қ рәһбәрлири германийәдики һәрқайси партийә рәһбәрлири вә парламент әзалири билән болған бу қетимқи учришишта уйғурлар йолуқуватқан нөвәттики қәбиһ вәзийәтни өзгәртиш үчүн германийә һөкүмитидин хитайға бесим ишлитиштә әмәлий үнүм беридиған чарә-тәдбирләрни елишни тәләп қилип, америкиға охшаш мәхсус қанунларни мақуллаш, магнитиский қанунини қобул қилиш, хитай билән алақиси болған ширкәтләрни чәкләш, җазалаш қатарлиқ конкрет мәсилиләрни оттуриға қойған.

Бу қетимқи зиярәткә һәмраһ болған д у қ ниң программа йетәкчиси ева стокер ханимниң билдүрүшичә, парламент әзалири вә партийә рәһбәрлири билән болған бу учришишларда хитайниң җаза лагерлири сиясити, мәҗбурий пиланлиқ туғут сиясити вә уйғур миллитиниң бешиға келиватқан еғир зулумларни тәпсилий аңлитиш пурсити болған. У мундақ дәйду: «германийә парламентида елип берилған бу учришишларниң даириси бәк кәң болди. Партийә рәһбәрлири вә парламент әзалириға уйғурларниң нөвәттики қийин вәзийити, хитайниң җаза лагерлири түзүми вә уйғурлар дуч келиватқан паҗиәләр тәпсилий аңлитилипла қалмай, д у қ ниң вә уйғур хәлқиниң германийә һөкүмитидин күтидиған тәләп-истәклириму җиддий рәвиштә оттуриға қоюлди».

Германийә парламентида елип берилған бу бир һәптилик паалийәткә д у қ ниң берлин ишханисиниң мудири, қурултай яшлар комитетиниң рәиси ғәюр қурбан әпәндиму иштирак қилған болуп, у берлиндин зияритимизни қобул қилғанда бу қетим елип берилған учришишниң д у қ һазирға қәдәр германийә парламентида елип барған көлими әң зор бир паалийәт болғанлиқини тәкитлиди.

Д у қ ниң 29-июн башланған бу бир һәптилик паалийити бүгүн 3-июл ахирлашти.

Пикирләр (0)
Share
Толуқ бәт