D u q gérmaniyening hakimiyet béshidiki partiye erbabliri bilen söhbet ötküzdi

Ixtiyariy muxbirimiz ekrem
2020-07-03
Élxet
Pikir
Share
Print

D u q rehberliri gérmaniye parlaméntida 5 partiyening mes'ulliri we parlamént ezaliri bilen bir hepte uchrishish élip bardi.

D u q re'isi dolqun eysa, qurultayning programma yétekchisi éwa stokér we d u q bérlin ishxanisining mudiri gheyur qurban qatarliqlardin terkib tapqan bir guruppa wekiller 6-ayning 29-künidin bashlap gérmaniye paytexti bérlinda bir heptige sozulghan parlamént ezaliri bilen uchrishish pa'aliyetlirini élip barghan.

D u q re'isi dolqun eysa ependining bügün bérlindin bergen melumatlirigha asaslan'ghanda, bu uchrishishning da'irisi hazir gérmaniyede hakimiyet béshida bolghan xristi'an démokratlar partiyesi, sotsiyal démokratlar partiyesi, yéshillar partiyesi, erkin démokratlar partiyesi we solchillar partiyesi qatarliq 5 partiyening parlaménttiki muhim erbablirigha qeder kéngeygen.

Dolqun eysa ependi bu qétimqi bir heptilik söhbetning meqsiti toghrisida toxtalghanda, 7-ayning 1-künidin bashlap yawropa ittipaqining we b d t xewpsizlik kéngishining re'islikini üstige alghan gérmaniyening rolidin Uyghurlar üchün ünümlük paydilinish ikenlikini tilgha aldi.

D u q rehberliri gérmaniyediki herqaysi partiye rehberliri we parlamént ezaliri bilen bolghan bu qétimqi uchrishishta Uyghurlar yoluquwatqan nöwettiki qebih weziyetni özgertish üchün gérmaniye hökümitidin xitaygha bésim ishlitishte emeliy ünüm béridighan chare-tedbirlerni élishni telep qilip, amérikigha oxshash mexsus qanunlarni maqullash, magnitiskiy qanunini qobul qilish, xitay bilen alaqisi bolghan shirketlerni cheklesh, jazalash qatarliq konkrét mesililerni otturigha qoyghan.

Bu qétimqi ziyaretke hemrah bolghan d u q ning programma yétekchisi éwa stokér xanimning bildürüshiche, parlamént ezaliri we partiye rehberliri bilen bolghan bu uchrishishlarda xitayning jaza lagérliri siyasiti, mejburiy pilanliq tughut siyasiti we Uyghur millitining béshigha kéliwatqan éghir zulumlarni tepsiliy anglitish pursiti bolghan. U mundaq deydu: "Gérmaniye parlaméntida élip bérilghan bu uchrishishlarning da'irisi bek keng boldi. Partiye rehberliri we parlamént ezalirigha Uyghurlarning nöwettiki qiyin weziyiti, xitayning jaza lagérliri tüzümi we Uyghurlar duch kéliwatqan paji'eler tepsiliy anglitilipla qalmay, d u q ning we Uyghur xelqining gérmaniye hökümitidin kütidighan telep-isteklirimu jiddiy rewishte otturigha qoyuldi".

Gérmaniye parlaméntida élip bérilghan bu bir heptilik pa'aliyetke d u q ning bérlin ishxanisining mudiri, qurultay yashlar komitétining re'isi gheyur qurban ependimu ishtirak qilghan bolup, u bérlindin ziyaritimizni qobul qilghanda bu qétim élip bérilghan uchrishishning d u q hazirgha qeder gérmaniye parlaméntida élip barghan kölimi eng zor bir pa'aliyet bolghanliqini tekitlidi.

D u q ning 29-iyun bashlan'ghan bu bir heptilik pa'aliyiti bügün 3-iyul axirlashti.

Toluq bet