Әнгилийә пуқралириниң хитайға ниспәтән нәпрәт туйғуси өрләп кәткән

Ихтиярий мухбиримиз әкрәм
2021-02-19
Share
Әнгилийә пуқралириниң хитайға ниспәтән нәпрәт туйғуси өрләп кәткән MG Хизмәтчиси хитай баш министири вен җябав MG маторлуқ завутини зиярәт қилғанда хитай вә әнглийәниң дөләт байриқини көтүрүп турған көрүнүши. 2011-Йили 26-июн, бирминғәм, әнглийә.
AP

Биританийә ташқий сиясәт горуһи рай синаш арқилиқ аран бәштин бир қисим әнгилийәликниң хитай билән болған мунасивәтни сақлап қелишни халайдиғанлиқини ениқлап чиққан.

Әнгилийәдики "биританийә ташқий сиясәт горуһи" мустәқил тәтқиқат билән шуғуллинидиған ақиллар амбири болуп, 2021-йили 1-айниң 6-7-күнлири қорамиға йәткән 20 миң киши үстидин рай синаш елип барған. 2-Айниң 16-күни елан қилған рай синаш нәтиҗисидин, мутләқ көп қисим кишиләрниң һөкүмәттин хитай билән болған мәнпәәтлик даиридә қисмән мунасивәтни сақлап қелишни, кишилик һоқуқ саһәсидә болса хитайға җәң елан қилишни тәләп қилидиғанлиқи мәлум болған.

"германийә долқунлири" радийосиниң 18-феврал елан қилған "әнгилийә хәлқиниң хитайға болған сәзгүрлики ешип кәтти" намлиқ хәвиригә асасланғанда, бу рай синаш доклати әнгилийә һөкүмитиниң күчлүк бир хирисқа дуч кәлгәнликини испатлап беридикән. Доклатта әнгилийәликләрниң нөвәттә хәлқара тәһдитләр, чәт әлниң тор һуҗуми, хәлқара тероризим, муһит мәсилиси вә ят дөләтләрниң мудахилисигә көңүл бөлүш билән биргә, хитайниң баш көтүрүшигиму җиддий көңүл бөливатқанлиқи илгири сүрүлгән.

Хәлқ раһини синаш нәтиҗисидин төвәндикиләр мәлум болған: 40 пирсәнт әнгилийәлик әнгилийә һөкүмитини кишилик һоқуқ хатириси җәһәттә хитайға җәң елан қилиши лазим, дәп қариған. 38 Пирсәнт әнгилийәлик һөкүмәтни муһит қоғдаштин ибарәт хәлқаралиқ саһәдә хитай билән һәмкарлишиши лазим, дәп қариған. 5 Тин 1 әнгилийәлик хитай билән болған иқтисадий һәмкарлиқни сақлап қелип, кишиләрниң диққитидики йиргинич туйғусини хитайға намайән қилиши лазим, дәп қариған.

"мәзкур доклат хитайниң әнгилийәниң дөләт бихәтәрликигә нисбәтән шәкилләндүриватқан тәһдитлирини йорутуп берипла қалмай, йәнә хитайниң интайин қәбиһ болған кишилик һоқуқ хатирисиниму ашкарилап бәргән." биританийә ташқий сиясәт горуһи бу рай синашни әнгилийә вә дуня миқясида һазирғичә елип берилған әнгилийә тоғрисидики "әң мукәммәл рай синаш" дәп атиған.

Җинсий пәрқ җәһәттин айриғанда, рай синашқа қатнашқан аялларниң 18 пирсәнти хитай билән болған һәрқандақ алақини үзүшни тәкитлигән, әрләрниң бу җәһәттики нисбити 13 пирсәнт болған. яш қорами юқириларниң мутләқ көп қисми хитай билән болған һәрқандақ алақини үзүшни тәшәббус қилған.

Мәдәнийәт вә маарип сәвийиси җәһәттин айриғанда, алий маарип тәрбийәси көрмигән, иқтисадий асаси аҗиз болған, йиза-базарларда яшайдиған һәмдә ақтәнлик болған әнгилийәликләрниң хитай билән болған һәрқандақ алақини бикар қилишни қоллайдиғанлириниң ниспити қара тәнликләр вә хитай қенидин болған әнгилийәликләргә селиштурғанда, 4 һәссидин артуқ санни тәшкил қилған.

Әнгилийә пуқралирида хитайға нисбәтән бу қәдәр күчлүк нәпрәт туйғусиниң шәкиллинишигә сәвәб болған асасий амил немә?

Әнгилийәдики уйғур зиялиси, д у қ лондун ишханисиниң мудири рәһимә ханим бу соалға җавап берип, әнгилийәликләрниң хитайға нисбәтән нәпрәт туйғулириниң йүксилишигә хитайниң тибәт мәсилиси, хоңкоң мәсилиси, шәрқий түркистандики җаза лагерлири мәсилиси вә хитайдин таралған корана вирусиниң асаслиқ муһим сәвәб болғанлиқини тәкитлиди.

Биританийә ташқий сиясәт горуһи елан қилған доклатта йәнә әнгилийәдики бәзи даңлиқ гезитләрниң муштәрилириниң қарашлириму итибарға елинған. "муһапизәтчи" гезитиниң 67 пирсәнт муштәрилири хәлқаралиқ риқабәтләрдә хитай билән һәмкарлишишни қоллиған, 42 пирсәнти тәтқиқат ишлиридики һәмкарлиққа қошулған, хитай оқуғучиларниң әнгилийәгә келип оқушини қоллиғанларниң сани 51 пирсәнт болған. Әмма хитайниң кишилик һоқуқ хатирисигә җәң елан қилишни тәшәббус қилғучиларниң нисбити 65 пирсәнткә йәткән.

"қуяш гезити" мухбирлириниң аран 27 пирсәнти хәлқаралиқ риқабәтләрдә хитай билән һәмкарлишиш тәрәпдари болған. 23 Пирсәнти хитай билән болған һәрқандақ һәмкарлиқни бикар қилишни тәкитлигән. "күндилик почта гезити" муштәрилириниң аран 26 пирсәнти хитайларниң әнгилийәгә келип оқушиға қошулған. Бирақ "пул муамилә гезити" муштәрилириниң қошулғанлириниң сани 5 пирсәнткә йәтмигән.

Дуня миқясида хитайға нисбәтән сәлбий қарашларниң күчийишиниң омумиййүзлүк һадисигә айланғанлиқини илгири сүргән норвегийәдики уйғур зиялиси бәхтияр өмәр әпәнди бу һәқтә тохталғанда, корона вируси вә кишилик һоқуқ дәпсәндичилики сәвәблик норвегийә пуқралиридиму хитайға қарита илгирикидәк қизғин муамилиләрниң қалмиғанлиқини тилға алди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт