Паалийәтчи абдувәли аюпниң акиси әркин аюп 14 йиллиқ, сиңлиси саҗидигүл аюп 12 йиллиқ кесиветилгән

Мухбиримиз шөһрәт һошур
2021-05-26
Share
Паалийәтчи абдувәли аюпниң акиси әркин аюп 14 йиллиқ, сиңлиси саҗидигүл аюп 12 йиллиқ кесиветилгән Норвегийәдә яшаватқан паалийәтчи абдувәли аюпниң 14 йиллиқ кесилгән акиси әркин аюп вә 12 йиллиқ кесилгән сиңлиси саҗидәгүл аюп.
Abduweli Ayup teminligen

Норвегийәдә яшаватқан паалийтчи абдувәли аюпниң җйәни миһриай әркинниң қәшқәр янбулақ қамақханисида җан үзгәнлики ашкариланғандин кейин, мухбиримиз униң тутқундики акиси әркин аюп вә сиңлиси саҗидигүл аюп һәққидиму ениқлаш елип барди. Мухбиримизниң телефон зияритини қобул қилған алақидар хадимлар, әркин аюпниң 14 йиллиқ, саҗидигүл аюпниң болса 12 йиллиқ кесилгәнликини дәлиллиди.

Японийәдин юртиға қайтқан тәтқиқатчи миһриай әркинниң қәшқәр янбулақ қамақханисида җан үзгәнлики учури дәлилләнгәндин кейин, униң юртиға қайтишиға түрткә болған дадиси әркин аюп, һаммиси саҗидигүл аюпниң тәқдири һәққидиму ениқлаш елип бардуқ. Тоққузақ наһийәлик сот мәһкимиси, бу иккисиниң делоси һәққидә телефонда мәлумат берәлмәйдиғанлиқини тилға алди. Норвейәдики уйғуряр фонди тәйярлиған тутқундики зиялилар тизимликидә қәйт қилинишичә, әркин аюп2017 ‏-йили 9‏-айда, саҗидигүл аюп 2017‏-йили 4‏-айда тутқун қилинған. Уйғуряр фондиниң қурғучиси шундақла әркин аюп билән саҗидигүл аюпниң қериндиши болған вә нөвәттә норвегийәдә яшаватқан абдувәли аюпниң баян қилишичә, әркин аюп тоққузақ наһийәлик парткомда, саҗидигүл аюп наһийәлик1 ‏-оттура мәктәптә оқутучилиқ қиливатқан мәзгилидә тутқун қилинған. Қәшқәр вилайәтлик тәштиш мәһкимисиниң бир хадимиму бу икки делониң сәзгүр делолар қатарида икәнликини тилға елип, мәлумат беришни рәт қилди.

Тоққузақ вәзийитидин хәвәрдар кишиләрдин бириниң радийомизға инкас қилишичә, әркин аюп билән саҗидигүл аюп һәр икиси әслидә кәспий хизмәтлиридә нәтиҗә көрситип вә тәқдирлинип келиватқан хизмәтчиләрдин болуп, улар пәқәт уйғур районида тохтимай чиқиватқан сиясий шамалларда актип позитсийәдә болмиғачқа, йәни хитай күткән дәриҗидики садақәтни көрсәтмигәнлики үчүнла тутқун қилинған. Инкаста йәнә 2019‏-йилниң ахирлири әркин аюпниң 14 йиллиқ, саҗидигүл аюпниң 12 йилиқ кесилгәнлики, буниңға абдувәли аюпниң илгири вә нөвәттә елип бериватқан сиясий паалийәтлириниң сәвәп болғанлиқи илгири сүрүлгән. Тоққузақлиқ бир сақчи хадими әркин аюпниң кесим муддити һәққидә ениқ мәлумат бәрмигән болсиму, әмма униң кесиветилгәнликини йошурмиди. У йәнә әркин аюпниң кесилишигә бирқанчә иш сәвәп болғанлиқи, булардин бири пиланлиқ туғут хизмитини ишләватқан мәзгилдә өткүзгән аталмиш "хаталиқи" икәнликини ашкарилиди. Йәнә бир хадим саҗидигүл аюпниң 12 йиллиқ кесилгәнликини инкар қилмаслиқ билән бирликтә, униң нөвәттә қәшқәрдики муш түрмисидә җаза муддитини өтәватқанлиқини дәлиллиди.

Абдувәли аюпниң дейишичә, әркин аюп билән саҗидигүл аюп көргән аилә тәрбийәси сәвәблик хизмәттә әстайидил, иҗтимаий паалийәтләрдә мәсулийәтчан кишиләрдин болуп, улар абдувәли аюпниң уйғур районидики чеғида елип барған ана-тил паалийәтлирини актиплиқ билән қоллиған икән. Улар йәнә нормал бир қериндашлиқ мусивәтлири сәвәбидин илгири қаттиқ чәклимә қоюлмиған мәзгилләрдә арилап телефонда сөзләшкән вә оз ара аилә әһваллири һәққидә һал сорашқан вақитлириму болған икән.

Абдувәли аюп һәр қетим чәт әлдә әмәлий бир ишқа қол тиққанда вәтәндики аилисидин әнсиз бир хәвәрни аңлап келиватқанлиқи, буниң чәт әлдики уйғур паалийәтчиләр үчүн омумий бир әһвал икәнликини тилға алди. Абдувәли аюп өзи вә сәпдашлириниң милләтниң тәқдири оңшалмай туруп, аилә әзалириниң тәқдиридә бурулуш характерлик өзгириш болмайдиғанлиқиға ишинидиғанлиқи, шуниң үчүн арқа-арқидин келиватқан шум хәвәрләргә қаримай паалийәтлирини техиму актиплиқ билән давамлаштуриватқанлиқини әскәртти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт