Korlada soraqxanida ölgen erkin sulaymanning inisi: "Akamning ölümige téléfon sohbitimiz emes, belki durust bir insanliqi seweb bolghan"

Muxbirimiz shöhret hoshur
2021-09-22
Share
Korlada soraqxanida ölgen erkin sulaymanning inisi: Korlada soraq jeryanida hayatidin ayrilghan erkin sulayman ependining türkiyede yashawatqan inisi enwer sulayman ependi . (Waqti we orni éniq emes)
Enwer Sulayman Teminligen

Korlada soraq jeryanida hayatidin ayrilghan erkin sulaymanning tutulushida uning türkiyediki inisi bilen 5 yilning aldida qilishqan bir téléfon söhbitide "Mesile" chiqqanliqining seweb bolghanliqi ilgiri sürülgen idi. Bu heqtiki xewirimizni anglighan erkin sulaymanning türkiyediki inisi enwer sulayman bügün radiyomiz ziyariti'ini qobul qilip, özining akisi bilen bolghan söhbitide peqet turmush mesilisi toghriliq sözleshkenlikini, akisining tutqun qilinishigha peqetla uning iman-étiqadliq we ghorurluq bir insan bolghanliqining seweb bolghanliqini ilgiri sürdi.

Türkiyede yashawatqan enwer sulayman ependi korlada soraq jeryanida hayatidin ayrilghan akisi erkin sulaymanning iz-dérikini qilip chiqarghan waraqche.
Türkiyede yashawatqan enwer sulayman ependi korlada soraq jeryanida hayatidin ayrilghan akisi erkin sulaymanning iz-dérikini qilip chiqarghan waraqche.

Korlada lagérgha tizimlitishni ret qilghanliqi üchün tutqun qilin'ghan we 3 heptidin kéyin jesiti öyige qayturulghan erkin sulayman heqqide radiyomizgha kelgen inkasta, uning tutulushigha türkiyediki inisi bilen besh yilning aldida qilishqan bir téléfon söhbitining seweb bolghanliqi qeyt qilin'ghan idi. Korlagha qarita élip barghan téléfon ziyaretlirimiz dawamidimu bir saqchi xadimi erkin sulaymanning tutulushining uning türkiyediki inisi bilen qilishqan téléfon söhbiti bilen chétishliq ikenlikini eskertken idi. Bügün ziyaritimizni qobul qilghan erkin sulaymanning türkiyediki inisi enwer sulayman, akisi bilen ilgiri qilishqan söhbitide peqet a'ile we turmush ishliri heqqide sözleshkenlikini, emeliyette soraq qilin'ghudek héchqandaq ishning yoqluqini bayan qildi.

Akisi bilen 4 yildin buyan alaqisining késilgenlikini eskertken enwer sulayman, akisining bir aliy terbiye körgen ziyaliy ikenliki, uning a'ile we jem'iyet aldidiki mes'uliyitini üstün bilidighanliqi, weziyetning jiddiylikige qaritamu her waqit hushyar bolup kelgenliki, shunga inkasta déyilgendek, xitay terep uni "Terbiyelesh" ke bérishni uqturghanda, bu uqturushning salmiqini, yeni uning xewp-xetirini toluq tonup yetkenlikini we bérishni ret qilghanliq éhtimalliqini otturigha qoydi.

Akisi bilen ilgiriki söhbetliride her ikki terepning tolimu éhtiyatchan bolghanliqini tekitligen enwer sulayman, buningdin 10 yil ilgirimu akisi bilen birlikte kunminggha bir soda ishi bilen bérip qaytqan waqtida, saqchilarning her ikkisini tutup soraq qilghanliqi, shu chaghdimu saqchilarning ulardin héchqandaq bir qusur tapalmighanliqini eslep ötti. Enwer sulayman xuddi radiyomizgha kelgen inkasta déyilgendek, akisining iman-étiqadliq we ghorurluq bir insan ikenliki, uning mushu teripining lagérdiki barliq Uyghurlargha oxshashla xitaygha tehdit bolup körülgenliki we mushu sewebtinla tutqun qilin'ghanliqini ilgiri sürdi.

Akisining eslide bir tenherketchi ikenliki we salametlikide mesile yoqluqini bayan qilghan enwer sulayman, akisining éghir bir qéyin-qistaqtin ölgenlik éhtimalliqini tilgha aldi. Eniwer sulayman yene akisining teqdirini nöwette Uyghur rayonida dawam qiliwatqan irqiy qirghinchiliqning kichik bir sehnisi dep qaraydighanliqini we bu ehwallarni xelq'aradiki alaqidar orun we teshkilatlargha ashkarilaydighanliqi hemde bu jinayetning hésabini élish üchün qolidin kélishiche heriket qilidighanliqini tekitlidi.

Ilgiriki éniqlashlirimiz dawamida, lagérgha bérishni ret qilghan ghulja köktalaliq peyzulla utuqning nazaret astida dawaliniwatqan doxturxanidin qachqanliqi we uni tutush üchün ghuljada mongghulküredin qorghasqiche keng kölemlik öy axturush bolghanliqi ashkarilan'ghan idi.

Melum bolushiche, peyzulla utuqmu erkin sulayman'gha oxshashla lagérgha ekitilishni "Qayti'ishi yoq yol" dep qarighan we béshigha herqandaq tehdit kélishidin qet'iynezer, qéchishqa herket qilip baqqan idi. U 7 kün izdelgendin kéyin qorghastiki bir mazarliqta mökünüp yatqan yéridin qorshawgha élin'ghan we étiwétilgen idi.

Yuqirida korlada lagérgha bérishni ret qilghanliqi üchün tutqun qilin'ghan we soraqtiki mezgilide hayatidin ayrilghan erkin sulaymanning türkiyediki inisi enwer sulaymanning akisining ölümi heqqidiki uchur we qarashlirini diqqitinglargha sunduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet