Қаштеши содигири әли хораз (абдулла) ниң җәмәти вә ишчи-хизмәтчилиридин 52 кишиниң қамақта икәнлики айдиңлашти

Мухбиримиз шөһрәт һошур
2019-12-23
Елхәт
Пикир
Share
Принт
Қаштеши содигири ели абдулла (ели хораз). 2000-Йиллири, үрүмчи.
Қаштеши содигири ели абдулла (ели хораз). 2000-Йиллири, үрүмчи.
Photo: RFA

Радийомиз қолға чүшүргән хотәнгә аит бир сот һөкүмнамисидә қаштеши содигири ели абдулла билән бирликтә униң 3 қериндиши вә бир қейниинисиниңму 20 йиллиқтин кесилгәнлики қәйт қилинған иди. Мухбиримизниң бу һәқтики ениқлашлири давамида әли абдулланиң уруқ-туғқанлири билән бирликтә ширкитидики ишчи-хизмәтчилирини қатқанда җәмий 48 кишиниң кесилгәнлики вә 4 кишиниң лагерда икәнлики айдиңлашти.

Буниңдин йәттә ай илгири сабиқ мәһбус мәмәттурсун османни зиярәт қилған вақтимизда у өзиниң гумадики қамақханидин хотән вилайәтлик дөләт хәвпсизлики қамақханисиға йөткәлгәнлики вә өзиниң бу қамақханида илгири әли абдулланиң делосиға четишлиқ кишиләрниң ятқанлиқидин хәвәр тапқанлиқини баян қилған иди.

Қолимизға чүшкән сот һөкүмнамисидиму әли абдулланиң муддәтсиз кесилгинидин башқа униң қериндашлиридин‏ мәмтимин абдулла вә ибраһим абдулланиң 20 йиллиқтин кесилгәнлики вә бир милйон 150 миң йүән җәриманә қоюлғанлиқи, қейнииниси аблиз исламниңму 20 йиллиқ кесилгәнлики қәйт қилинған.

Тор архиплиридин сақланған мәзкур ширкәт һәққидики бир тонуштурушта әли абдулланиң иниси мәмтимин абдулланиң ширкәтниң қануний вәкили икәнлики тилға елинған. Хотәндики бәзи алақидар хадимлар әли абдулланиң қериндашлириниң тәқдири һәққидә ениқ мәлумат бәрмигән болсиму, әмма уларниң тутқунда икәнликини инкар қилмиди.

Вәзийәттин хәвәрдар киши «шинҗаң қаштеши өй-мүлүк ширкити» ниң үрүмчи вә хотәндә болуп, 500 дин артуқ кишини иш билән тәминлигәнлики, булардин көпинчисиниң юруңқаш дәряси бойида қаш теши колаш билән шуғуллинидиғанлиқи, әли абдулланиң тутулуши билән униңға йеқиндин һәмкарлашқан иш-хизмәтчилириниңму тутқун қилинғанлиқини мәлум қилған иди.

Мәзкур ширкәт һәққидики тонуштурушта бу ширкәтниң өй-земин содисидин башқа йәнә қурулуш материяллири, яғач материяллар, химийә-санаәт мәһсулатлири, бәш хил метал, електр сайманлири, йеза-игилик мәһсулатлири вә тоқумичилиқ мәһсулатлири қатарлиқ 23 саһәдә сода вә мулазимәт қилидиғанлиқи қәйт қилинған. Телефонимизни қобул қилған үрүмчи шәһәрлик сода-санаәт башқуруш идарисиниң бир хадими мәзкур ширкәт хизмәтчилириниң тәқдири һәққидә гәп қилиштин өзлирини тартти.

Вәзийәттин хәвәрдар кишиниң баян қилишичә, әли абдулланиң инилиридин абдуләһәд абдулла вә қейининилиридин мәмтимин исламниң кесилгәнликини мәлум қилған иди. Хотән вилайитидики сот хадимлиридин бири әли абдулланиң муддәтсиз кесилгәнликини тилға алди, әмма қериндашлириниң қанчә йил кесимидин хәвәрсизликини ейтти. Йәнә бир сот хадими әли абдулланиң уруқ-туғқанлиридин 13, ширкитидики ишчи-хизмәтчилиридин 35 кишиниң һәр хил муддәттә кесилгәнлики вә ширкәт хизмәтчилиридин 4 нәпириниң әли адбуллаға мунасивәт җәһәттики йеқинлиқи сәвәбидин нөвәттә «тәрбийәләш» тә икәнликини дәлиллиди.

Қолимиздики сот һөкүмидә әли абдулла вә қериндашлириниң қанунсиз кан ачқанлиқи қатарлиқ 4 түрлүк җинайәт билән әйибләнгән. Әмма вәзийәттин хәвәрдар киши әли абдулла вә қериндашлириниң тутулушиға уларниң зор миқдарда пул тапқанлиқи вә хәйр-сахавәт ишлири билән шуғулланғанлиқиниң сәвәб болғанлиқини илгири сүргән. У йәнә әли абдулланиң тәкшүрүлүш җәрянида хәлқ мәйданиға салған бинасидики миллий қияпәт сәвәбликму сораққа тартилғанлиқини тилға алған иди. Хотәндики бир сиясий-қанун кадири юқириқи гәпләрниң асассиз әмәсликини ишарәтлиди. Йәнә җәмийәт параңлирида бир хитай ширкитиниң хотәндин земин сетивалмақчи болғанлиқи, даириләрниң бу земинни талишип сетивелиш үчүн базарға салғанлиқи, әслидә хитай ширкити 94 милйонға сетивалмақчи болған бу земинниң әли абдулланиң өрлитип баһа қоюши билән 294 милйонға йүксәлгәнлики, шуниңдин кейин хитай даирилириниң әли абдулланиң байлиқини сүрүштә қилишқа башлиғанлиқи илгири сүрүлгән.

«Шинҗаң қаштеши өй-мүлүк ширкити» гә аит тордики материяллардин әли абдулланиң мәзкур ширкитигә 18.75% Дин һәссә қатқан икки шерики барлиқи, булардин бири карханичи таһирҗан абла, йәнә бири болса абләт абла икәнлики мәлум. Әмма уларниң нөвәттики тәқдири, йәни әли абдулла билән бирликтә тутқундаикәнлики яки әмәслики һазирчә мәлум әмәс.

Пикирләр (0)
Share
Толуқ бәт