Öy-mülük sodigiri ekber iminning qérindash we shérikliridin 30 nechche kishining tutqunda ikenliki delillendi

Muxbirimiz shöhret hoshur
2020.01.21
Guzel-makan-oy-muluk-shirkiti-direktori-ekber-imin.jpg Bayliq jehette xotende aldinqi qatardiki kishilerdin sanilidighan “Güzel makan öy-mülük shirkiti” ning diréktori ekber imining pasporti. Xoten(waqti éniq emes)
RFA/Shöhret Hoshur

Xotendiki meshhur öy‏-mülük sodigiri ekber imin bilen birlikte uning qérindashliri, shérikliri we ishchi-xizmetchiliri bolup 30 nechche kishining tutqunda ikenliki weziyettin xewerdar kishi teripidin melum qilin'ghan idi. Muxbirimizning bu heqte ilgirilep élip barghan éniqlashliri dawamida ekber iminning akisi memetturdi imin we inisi memetjan iminning 20 yilliqtin késilgenliki, bulardin bashqa shérikliri we ishchi-xizmetchiliri bolup jem'iy 30 nechche kishining tutqunda ikenliki aydinglashti.

Weziyettin xewerdar kishi öy-mülük sodigiri ekber iminning xotendiki aldinqi qatardiki baylardin biri bolush süpiti bilen xotende nechche yüzligen kishini ish bilen teminligenliki, u tutqun qilin'ghanda uning bilen her xil sahede hemkarlashqan qérindashliri, shérikliri, ishchi-xizmetchiliri bolup, 30din artuq kishining ilgiri-kéyin tutulghanliqi we hazirghiche iz-dériki yoqluqini melum qilghan idi.

Tor arxiplirini axturghinimizda ekber iminning “Güzel makan” öy-mülük shirkitidin bashqa “Xoten aqtash paxta toqumichiliq shirkiti” namidimu bir shirkiti barliqi, bu shirketning bir milyon besh yüzming yüen meblighi barliqi, bu ikki shirketke akisi memetturdi imin, inisi memetjan imin we oghli enwerjan ekberlerning shérik ikenliki qeyt qilin'ghan.

Tordiki yene bir matériyalda ekber iminning inisi memetjan iminning bir qurulush matériyalliri shirkiti barliqi, bu shirketke qérindashliridin bashqa rozimmemet qasim, patigül qasim, abliz abduraxman, dolqun sirajidin, memtili qadir, ablet abdushükür we ömer nur qatarliq shériklirimu barliqi xatirilen'gen.

Torda 2019-yili 7‏-ayda élan qilin'ghan bir matériyalda “Güzel makan” öy-mülük shirkitining nöwette ekber iminning oghli enwerjan ekberning namida qanuniy tizimda ikenliki we shirketning enwerjan ekber teripidin mangduruluwatqanliqi bayan qilin'ghan. Emma éniqlashlirimiz dawamida ekber iminning qérindashliri we shérikliridin héchbirining normal tijaret qiliwatqanliqi yaki hayat kechürüwatqanliqi heqqide uchur élinmidi. Eksiche alaqidar sot xadimliridin biri ekber iminning sotlan'ghan ikki qérindishi barliqini tilgha alsa, yene bir xadim ekber iminning qérindashliri we shérikliri bolup 7 kishining késiwétilgenlikini we ularning nöwette aqsudiki bir jaza lagérida ikenlikini ashkarilidi.

Bir saqchi xadimi memetturdi imin bilen memetjan iminning 20 yilliqtin késilgenlikini bayan qilghan bolsimu, emma késiwétilgen shérikliri arisida yuqirida ismi tilgha élin'ghan kishilerning bar-yoqluqi heqqide melumat bérelmidi. Yene bir xadim ekber iminning tutqun qilin'ghan bir qisim ishchi-xizmetchilirining isimliki heqqide melumat bergen bolsimu, emma ularning yil késimi heqqide melumat bérelmidi.

Xoten sheher ilchi yézisidiki bir kent sékrétari öz kentidin ikki kishining ekber imin délosigha chétilip 7 yilliqtin késilgenliki we 2018-yilining axirida échilghan sotta mezkur délogha chétishliq 30 nechche kishi üstidin höküm chiqqanliqini bayan qildi.

Weziyettin xewerdar kishi ekber iminning tutqun qilinishigha, öy-mülük sodigiri eli abdulla bilen birlikte kim'ashti sodisida riqabetke chüshüp bir xitay sodigerni passip halgha chüshürüp qoyghanliqi, xoten sheher ichidiki muhim bir orundin zémin sétiwalmaqchi bolghan mezkur xitay sodigerning wilayettiki emeldar xitaylardin paydilinip turup eli abdulla bilen ekber iminni ujuqturghanliqini ilgiri sürgen idi.

Éniqlashlirimiz dawamida déloning bu qismigha alaqidar uchur aydinglashmidi. Xotende siyasiy-qanun saheside xizmet qilghan bir xadim ekber iminning tutulushida az dégende 5 xil seweb barliqini, bulardin biri u bina qilghan “Bext” olturaq rayonining modélida meschit, yashan'ghanlar sanatoriyesi we tenterbiye zali barliqi, bular ning hemmisi milliy pasonda layihelen'genkliki üchün ekber iminning “Diniy esebiylikni terghib qilishqa urunush” bilen eyiblen'genlikini ashkarilidi.

Xotenning ilchidiki bir kent sékrétari ekber iminning akisi memetturdi iminning bir siyasiy mehbus a'ilisige heqsiz öy teqdim qilghanliqi üchün “Jinayetchini qanat astigha élish” bilen eyiblen'genklikini ashkarilidi.

Xoten weziyitidin xewerdar kishilerdin yene biri ekber imin we qérindashlirining asasliq qash téshi sodisi bilen qed kötürgenliki, xitay da'irilirining yéqinqi yillardin buyan xotendiki qashtéshi sodisini atalmish “‛üch xil küch‚ lerning asasliq kirim menbesi” dep qarawatqanliqi, shu wejidinla xotendiki gholluq soda-karxanichilargha2015 ‏-yildin bashlapla zerbe bérishke bashlighanliqi, ekber imin we shériklirining ene ashu dölet suyiqestining qurbani ikenlikini ilgiri sürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.