Әнглийә парламентида «уйғур гурупписи» қурулди

Ихтиярий мухбиримиз әкрәм
2019-07-25
Елхәт
Пикир
Share
Принт
Д у қ ниң рәиси долқун әйса әпәнди әнглийә парламентида уюштурулған «уйғурларниң диний вәзийити вә җаза лагерлири тоғрисида гуваһлиқ бериш» йиғинида сөз қилди. 2019-Йили 24-июл, лондон.
Д у қ ниң рәиси долқун әйса әпәнди әнглийә парламентида уюштурулған «уйғурларниң диний вәзийити вә җаза лагерлири тоғрисида гуваһлиқ бериш» йиғинида сөз қилди. 2019-Йили 24-июл, лондон.
RFA/Ekrem

24-Июл әнглийә парламентида җаза лагерлири тоғрисида гуваһлиқ бериш йиғини өткүзүлгән һәмдә «уйғур гурупписи» қурулған.

Дуня уйғур қурултийиниң рәиси долқун әйса әпәнди 24-июл әнглийә пайтәхти лондонға йетип келип, әнглийә парламентида уюштурулған «уйғурларниң диний вәзийити вә җаза лагерлири тоғрисида гуваһлиқ бериш» йиғиниға қатнашқан.

Долқун әйса әпәндиниң билдүрүшичә, 24-июл күни әнглийә парламентида гуваһлиқ бериш йиғини уюштурулуш билән бир вақитта йәнә йиғин хатимисидә «барлиқ партийә вәкиллириниң аваз қошуши» билән «уйғур гурупписи» қурулған.

Долқун әйса әпәнди гуваһлиқ бериш йиғинида сөз қилип, шәрқий түркистанниң нөвәттики омумий вәзийити, болупму диний саһәдики зулум вә җаза лагерлиридики еғир бастурушлар тоғрисида әтраплиқ мәлумат бәргән.

Лондондики уйғур сиясий актиплиридин рәһимә ханим бу һәқтә тохталғанда алди билән «уйғур гурупписи» ниң қурулуши үчүн әнглийәдики уйғурлар вә башқа кишилик һоқуқ паалийәтчилириниң бир йилдин буян зор әҗирләр сәрп қилғанлиқини, нәтиҗидә 24-июл күни бу гуруппиниң нәтиҗилик қурулғанлиқини шундақла бир қисим парламент әзалириниң «уйғур гурупписи» дин орун алғанлиқини тилға алди. У сөзидә д у қ рәиси долқун әйса әпәндиниңму бу гуруппиниң қурулуши үчүн әнглийәдә бир йилдин артуқ вақиттин буян паал һәрикәтләрдә болғанлиқини әскәртти.

Рәһимә ханимиң баян қилишичә, «уйғур гурупписи» уйғурларниң әнглийә парламентидики авази болуш ролини өтәйдикән. Униң тилға елишичә, уларниң бундин кейинки муһим вәзиписи техиму көп парламент әзалирини бу гуруппиға әза қилиш арқилиқ уйғурлар мәсилисиниң әнглийә парламентида даима күнтәртиптә турушиға капаләтлик қилиш икән.

Долқун әйса әнглийә парламентида «уйғур гурупписи» ниң қурулушини «охшаш болмиған партийәләрниң уйғурлар мәсилисидә парламентта ортақ мәйданда туруши» ниң башлинишидин дерәк беридиғанлиқини әскәртти.

Д у қ рәисиниң билдүрүшичә, пат пурсәттә әнглийә пайтәхти лондон шәһиридә д у қ ниң мәхсус уйғур дәваси билән мәшғул болидиған тармақ ишханиси тәсис қилинидикән һәмдә парламент вә «уйғур гурупписи» билән болған алақиләрни бу ишхана үстигә алидикән.

Пикирләр (0)
Share
Толуқ бәт