Ilgiriki ikki qétimliq tutulushida 8 yil yétip chiqqan 33 yashliq erkin iminjan ‏üchinchi qétim yene tutulghan

Muxbirimiz shöhret hoshur
2021.09.29
Ilgiriki ikki qétimliq tutulushida 8 yil yétip chiqqan 33 yashliq erkin iminjan ‏üchinchi qétim yene tutulghan 2009‏-Yilidin tartip ikki qétim tutqun qilinip ömrining üchtin bir qismini qamaqta ötküzgen, 2021-yili 1-séntebir üchinchi qétim yene tutqun qilin'ghan erkin iminjan ependi.
Oqurmen teminligen

Bu yil 33 yashqa kirgen erkin iminjan, 2009‏-yili tutqun qilinip 6 yil türmide, 2017-yili tutqun qilinip 2 yil “Teriyelesh” te yétip chiqqan. Ömrining üchtin bir qismini qamaqta ötküzgen erkin iminjan, bu yil 9-ayning 1‏-küni üchinchi qétim tutqun qilin'ghan. Ilgiriki ikki qétimliq tutup méngilishida yashan'ghan ata-anisi köz yéshi qilghan bolsa, bu qétimliq tutulushida uni köz yashliri bilen uzatquchilar arisida uning bir yashliq perzenti bilen ayalimu orun alghan. Weziyettin xewer kishi yetküzgen bu uchurining toghriliqi, tutqun erkin iminjanning yurti-chapchal nahiye jaghistay yézisidiki saqchi we kent xadimliri teripidin delillendi.

Chapchal weziyitidin xewerdar kishilerdin birining radiyomizgha inkas qilishiche, 1988‏-yili tughulghan erkin iminjan, 2009 ‏-yilidiki “5‏-Iyul weqesi” din kéyinki keng-kölemlik tutqunda tunji qétim tutqun qilinip, 6 yilliq késiwétilgen. Oniwérsitétta oquydighan yillirini jaza lagérida ötküzgen erkin iminjan 27 yéshida jaza mudditini tügitip jem'iyetke qaytqan hemde yaghachchiliq we ashpezlik qatarliq hüner-kesipler bilen hepiliship tirikchilik qilghan. U qiliwatqan hüner-kespining elmi-telmini bilip, öylük-ochaqliq bolush we musteqil hayat kechürüshning koyigha chüshkenide, yeni 2017‏-yili zor tutqun bashlinip, u “Terbiyelesh” ke élip kétilgen.

Inkasta bayan qilinishiche, u ikki yildin kéyin, yeni 2019‏-yili lagérdin chiqqinida yéshining 31 gha ulashqanliqini közde tutup tézdin öylen'gen we bir perzentlik bolghan. U özining 3 janliq a'ilisning turmush helekchilikide chépip yürginide, yeni bu yil 9 ‏-ayning 1‏-küni béshigha üchinji qétim qara xalta kiydürlüp saqchixanigha élip kétilgen.

Téléfonimizni qobul qilghan chapchal nahiye jaghistay yézisidiki alaqidar kent xadimliri, erkin iminjanning ehwali heqqidiki so'alimizgha éniq jawap bérishtin özini qachurdi, emma uning tutqunda ikenlikini inkar qilmidi.

Inkasta déyilishiche, erkin iminjan toluqisz ottura medeniyet sewiyesige ige bolup, uning tirikchilik yolini öginip ata-anisigha yardemchi bolush we öy-ochaqliq bolup musteqil hayat kechürüshtin bashqa ishlarni xiyal qilishqimu imkani bolmighan. Shundaq turuqluq, her üch qétimliq tutulushida uning béshigha “Jem'iyet tertiwpini buzush” we “Döletni parchilashqa urunush” tin ibaret bir-biridin chong qalpaqlar kiydürülgen. Inkasta yene déyilishiche, uning bundaq chong qalpaqlarni kiyishige qol téléfonidin chiqqan “Chataq” lar sewep bolghan.

Jaghistay yéziliq saqchixanisining bir xadimi, erkin iminjanning buningdin bir ayche awwal tutqun qilin'ghanliqini delillidi. Emma bu xadim uning tutulush sewebidin xewersizlikini bildürüp, bu heqte jaghistay 3‏-kent saqchisidin melumat élishimizni tewsiye qildi.

Chapchal weziytidin xewerdar kishining bu heqtiki inkasida yene qeyt qilinishiche, erkin iminjanning-qétimliq tutulushigha uning qol téléfon xatiriside “Qanunsiz matériyallar” bayqalghanliqi sewep bolghan. Ikkinchi qétimliq tutulushigha uning sabiq mehbus ikenliki seweb bolghan. Bu qétim, yeni 3 ‏-qétimliq tutulushigha uninggha “Chékiti bar” bir kishidin téléfon kelgenliki seweb bolghan iken. Jaghistaydiki yene bir kent xadimi, erkin iminjan heqqdiki bu uchurningmu toghriliqini delillidi.

Yene inkasta qeyt qilinishiche, erkin iminjan téléfondin chiqqan “Chataq” seweblik 6 yil jazalan'ghandin kéyin, yene “Xata” matériyallarni uqushmay körüp qélishtin saqlinish üchün bir mezgil qol téléfon ishletmigen. Emma öylük-ochaqliq bolghandin kéyin, turmush we ish éhtiyaji bilen qaytidin qol téléfon tutqan. Bu yil awghustta uninggha ilgiriki bir kamirdishining a'ilisidin téléfon kélishi bilen. U körsetken barliq éhtiyatchanliqlarning héchqandaq roli bolmighan. U yene “Döletni parchilashqa urunush” gumani bilen tutup kétilgen, emma uning bu qétimqi tutulushida qamaqxanigha yaki lagérgha ekitilgenliki we uninggha yene qandaq jazalarning bérilidighanliqi hazirche melum emes.

Yuqurida chapchal jaghistaydiki 33 yashliq erkin imanjanning ilgiriki ikki qétimliq tutulishida 8 yilliq qamaq jaza'isigha uchrighanliqi we bu yil 1‏-séntebir küni üchinchi qétim tutqun qilin'ghanliqi heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.