D u q bilen xelq'ara kechürüm teshkilati béyjing olimpik musabiqisge qarshi birleshme namayish ötküzdi

Ixtiyariy muxbirimiz ekrem
2021.03.18
D u q bilen xelq'ara kechürüm teshkilati béyjing olimpik musabiqisge qarshi birleshme namayish ötküzdi 2022- Yilliq béyjing qishliq olimpikini bayqut qilish chaqiriqi
Social Media

D u q bilen xelq'ara kechürüm teshkilati 2022 - yilliq béyjing qishliq olimpik musabiqisge qarshi birleshme namayish élip bardi.

17 - Mart d u q bilen xelq'ara kechürüm teshkilatining myunxén shöbisi xitayning myunxén shehridiki konsulxanisi aldida 2022 - yilliq béyjing qishliq olimpik musabiqisige qarshi birleshme namayish ötküzdi we bayqut qilish pa'aliyitini qanat yaydurdi. Namayish meydanida xitayning türmiside we jaza lagérlirida tutqunda yashawatqan yüzligen Uyghurlarning süretliri chüshürülgen lozunkilar, ay-yultuzluq kök bayraqlar lepildidi.

Namayish meydanidin ziyaritimizni qobul qilghan d u q ning mu'awin re'isi perhat muhemmidi ependining bildürishiche, d u q ning teshebbusi bilen yéqindin buyan 2022 - yilliq béyjing qishliq olimpik musabiqisini bayqut qilish chuqanliri yalghuz gérmaniyedila emes, yawropaning bashqa elliridimu barghansiri küchüyip barmaqta iken.

Gérman ziyaliysi, d u q ning programma xadimi éwa shitokér xanim bu qétimqi namayish heqqide ziyaritimizni qobul qilghanda, nöwette béyjing olimpikini bayqut qilish mesilisige nisbten xelq'ara olimpik komitétining selbiy pozitsiyesige bolghan naraziliqlarning pütün gérmaniyede künséri küchiyip bériwatqanliqini eskertip ötüp, xelq'ara kechürüm teshkilatining Uyghurlarning sépige qoshulghanliqining bir yaxshi ilgirilesh bolghanliqini tekitlidi. U mundaq dédi: “Dunya Uyghur qurultiyi bügün xelq'ara kechürüm teshkilati bilen birlikte 2022 - yilliq béyjing qishliq olimpik musabiqisini bayqut qilish seperwerliki qozghidi we xitayning myunxéndiki konsulxanisi aldida namayish élip bardi. Nurghunlighan Uyghurlarning jaza lagérlirigha qamalghanliqi, türmilerge bent qilin'ghanliqi, uzun muddetliq qamaq jazalirigha duch kéliwatqanliqi, türlük qéyin - qistaqlargha uchrawatqanliqi, iz - déreksiz ghayib boluwatqanliqi we bu jazalarning Uyghur rayonida hélihem dawam qiliwatqanliqi barghanséri köp yawropaliqlarning qozghilip, Uyghurlargha héssidashliq qilishtek bir weziyetning yarilishigha türtke bolmaqta. Dunyada küchlük siyasiy tesiri bolghan xelq'ara kechürüm teshkilatining xitaygha qarshi bu köreshte d u q bilen bir septe turushi menche yaxshi bir ilgirilesh hésablinidu.”

D u q ning re'is wekili, “Sherqiy türkistan ölimalar birliki” ning mu'awin re'is turghunjan alawudun ependi bu qétimqi namayish heqqide toxtalghanda, namayishqa bir bölük Uyghurlar we xelq'ara kechürüm teshkilatining ezaliridin sirt, bezi tibetlikler hemde xitay démokratlirimu  qatniship xitaydek insaniyetke qarshi jinayet sadir qiliwatqan, irqiy qirghinchiliq élip bériwatqan bir döletning olimpik musabiqisini ötküzüsh salahiyiti yoqliqini isptlashqa tirishiwatqanliqini tilgha aldi. Namayish 2 sa'et dawamlashti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.