Nyu-yorktiki "Erkin qazaq teshkilati" pa'aliyetlirini janlandurmaqta

Muxbirimiz méhriban
2019-06-13
Élxet
Pikir
Share
Print
Ghéni istambékof ependi qazaq yashlirining namayishigha yétekchilik qilmaqta. 2019-Yili 9-iyun, washin'gton.
Ghéni istambékof ependi qazaq yashlirining namayishigha yétekchilik qilmaqta. 2019-Yili 9-iyun, washin'gton.
RFA/Méhriban

a9-Iyun küni amérika paytexti washin'gtonda bir türküm qazaq yashliri naraziliq namayishi ötküzgen.

Igilinishiche, qazaq yashliri bu qétimliq namayishta qazaqistanning dölet ichige nisbeten mustebit siyaset yürgüzüp, xelqning söz we saylam erkinlikini basturghanliqini, tashqi jehette teslimchilik siyasiti yürgüzüp, qazaqistanning zémin we tebi'iy bayliqlirini xitaygha satqanliqini pash qilghan.

Qazaq namayishchilar yene qazaqistanning mustebit xitay hökümitige yantayaq bolup, lagérlargha qamalghan qazaq, Uyghur qatarliq türkiy xelqlerge köz yumghanliqi, hetta "Ata yurt pida'iyliri" teshkilatining bashliqi sérikjan bilesh'oghligha oxshash kishilik hoquq pa'aliyetchilirini mirzaqamaqqa alghanliqini qattiq eyibligen.

Namayishqa yétekchilik qilghan qazaq yashliridin ghéni istambékof ependi ziyaritimizni qobul qilip, özlirining 2017-yildin buyan amérikining nyu-york shehiride bu xildiki naraziliq namayishlirini birqanche qétim uyushturghanliqini, 9-iyun küni washin'gtonda ötküzülgen namayishning 2019-yili 3-ayda "Erkin qazaq teshkilati" qurulghandin kéyin élip bérilghan tunji meydan naraziliq namayishi ikenlikini bildürdi.

U sözide 9-iyun küni washin'gtonda ötküzülgen naraziliq namayishida ötken hepte qazaqistanda élip bérilghan prézidént saylimida yüz bergen 5000 din artuq qazaq puqrasining tutqun qilinish weqesige naraziliq bildürülgenlikini bayan qildi.

U yene qazaqistan hökümitini dölet ichige qarita hakimmutleq siyaset yürgüzüsh, tashqi jehette xitaygha yol qoyush bilen eyibligenlikini bildürdi. Uning bildürüshiche, namayishchilar qazaqistan hökümitining xitay lagérlirigha qamalghan qazaq we Uyghurlarning qiyin ehwaligha köz yumghanliqi hem süküt qilghanliqi, hetta iqtisadiy menpe'et üchün qazaqistanning igilik hoquqlirini ayaq-asti qilip, yer-zémin we néfit bayliqlirini xitaygha satqanliqidek qilmishlirini qattiq eyibligen.

"Erkin qazaq teshkilati" ning bashliqi ghéni istambékofning bildürüshiche, ular yene qazaqistandiki "Ata yurt pida'iyliri" teshkilatining bashliqi sérikjan bilesh'oghlining tutqun qilinip öyige nezerbend qilinish weqesigimu naraziliq bildürgen.

Ziyaritimiz axirida ghéni istambékof ependi özlirining bundin kéyinki pa'aliyetlirini téximu janlanduridighanliqini bildürdi.

U qazaqistan hökümitini nöwettiki mustebit siyasitini özgertishke, qazaqistanda amérika qatarliq gherbtiki démokratik döletlerde heqiqiy démokratik siyaset berpa qilishqa, qazaqistan tupriqidiki puqralarning pikir erkinlikige kapaletlik qilishqa chaqiriq qildi.

U yene qazaqistan hökümitining sérikjan bilesh'oghli qatarliq qazaq we Uyghur pa'aliyetchilirining qazaqistanda erkin pa'aliyet élip bérishigha yol qoyushini, Uyghur diyaridiki jaza lagérlirigha qamalghan Uyghur, qazaq, qirghiz, tatar qatarliq türkiy xelqler mesilisige qarita xitay hökümitige jiddiy türde inkas qayturushini telep qilidighanliqini bildürdi.

Toluq bet