Радийомиз уйғур бөлүминиң тәһрири әсәт сулайманниң акиси - әһәт сулайманниң тутқунда икәнлики дәлилләнди

Мухбиримиз шөһрәт һошур
2021-02-25
Share
Радийомиз уйғур бөлүминиң тәһрири әсәт сулайманниң акиси - әһәт сулайманниң тутқунда икәнлики дәлилләнди Тутқунда икәнлики дәлилләнгән радийомиз уйғур бөлүминиң тәһрири әсәт сулайманниң акиси - қумул шәһәр тәңритағ оқутуш райониниң мудири әһәт сулайман.
Photo: RFA

Уйғур районида лагер вә түрмиләргә соланған милйонлиған кишиләр қатарида әркин асия радийоси уйғур бөлүми хизмәтчилириниң 50нәпәрдин дин артуқ уруқ-туғқининиң тутқунда икәнлики мәлум болған иди. Мухбиримизниң бу һәқтики ениқлашлири давамида, радийомиз уйғур бөлүминиң тәһрири әсәт сулайманниң акиси - қумул шәһәр тәңритағ оқутуш райониниң мудири әһәт сулайманниң 2018-йилидин буян тутқунда икәнлики бүгүн дәлилләнди.

Хитай даирилири уйғур елидики лагерларниң2019 ‏-йилиниң ахири тақалғанлиқини елан қилған болсиму, чәт әлдики нәччә онмиңлиған уйғур муһаҗирлири ичидә уруқ-туққанлири билән көрүшүш имканиға еришкәнләр бармақ билән саниғудәк дәриҗидә аз сандидур. Биз һәққиқий әһвални айдиңлаштуруш үчүн уйғур елиға қарита елип барған телефон зиярәтлиримиз давамида, радийомиз мухбирлириниң аилә тавабиатлири һәққидиму ениқлаш елип бардуқ.

Мәлум болушичә, радийомиз уйғур бөлүминиң тәһрири әсәт сулайманниң вәтәндики уруқ-туғқанлиридин 7 киши тутуп кетилгән. Булардин әсәт сулайманниң акиси әһәт сулайман 2017‏-йилиниң башлиридин буян из-дерики ғайип болған. У тутқун қилинишниң алдида узун мәзгил қумул шәһәр тәңритағ йезилиқ оқутуш райониниң мудири болуп хизмәт қилған икән, шундақла қомул вилайитиниң миллий маарип сепидики тәҗрибилик маарипчилардин бири икән. Биз илгири қумул шәһиридики алақидар сақчихана вә бир қатар идарә-органларға телефон қилип бу һәқтә әһвал ениқлашқа тиришип баққан болсақму, әмма хадимлар җавап беришни изчил һалда рәт қилип кәлгән иди.

Нөвәттә германийәдә яшаватқан тәтқиқатчи доктор абләт сәмәт әпәнди илгири өзиниң уйғур елидики тәтқиқат зиярәтлири давамида, әсәт сулайманниң акиси әһәт сулайман билән учришиш вә тонушуш пурситигә игә болған. У йеқинқи мәзгилләрдә өзиниң үрүмчи вә қомулдики бир қисим алақә қаналлири арқилиқ маарипчи әһәт сулайман вә униң бир қисим қериндашлириниң2017 ‏-вә2018 ‏-йиллири тутқун қилинғанлиқи һәққидә учур алғанлиқини билдүрди. Доктор абләт сәмәт әпәндиниң дейишичә, әһәт сулайман тутулуштин илгири қумул шәһәр тәңритағ йезисиниң маарип ишлриға мәсул мудири икән. Бир толуқсиз оттурамәктәп вә бирқанчилиған башланғуч мәктәпләрни башқуридиған мәзкур оқутуш райони ишханисиниң тәңритағ йезисидин башқа йәнә қумул шәһәр ичидиму ишханиси бар икән. Биз қолимиздики алақә учурлириға ассән, мәзкур ишханиниң бир хадимиға телефон қилдуқ. Ишханисиниң қумул шәһәрлик партком бинасида икәнликини билдүргән бу хадим, дәсләптә маарипчи әһәт сулайманни тонумайдиғанлиқи вә униң делосидин хәврсизликини ейтти. Биз униңдин қомулда маарип саһәсидин тутуп кетилгән рәһбирий кадирлардин, җүмлидин мәктәп мудирлиридин кимләрни билидиғанлиқини сориғинимизда, бу һәқтиму мәлумати йоқлуқини ейтти. Биз униңдин мушу ишханидин тутулған кишиниң ким икәнликини сориғинимизда, у бу тутқунниң әһәт сулайман икәнликини ашкарилиди. Биз униңдин әһәт сулайманнниң немә үчүн тутулғанлиқини сориғинимизда, у бу һәқтә сақчи органлиридин мәлумат елишимизни тәвсийә қилди.

Телефонимизни қобул қилған тәңритағ йезилиқ сақчи хадимиму әһәт сулайманниң тутқунда икәнликини рәт қилмиди. Әһәт сулайманниң һазир нәдә тутуп турулуватқанлиқидин хәвәрсизликини ейтқан бу хадим, униң2018 ‏-йили тутулғанлиқи вә шуниңдин башлап хизмәттин тохтитилғанлиқини дәлиллиди. У йәнә әһәт сулайманниң дөләт аманлиқ сақчилири тәрипидин тутуп кетилгәнлики үчүн униң делосиниң тәписилати вә ақивитидин хәвәрсиз икәнликини ейтти.

Тәтқиқатчи абләт сәмәтниң тонуштуришичә, бу йил57 яшқа киргән әһәт сулайман 1986-йили шинҗаң педагогика ониверситетиниң тәнтәрбийә факултетини пүттүргән икән. Икки пәрзәнти вә бир нәвриси болған әһәт сулайман өзиниң иҗитимаий мәсулийәтчанлиқи, әтраплиқ илмий мәлумати вә тәмкин миҗәз-салапити билән қомулдики һәр саһә кишилири ичидә һөрмәт қазанған юрт мөтивәрлиридин икән.

Ениқлашлиримиз җәрянида әһәт сулайманниң қандақ бир "баһанә" билән тутулғанлиқи айдиңлашмиди. Доктор абләт сәмәт әпәнди уйғур райониниң нөвәттики омумий вәзийәткә асасән, маарипчи әһәт сулайманниң униң тутулушида америкадики иниси әсәт сулайманниң әркин асия радийосидики хизмити вә яки өзиниң җәмийәттики орни һәм тәсириниңму сәвәп болғанлиқ еһтималлиқини оттуриға қойди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт