Xitayning “Diba tor armiyesi” d u q ning feysbok sehipisige hujum qildi

Ixtiyariy muxbirimiz ekrem
2019.04.11
duq-torbet-hujum.jpg Xitayning “Diba tor armiyesi” ning tor hujumi toghrisida élan qilin'ghan xewer.
dw.com

Xitayning yallanma “Tor armiyesi” d u q ning feysbok sehipisige hujum qozghap, xitay hakimiyitining basturush siyasetlirige chapan yépishqa urundi.

Xitayning “Yer shari waqti géziti” teripidin “Wetenperwer tor armiyesi” dep teriplen'gen, özlirini “Diba tor armiyesi” dep atiwalghan yallanma inkaschilar 10-aprél küni kech sa'et 8:00 de dunya Uyghur qurultiyining feysbok sehipisige nechche yüz qétimlar hujum qozghighan.

“Gérmaniye awazi” ning 11-apirildiki xewiride bayan qilinishiche, d u q ning feysbok sehipisige söz we resim qaldurup hujum qozghighan yallanma inkaschilarning sani 2 ming kishidin ashidiken. Ular her xil témilarda pikir yézish we süret chaplash arqiliq xitayning milliy siyasitini medhiyeleshke, gherb elliridiki xitayning jaza lagérlirigha qarshi sadalarni peseytishke urun'ghan. Xewerde déyilishiche, bu yallanma inkaschilar tapshuruq boyiche d u q ni “Térrorchi teshkilat” qilip körsitishni, Uyghur diyaridiki jaza lagérlirini bolsa “Térrorluq we esebiylikni tügitidighan orun” qilip perdazlashni meqset qilghan iken.

Xitayning tor yallanmilirini ishqa sélip d u q gha qaratqan bu hujumi qurultay xadimlirining ghezepni qozghighan. D u q ning mu'awin re'isi perhat muhemmidi ependining bildürüshiche, yéqinqi 2 yildin buyan xitay hakimiyitining d u q qa qaratqan hujumlirining salmiqi zor derijide ashmaqtiken.

D u q ning bayanatchisi dilshat rishitning ilgiri sürüshiche, jaza lagérliri mesilisining xelq'aralishishi xitayni qattiq bi'aram qilghan shundaqla d u q ning xelq'arada élip bériwatqan siyasiy pa'aliyetliri xitayning échishqan yarisini tatilighan.

D u q medeniyet bölümining mudiri, gollandiyediki siyasiy aktiplardin zeynidin ependining éytishiche, bu qétimqi tor hujumining arqida biwasite xitay hakimiyitining qoli barliqi éniq iken.

Perhat muhemmidi ependining tekitlishiche, xitay “Tor armiyesi” ning bu hujumi mahiyette xitay hakimiyitining téximu ghaljirlashqanliqi we gherb qimmet qarishigha jeng élan qilghanliqi bolup hésablinidiken.

Zeynidin ependining qarishiche, xitayning chet'eldiki yallanma küchlirining d u q qa qarshi körekliri meghlup bolghanliqi üchün xitay hakimiyiti chümperdisini yirtip tashlap, özliri biwasite otturigha chiqqan. Bayanatchi dilshat rishit d u q ning xitay hakimiyitining epti-beshirisini échip tashlash, xitayning xelq'aradiki obrazini sundurush jehetlerde oynighan rolining xitayni d u q qa biwasite hujum qozghashqa mejburlighan amil ikenlikini tekitlidi.

Melum bolushiche, xitay hökümiti d u q bilen yüzmu-yüz élishish üchün aldinqi aylarda d u q qa qarshi “Dunya shinjangliqlar qurultiyi” ni qurup chiqqan. Uning aldida bolsa d u q ning yawropa parlaméntidiki “Uyghur dostluq guruppisi” gha qarshi yawropa parlaméntida “Xitay dostluq guruppisi” ni qurup chiqqan. D u q ning yawropa parlaménti we b d t diki pa'aliyetlirige zerbe bérish üchün ezaliri xitaylardin terkib tapqan her xil namlardiki atalmish “Kishilik hoquq teshkilatliri” yaki “Tetqiqat merkezliri” ni sün'iy qurup chiqip, yighinlarda d u q ning pikirlirige qarshi sözleydighan bolghan. Emma xitayning bu urunushliri d u q ning pa'aliyetlirini chekliyelmigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.