Erden'ay Uyghur bu nöwet “Kelgüsidiki cholpan” tajisini kiydi

2024-Yilliq amérika xanqizi tajilirini talishish musabiqiliri, oxshimighan ishtatlarda jiddiy dawam qilmaqta.

Amérikining wirjiniye ishtatida tughulghan 6 yashliq erden'ay Uyghur, amérikidiki Uyghurlar üchün éytqanda bu türdiki musabiqige qatnashqan we netije qazan'ghan tunji Uyghur qizi bolup qalghanidi. Ilgiriki musabiqilerde erden'ay özining yéshidin halqighan temkinliki, jasaretlikliki bilen onlighan musabiqe basquchlirida yüzligen riqabetchilirige jeng élan qilip, hel qilghuch musabiqige qatnashqan we talant türide “Chimen doppam” dégen Uyghur usulini orundap, üchinchilikni qolgha keltürgenidi.

 Omaq Uyghur qizi erden'ay her qétim “Uyghur melike” dégen léntini ésip sehnige chiqqinida Uyghur kimliki namayan bolush bilen birge, dadilliqi we talanti alahide közge körünüp keldi we ismi jismigha layiq “Uyghur melike” bolup qaldi.

 “Amérika dölet xanqizi” we “Xelq'ara xanqizi” tajisini kiyish iradisidin yanmighan erden'ay, apisining her tereptin chéniqturushi we yéteklishi netijiside, bu yil téximu jesur roh, yaxshi teyyarliq, yéngiche qiyapet bilen riqabetchilirige dawamliq jeng élan qilmaqta iken.

Uyghur élide xitayning irqi qirghinchiliq siyasiti bashlan'ghan bir waqitta amérikaning wirjiniye ishtatida tughulghan erden'ay hazirgha qeder dadisi bilen körüshüp baqmighan, chünki xitay uning dadisigha pasport bermigen. Adalet xanim yalghuz ana bolushigha qarimay, qeyserlik bilen 6 yashliq erden'ayni etrapliq terbiyelep kelmekte. Erden'ay sehnilerdiki özini tonushturush pursetliride, özining eng chong ghayisining dadisini amérikigha élip kélip, a'ilisini jem qilish ikenlikini tesirlik bayan qilip, yéshidin halqighan qeyserlikini namayan qilip kelmekte.

Musabiqilerge toluq ishench bilen qatniship, pütün Uyghurlarning awazi we ularning hörlük arzulirini namayan qiliwatqan erden'ayning, 4-awghust néwjérsy ishtatida ötküzülgen, amérika döletlik sherqi qirghaq xanqizliri musabiqisining 2024-yilliq “Kelgüsidiki cholpan” mukapatigha érishkenliki Uyghurlarni söyündürmekte.

Bu nöwet u ay yultuzluq kök bayraqta layihelen'gen libasi bilen sehnige chiqip, pütün Uyghurlarning awazi boluwatqanliqini yene bir qétim namayende qildi. Neq meydan widiyoliri ijtima'iy taratqulargha tarqalghandin kéyin, muhajirettiki Uyghurlar özlirining xushalliqi, güzel tebrikliri we tileklirini bildürdi.

Biz erdan'ayning yéqinqi musabiqe netijiliri, aldimizdiki musabiqe teyyarliqliri, shundaqla kelgüsidiki chong musabiqilerge teyyarliq qilish ehwali heqqide ehwal igilesh üchün, bu kichik cholpanning yétekchisi we anisi adalet sabit xanim bilen tepsiliy söhbette bolduq.

 Bir qanche künlük jiddiy musabiqiler jeryanida hérip ketkinige qarimay, özige medet bérip kéliwatqan Uyghurlargha radiyomiz arqiliq bir éghiz bolsimu tatliq salam bérishni untumighan erden'ay, söhbitimiz axirida özining iradisini “Men Uyghur üchün küresh qilimen” dégen sözliri bilen ipade qildi.

 “Kelgüsining cholpini” bolghan erden'ay Uyghur “Dunya xanqizi” tajisini talishish üchün dawamliq tirishmaqta.