Әнглийәдики ақиллар амбири: хитай корона вирусниң зийини үчүн 6.5 Тирилйон доллар төләм төлиши керәк

Мухбиримиз җүмә
2020-04-05
Share
korona-wirus-tolimi.png Баш штаби лондонға җайлашқан ақиллар амбири - һенрй җексон җәмийити елан қилған "корона вируси төлими" намлиқ доклат. 2020-Йили април. Әнглийә.
henryjacksonsociety.org

Әнглийәдики бир ақиллар амбири хитайниң корона вирусини йошуруп, дуняви апәт кәлтүрүп чиқарғанлиқи үчүн бир нәччә тирилйон доллар төләм төлиши лазимлиқини билдүрди.

Баш штаби лондонға җайлашқан һенрй җексон җәмийити "корона вируси төлими" Намлиқ доклатида корона мәсилисидә хитайни хәлқара сәһийә низамнамиси қатарлиқларни өз ичигә алған 10 нәччә түрлүк хәлқара қанун бойичә җинайи җавабкарлиққа тартишқа болидиғанлиқини көрсәтти.

Улар доклатида корона вируси сәвәблик "г 7" әллири тартқан иқтисадий зиян вә мәзкур вирусини тизгинләш үчүн сәрп қилған омумий сомминиң 6.5 Тирилйон доллар болидиғанлиқини илгири сүрди.

Улар доклатида "әгәр хитай бу вирус һәққидә тоғра учур бәргән болса, вирус хитайдин чиқип кәтмигән болатти" деди.

Мәлуматларға қариғанда, хитай сәһийә тармақлири 2019-йили декабирниң бешидила бу әҗәллик вирус һәққидә хәвәр тепип болған болсиму, бу һәқтики мәлуматларни җамаәттин йошурған вә бу һәқтә агаһландуруш бәргән дохтурларни җазалап, вирусқа аит дәлил-испатларни йиғиштуруветиш буйруқи бәргән.

Әнглийәдин чиқидиған "ера" гезитиниң мәлуматиға қариғанда, "җәнубий хитай сәһәр почтиси гезити" хитай сәһийә тармақлириниң 27-декабирдила корона вируси билән юқумланған 200 адәмни байқиғанлиқини хәвәр қилған.

Һалбуки, хитай 2019-йили 31-декабирға кәлгәндә андин дуня сәһийә тәшкилатини юқум әһвалидин хәвәрдар қилған. Дуня сәһийә тәшкилатиму әйни чағда хитайниң дегини бойичә вирусниң адәмдин адәмгә юқмайдиғанлиқини тәшвиқ қилған иди. 

Нөвәттә бу вирус дунядики барлиқ әлләргә дегүдәк тарқап 1 милйон 200 дин артуқ адәмни юқумландурған вә 65 миңдин артуқ адәмниң җениға замин болған. 

Өткән һәптә америкалиқ адвокат ларрй клайман башчилиқидики бир гуруппа адвокатлар таҗсиман корона вируси елип кәлгән зиянлар үчүн хитай үстидин 20 тирилйон америка доллирилиқ шикайәт сунған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт