Pa'aliyetchi abduweli ayupning akisi erkin ayup 14 yilliq, singlisi sajidigül ayup 12 yilliq késiwétilgen

Muxbirimiz shöhret hoshur
2021-05-26
Share
Pa'aliyetchi abduweli ayupning akisi erkin ayup 14 yilliq, singlisi sajidigül ayup 12 yilliq késiwétilgen Norwégiyede yashawatqan pa'aliyetchi abduweli ayupning 14 yilliq késilgen akisi erkin ayup we 12 yilliq késilgen singlisi sajidegül ayup.
Abduweli Ayup teminligen

Norwégiyede yashawatqan pa'aliytchi abduweli ayupning jyeni mihri'ay erkinning qeshqer yanbulaq qamaqxanisida jan üzgenliki ashkarilan'ghandin kéyin, muxbirimiz uning tutqundiki akisi erkin ayup we singlisi sajidigül ayup heqqidimu éniqlash élip bardi. Muxbirimizning téléfon ziyaritini qobul qilghan alaqidar xadimlar, erkin ayupning 14 yilliq, sajidigül ayupning bolsa 12 yilliq késilgenlikini delillidi.

Yaponiyedin yurtigha qaytqan tetqiqatchi mihri'ay erkinning qeshqer yanbulaq qamaqxanisida jan üzgenliki uchuri delillen'gendin kéyin, uning yurtigha qaytishigha türtke bolghan dadisi erkin ayup, hammisi sajidigül ayupning teqdiri heqqidimu éniqlash élip barduq. Toqquzaq nahiyelik sot mehkimisi, bu ikkisining délosi heqqide téléfonda melumat bérelmeydighanliqini tilgha aldi. Norwéyediki Uyghuryar fondi teyyarlighan tutqundiki ziyalilar tizimlikide qeyt qilinishiche, erkin ayup2017 ‏-yili 9‏-ayda, sajidigül ayup 2017‏-yili 4‏-ayda tutqun qilin'ghan. Uyghuryar fondining qurghuchisi shundaqla erkin ayup bilen sajidigül ayupning qérindishi bolghan we nöwette norwégiyede yashawatqan abduweli ayupning bayan qilishiche, erkin ayup toqquzaq nahiyelik partkomda, sajidigül ayup nahiyelik1 ‏-ottura mektepte oqutuchiliq qiliwatqan mezgilide tutqun qilin'ghan. Qeshqer wilayetlik teshtish mehkimisining bir xadimimu bu ikki déloning sezgür délolar qatarida ikenlikini tilgha élip, melumat bérishni ret qildi.

Toqquzaq weziyitidin xewerdar kishilerdin birining radiyomizgha inkas qilishiche, erkin ayup bilen sajidigül ayup her ikisi eslide kespiy xizmetliride netije körsitip we teqdirlinip kéliwatqan xizmetchilerdin bolup, ular peqet Uyghur rayonida toxtimay chiqiwatqan siyasiy shamallarda aktip pozitsiyede bolmighachqa, yeni xitay kütken derijidiki sadaqetni körsetmigenliki üchünla tutqun qilin'ghan. Inkasta yene 2019‏-yilning axirliri erkin ayupning 14 yilliq, sajidigül ayupning 12 yiliq késilgenliki, buninggha abduweli ayupning ilgiri we nöwette élip bériwatqan siyasiy pa'aliyetlirining sewep bolghanliqi ilgiri sürülgen. Toqquzaqliq bir saqchi xadimi erkin ayupning késim mudditi heqqide éniq melumat bermigen bolsimu, emma uning késiwétilgenlikini yoshurmidi. U yene erkin ayupning késilishige birqanche ish sewep bolghanliqi, bulardin biri pilanliq tughut xizmitini ishlewatqan mezgilde ötküzgen atalmish "Xataliqi" ikenlikini ashkarilidi. Yene bir xadim sajidigül ayupning 12 yilliq késilgenlikini inkar qilmasliq bilen birlikte, uning nöwette qeshqerdiki mush türmiside jaza mudditini ötewatqanliqini delillidi.

Abduweli ayupning déyishiche, erkin ayup bilen sajidigül ayup körgen a'ile terbiyesi seweblik xizmette estayidil, ijtima'iy pa'aliyetlerde mes'uliyetchan kishilerdin bolup, ular abduweli ayupning Uyghur rayonidiki chéghida élip barghan ana-til pa'aliyetlirini aktipliq bilen qollighan iken. Ular yene normal bir qérindashliq musiwetliri sewebidin ilgiri qattiq cheklime qoyulmighan mezgillerde arilap téléfonda sözleshken we oz ara a'ile ehwalliri heqqide hal sorashqan waqitlirimu bolghan iken.

Abduweli ayup her qétim chet elde emeliy bir ishqa qol tiqqanda wetendiki a'ilisidin ensiz bir xewerni anglap kéliwatqanliqi, buning chet eldiki Uyghur pa'aliyetchiler üchün omumiy bir ehwal ikenlikini tilgha aldi. Abduweli ayup özi we sepdashlirining milletning teqdiri ongshalmay turup, a'ile ezalirining teqdiride burulush xaraktérlik özgirish bolmaydighanliqigha ishinidighanliqi, shuning üchün arqa-arqidin kéliwatqan shum xewerlerge qarimay pa'aliyetlirini téximu aktipliq bilen dawamlashturiwatqanliqini eskertti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet