Корлада сорақханида өлгән әркин сулайманниң иниси: "акамниң өлүмигә телефон соһбитимиз әмәс, бәлки дуруст бир инсанлиқи сәвәб болған"

Мухбиримиз шөһрәт һошур
2021-09-22
Share
Корлада сорақханида өлгән әркин сулайманниң иниси: Корлада сорақ җәрянида һаятидин айрилған әркин сулайман әпәндиниң түркийәдә яшаватқан иниси әнвәр сулайман әпәнди . (Вақти вә орни ениқ әмәс)
Enwer Sulayman Teminligen

Корлада сорақ җәрянида һаятидин айрилған әркин сулайманниң тутулушида униң түркийәдики иниси билән 5 йилниң алдида қилишқан бир телефон сөһбитидә "мәсилә" чиққанлиқиниң сәвәб болғанлиқи илгири сүрүлгән иди. Бу һәқтики хәвиримизни аңлиған әркин сулайманниң түркийәдики иниси әнвәр сулайман бүгүн радийомиз зияритиини қобул қилип, өзиниң акиси билән болған сөһбитидә пәқәт турмуш мәсилиси тоғрилиқ сөзләшкәнликини, акисиниң тутқун қилинишиға пәқәтла униң иман-етиқадлиқ вә ғорурлуқ бир инсан болғанлиқиниң сәвәб болғанлиқини илгири сүрди.

Түркийәдә яшаватқан әнвәр сулайман әпәнди корлада сорақ җәрянида һаятидин айрилған акиси әркин сулайманниң из-дерикини қилип чиқарған варақчә.
Түркийәдә яшаватқан әнвәр сулайман әпәнди корлада сорақ җәрянида һаятидин айрилған акиси әркин сулайманниң из-дерикини қилип чиқарған варақчә.

Корлада лагерға тизимлитишни рәт қилғанлиқи үчүн тутқун қилинған вә 3 һәптидин кейин җәсити өйигә қайтурулған әркин сулайман һәққидә радийомизға кәлгән инкаста, униң тутулушиға түркийәдики иниси билән бәш йилниң алдида қилишқан бир телефон сөһбитиниң сәвәб болғанлиқи қәйт қилинған иди. Корлаға қарита елип барған телефон зиярәтлиримиз давамидиму бир сақчи хадими әркин сулайманниң тутулушиниң униң түркийәдики иниси билән қилишқан телефон сөһбити билән четишлиқ икәнликини әскәрткән иди. Бүгүн зияритимизни қобул қилған әркин сулайманниң түркийәдики иниси әнвәр сулайман, акиси билән илгири қилишқан сөһбитидә пәқәт аилә вә турмуш ишлири һәққидә сөзләшкәнликини, әмәлийәттә сорақ қилинғудәк һечқандақ ишниң йоқлуқини баян қилди.

Акиси билән 4 йилдин буян алақисиниң кесилгәнликини әскәрткән әнвәр сулайман, акисиниң бир алий тәрбийә көргән зиялий икәнлики, униң аилә вә җәмийәт алдидики мәсулийитини үстүн билидиғанлиқи, вәзийәтниң җиддийликигә қаритаму һәр вақит һушяр болуп кәлгәнлики, шуңа инкаста дейилгәндәк, хитай тәрәп уни "тәрбийәләш" кә беришни уқтурғанда, бу уқтурушниң салмиқини, йәни униң хәвп-хәтирини толуқ тонуп йәткәнликини вә беришни рәт қилғанлиқ еһтималлиқини оттуриға қойди.

Акиси билән илгирики сөһбәтлиридә һәр икки тәрәпниң толиму еһтиятчан болғанлиқини тәкитлигән әнвәр сулайман, буниңдин 10 йил илгириму акиси билән бирликтә кунмиңға бир сода иши билән берип қайтқан вақтида, сақчиларниң һәр иккисини тутуп сорақ қилғанлиқи, шу чағдиму сақчиларниң улардин һечқандақ бир қусур тапалмиғанлиқини әсләп өтти. Әнвәр сулайман худди радийомизға кәлгән инкаста дейилгәндәк, акисиниң иман-етиқадлиқ вә ғорурлуқ бир инсан икәнлики, униң мушу тәрипиниң лагердики барлиқ уйғурларға охшашла хитайға тәһдит болуп көрүлгәнлики вә мушу сәвәбтинла тутқун қилинғанлиқини илгири сүрди.

Акисиниң әслидә бир тәнһәркәтчи икәнлики вә саламәтликидә мәсилә йоқлуқини баян қилған әнвәр сулайман, акисиниң еғир бир қейин-қистақтин өлгәнлик еһтималлиқини тилға алди. Әнивәр сулайман йәнә акисиниң тәқдирини нөвәттә уйғур районида давам қиливатқан ирқий қирғинчилиқниң кичик бир сәһниси дәп қарайдиғанлиқини вә бу әһвалларни хәлқарадики алақидар орун вә тәшкилатларға ашкарилайдиғанлиқи һәмдә бу җинайәтниң һесабини елиш үчүн қолидин келишичә һәрикәт қилидиғанлиқини тәкитлиди.

Илгирики ениқлашлиримиз давамида, лагерға беришни рәт қилған ғулҗа көкталалиқ пәйзулла утуқниң назарәт астида давалиниватқан дохтурханидин қачқанлиқи вә уни тутуш үчүн ғулҗада моңғулкүрәдин қорғасқичә кәң көләмлик өй ахтуруш болғанлиқи ашкариланған иди.

Мәлум болушичә, пәйзулла утуқму әркин сулайманға охшашла лагерға әкитилишни "қайтииши йоқ йол" дәп қариған вә бешиға һәрқандақ тәһдит келишидин қәтийнәзәр, қечишқа һәркәт қилип баққан иди. У 7 күн издәлгәндин кейин қорғастики бир мазарлиқта мөкүнүп ятқан йеридин қоршавға елинған вә етиветилгән иди.

Юқирида корлада лагерға беришни рәт қилғанлиқи үчүн тутқун қилинған вә сорақтики мәзгилидә һаятидин айрилған әркин сулайманниң түркийәдики иниси әнвәр сулайманниң акисиниң өлүми һәққидики учур вә қарашлирини диққитиңларға сундуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт