Дуня уйғур қурултийиниң тунҗи қетимлиқ кеңәйтилгән йиғинида йеңи паалийәт пилани бекитилди

Ихтиярий мухбиримиз әркин тарим
2022-01-11
Share
Дуня уйғур қурултийиниң тунҗи қетимлиқ кеңәйтилгән йиғинида йеңи паалийәт пилани бекитилди Д у қ ниң тор арқилиқ өткүзгән омумий кеңәш йиғинидин көрүнүш. 2022-Йили 8-январ.
RFA/Erkin Tarim

8-январ чақирилған д у қ ниң тор арқилиқ өткүзгән омумий кеңәш йиғинида д у қ ниң рәһбәрлири билән һәр қайси дөләтләрдики шәрқий түркистан аммиви тәшкилатлириниң рәһбәрлири дуняниң нөвәттики вәзийити, алдимизда елип беришқа тегишлик хизмәтләр тоғрисида музакирә елип берип паалийәт пилани түзүп чиқти.

Д у қ рәиси долқун әйсаниң бәргән мәлуматлириға қариғанда, бу йиғинда қазақистанниң нөвәттики вәзийити, бейҗиң қишлиқ олимпик тәнтәрбийә мусабиқисини байқот қилиш паалийитини қанат яйдуруш тоғрисида музакирә елип берилған.

Йиғинға риясәтчилик қилған д у қ муавин рәиси пәрһат муһәммәт әпәнди телефон зияритимизни қобул қилип, бу йиғинға д у қ рәһбәрлири вә дуняниң һәр қайси җайлирида паалийәт елип бериватқан қериндаш тәшкилатларниң мәсуллириниң иштирак қилғанлиқини, йиғинниң мувәппәқийәтлик өткәнликини билдүрди.

Д у қ ниң рәиси долқун әйса әпәнди телефон зияритимизни қобул қилип йиғин һәққидә қисқичә мәлумат бәрди.

Пәрһат муһәммәт әпәнди риясәтчилик қилған йиғинда, 40 қа йеқин тәшкилатниң мәсуллири алдимиздики күнләрдә қилишқа тегишлик хизмәтләр тоғрисида тәләп-пикирлирини оттуриға қоюп конкрет хизмәт пиланини бекитип чиққан. Д у қ рәиси долқун әйса әпәнди башқа дөләтләрниму америка қобул қилған “уйғур мәҗбурий әмгикиниң алдини елиш қануни” ға охшаш қанун чиқиришқа чақириш паалийити елип бериш вә тәшкилатлар оттурисидики һәмкарлиқни күчәйтиш тоғрисида һәмпикир болғанлиқини оттуриға қойди.

Канада уйғур җәмийитиниң рәиси туйғун абдувәли әпәнди телефон зияритимизни қобул қилип, нөвәттики дуня вәзийитидики өзгиришләр, дуня уйғур қурултийиға болған һуҗум күчийиватқан бир мәзгилдә дуня уйғур қурултийиниң рәһбәрлири билән дуняниң һәр қайси җайлирида паалийәт елип бериватқан 40 әтрапида уйғур тәшкилатиниң мәсуллири иштирак қилған тор йиғинида наһайити муһим мәсилиләр тоғрисида музакирә елип берилип, 2022-йилида өзара һәмкарлиқни күчәйтип техиму көп вә тәсирлик паалийәтләрни елип бериш тоғрисида пикир бирликигә келингәнликини баян қилди.

8-январ күни чақирилған д у қ ниң кеңәйтилгән йиғинида америкадики уйғур һәрикити тәшкилатиниң мәсули рошән аббас ханим тәшкилатиниң йеқиндин буян елип барған паалийәтлири тоғрисида доклат бәрди. У, сөзидә дуня уйғур қурултийи билән һәмкарлишип елип бармақчи болған паалийәтлири тоғрисидики тәләп-пикирлирини оттуриға қоюп өтти. У, телефон зияритимизни қобул қилип, бу һәқтә мәлумат бәрди.

Йиғин ахирида д у қ ниң рәиси долқун әйса әпәнди сөз қилип, йиғинни хуласилигәндин кейин, д у қ ниң һазир хәлқарадики 250 дин артуқ кишилик һоқуқ тәшкилатлири, 40тин артуқ уйғур тәшкилатлири билән бирликтә иш бирлики елип бериватқанлиқини, бундин кейин бу һәмкарлиқни техиму күчәйтидиғанлиқини оттуриға қойди.

Д у қ ниң бу кеңәйтилгән омумий кеңәш йиғини өткән йили пирагада чақирилған 7-нөвәтлик вәкилләр қурултийидин кейинки тунҗи қетимлиқ кеңәйтилгән йиғини икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт