En'gliye parlaméntida "Uyghur guruppisi" quruldi

Ixtiyariy muxbirimiz ekrem
2019-07-25
Élxet
Pikir
Share
Print
D u q ning re'isi dolqun eysa ependi en'gliye parlaméntida uyushturulghan "Uyghurlarning diniy weziyiti we jaza lagérliri toghrisida guwahliq bérish" yighinida söz qildi. 2019-Yili 24-iyul, london.
D u q ning re'isi dolqun eysa ependi en'gliye parlaméntida uyushturulghan "Uyghurlarning diniy weziyiti we jaza lagérliri toghrisida guwahliq bérish" yighinida söz qildi. 2019-Yili 24-iyul, london.
RFA/Ekrem

24-Iyul en'gliye parlaméntida jaza lagérliri toghrisida guwahliq bérish yighini ötküzülgen hemde "Uyghur guruppisi" qurulghan.

Dunya Uyghur qurultiyining re'isi dolqun eysa ependi 24-iyul en'gliye paytexti london'gha yétip kélip, en'gliye parlaméntida uyushturulghan "Uyghurlarning diniy weziyiti we jaza lagérliri toghrisida guwahliq bérish" yighinigha qatnashqan.

Dolqun eysa ependining bildürüshiche, 24-iyul küni en'gliye parlaméntida guwahliq bérish yighini uyushturulush bilen bir waqitta yene yighin xatimiside "Barliq partiye wekillirining awaz qoshushi" bilen "Uyghur guruppisi" qurulghan.

Dolqun eysa ependi guwahliq bérish yighinida söz qilip, sherqiy türkistanning nöwettiki omumiy weziyiti, bolupmu diniy sahediki zulum we jaza lagérliridiki éghir basturushlar toghrisida etrapliq melumat bergen.

Londondiki Uyghur siyasiy aktipliridin rehime xanim bu heqte toxtalghanda aldi bilen "Uyghur guruppisi" ning qurulushi üchün en'gliyediki Uyghurlar we bashqa kishilik hoquq pa'aliyetchilirining bir yildin buyan zor ejirler serp qilghanliqini, netijide 24-iyul küni bu guruppining netijilik qurulghanliqini shundaqla bir qisim parlamént ezalirining "Uyghur guruppisi" din orun alghanliqini tilgha aldi. U sözide d u q re'isi dolqun eysa ependiningmu bu guruppining qurulushi üchün en'gliyede bir yildin artuq waqittin buyan pa'al heriketlerde bolghanliqini eskertti.

Rehime xaniming bayan qilishiche, "Uyghur guruppisi" Uyghurlarning en'gliye parlaméntidiki awazi bolush rolini öteydiken. Uning tilgha élishiche, ularning bundin kéyinki muhim wezipisi téximu köp parlamént ezalirini bu guruppigha eza qilish arqiliq Uyghurlar mesilisining en'gliye parlaméntida da'ima küntertipte turushigha kapaletlik qilish iken.

Dolqun eysa en'gliye parlaméntida "Uyghur guruppisi" ning qurulushini "Oxshash bolmighan partiyelerning Uyghurlar mesiliside parlaméntta ortaq meydanda turushi" ning bashlinishidin dérek béridighanliqini eskertti.

D u q re'isining bildürüshiche, pat pursette en'gliye paytexti london shehiride d u q ning mexsus Uyghur dewasi bilen meshghul bolidighan tarmaq ishxanisi tesis qilinidiken hemde parlamént we "Uyghur guruppisi" bilen bolghan alaqilerni bu ishxana üstige alidiken.

Toluq bet