Uyghur karxanichi ekber es'et 15 yilliq késilgen

Muxbirimiz jüme
2020-05-10
Élxet
Pikir
Share
Print
"Milliy öchmenlikke qutratquluq qilish gumani" bilen 15 yilliq késilgen Uyghur karxanichi ekber es'et.
"Milliy öchmenlikke qutratquluq qilish gumani" bilen 15 yilliq késilgen Uyghur karxanichi ekber es'et.
Social Media

Amérika tashqi ishlar ministirliqining nopuzluq programmisigha qatnashqan Uyghur karxanichi ekber es'et "Milliy öchmenlikke qutratquluq qilish gumani" bilen 15 yilliq késilgen.

Uning amérikadiki hedisi reyhan es'et inisini qutuldurush üchün élan qilghan muraji'etnamege qarighanda, ekber es'et 2016-yili 20-féwraldin 15-martqiche amérika tashqi ishlar ministirliqining "Xelq'ara ziyaretchi rehberlerni terbiyelesh programmisi" gha qatnashqan.

Halbuki u, amérika ziyaritini axirlashturup xitaygha qaytip üch heptidin kéyin tutup kétilgen.

"Nyu-york waqit géziti" ning xewer qilishiche, amérika tashqi ishlar ministirliqining bayanatchisi morgan ortagus xanim amérika diplomatlirining uning mesilisini xitayning semige sélishini izchil dawam qilidighanliqini bildürgen we xitayni "Mejburiy tutqun qilin'ghanlarni derhal qoyup bérishke we Uyghur rayonidiki qebih siyasetlirini ayaghlashturush" qa chaqirghan.

Aqsaray dölet xewpsizlik komitétining bayanatchisi jon ulliyotmu tramp hökümitining ekber es'etke oxshash milyonlighan Uyghurlarning mesilisige köngül bölüp kelgenlikini éytqan.

U mundaq dégen: "Hökümitimiz xitay kompartiyesining ekber es'etke oxshash milyonlighan Uyghurlarning milliy kimliki we diniy étiqadini yoqitiwétish üchün ularni mejburiy tutqun qilghanliqi, méngisini yuyuwatqanliqi we emgekke mejburlawatqanliqini dunyagha jakarlap keldi."

Melum bolushiche, ekber es'et Uyghur diyarida alqishqa érishken "Baghdash" munbirining qurghuchisi bolup, mezkur tor bétining 100 minggha yéqin qollan'ghuchisi bar iken. 

Amérikining xitayda turushluq sabiq bash elchisi maks bakus 2014-yili Uyghur diyarini ziyaret qilghanda ekber es'etmu maks bakus bilen körüshüshke tallan'ghan bir guruppa sodigerler qataridin orun alghan.

Reyhan es'etning "Nyu-york waqit géziti" ke éytishiche, maks bakus eyni chaghda ekber es'etni tashqi ishlar ministirliqining rehber terbiyelesh programmisigha iltimas qilishqa righbetlendürgen. Uning iltimasi qobul qilin'ghandin kéyin, u 2016-yili féwralda amérikigha kelgen. U, 3 heptilik programmini tamamlighandin kéyin eyni chaghda xarward uniwérsitéti qanun fakultétida oquwatqan hedisning oqush püttürüsh murasimigha ata-anisi élip amérikigha qayta kélidighanliqini wede qilip xitaygha qaytqan.

Halbuki, u ürümchige dessep 3 heptidin kéyin tutup kétilgen. Shuningdin kéyin uning amérikidiki hedisi reyhan es'et inisini qutuldurush üchün heriketke ötken.

Ekber es'et amérika tashqi ishlar ministirliqining 2019-yilliq kishilik hoquq doklatigha kirgüzülgen.

Reyhan es'et inisini qutuldurush üchün "Özgirish" tor bette bashlighan muraji'etnamige imza qoyghuchilar sani 500 ge yéqinlashqan.

Amérika tashqi ishlar ministirliqining xelq'ara ziyaretchi rehberlerni terbiyelesh programmisi 1940-yilidin buyan dawam qilip kéliwatqan nopuzluq terbiyelesh programmilirining bir bolup, hazirgha kelgüche dunyaning herqaysi jayliridin tallan'ghan 225 ming ademni terbiyeligen. En'gliyening sabiq bash weziri margarét sachir xanim, yéngi zélandiyening nöwettiki bash weziri jasinda ardéren qatarliqlarmu ilgiri mezkur programmigha qatnashqan iken.

Toluq bet