Корлада лагерға тизимлитишни рәт қилған әркин сулайманниң сақчиханидин җәсити чиққан

Мухбиримиз шөһрәт һошур
2021-09-20
Share
Корлада лагерға тизимлитишни рәт қилған әркин сулайманниң сақчиханидин җәсити чиққан Хитай сақчилири даванчиңдики 3-номурлуқ тутуп туруш мәркизиниң сиртқи кириш еғизида поста туруватқан көрүнүш. 3-Номурлуқ тутуп туруш мәркизи хитай бойичә әң чоң болуп, ватикан шәһириниң икки һәссисигә тоғра келиду. 2021-Йили 23-апрел.
AP

Корла вәзийиитидин хәвәрдар кишиләрдин бириниң радийомизға инкас қилишичә, корла шәһәрлик тәминат-сода сарийиниң техник ишичиси әркин сулайман, 7 ‏-айниң биринчи һәптиси "тәрбийәләш" кә өзини тизимлитиш үчүн сақчиханиға чақиртилған. Әркин сулайман өзиниң гунаһсизлиқини билдүрүп тизимлитишни рәт қилған. Нәтиҗидә шу һәптиси өйидин мәҗбури тутуп әкитилгән әркин сулайманниң үч һәптидин кейин аилисигә җәсити қайтурулған. Мухбиримизниң корлаға қарита елип барған телефон зиярәтлири двамида вәқәниң растлиқи дәлилләнди.

Вәзийәттин хәвәрдар кишиниң инкасида баян қилинишичә, корла шәһәрлик тәминат-сода сарийиниң 25 йиллиқ техник ишчиси әркин сулайман 7‏-айниң биринҗчи һәптиси "тәрбийәләш" кә тизимлитиш үчүн сақчиханиға чақиртилған. Әркин бу "тәрбийәләш" кә беришниң сәвәбини сориғинида, сақчилар униң 5 йилниң алдида түркийәдики иниси билән телефонда сөзләшкәнлики вә телефон сөһбәт хатирисидә "мәсилә" көрүлгәнлики, шуниң үчүн униң чоқум "тәрбийәләш" кә бериши керәклики уқтурған.

Әркин сулайман түркийәдики иниси билән 4 йилдин буян алақиси үзүлгәнлики, илгирики сөһбәтлири һәққидә әйни чағда сақчиларға тәпсилий һесап берип болғанлиқини баян қилиған вә өзиниң "тәрбийәләш" кә мунасип һечқандақ бир мәсилиси йоқлуқини ейтқан. Сақчилар униң өзлигидин келип тизимлитиши үчүн 3 күнлүк мөһләт бәргән. Әркин сулайман "тәрбийәләш" кә кәтсә ишсиз қалидиғанлиқи вә аилисиниң беқишсиз қалидиғанлиқини билдүрүп, телефонни қоювәткән.

Биз бу учурларниң тоғра-хаталиқини айдиңлаштуруш үчүн, корла шәһәрлик җ х идарисиға телефон қилдуқ.

Алақидар хадимлардин бири, әркин сулайман һәққидә мәхсус дело турғузулғанлиқи вә четишлиқ кишиләр үстидин тәкшүрүш елип бериватқанлиқини тилға алди. Әмма униң өлгәнлики учур һәққидә мәлумат бәрмиди.

Инкаста дийилишичә, бу йил 56 яшқа киргән корла шәһәрлик тәминат-сода сарийида техник ишчи болуп ишләватқан әрин сулайман, кәскин вә һәққанийәтчи миҗәзи билән җәмийәттә тонулған кишиләрдин икән. У сақчиханиға беришни телефонда рәт қилғандин кейин, шу күни кечидә сақчилар униң өйигә бесип киргән, әркин сулайман өзиниң һечқандақ гунаһ өткүзмигәнликини, шуңа "тәрбийәләш" кә бармайдиғанлиқини ейтқан. Сақчилар униңға 15 күнлүкла "тәрбийә" линидиғанлиқини билдүрүп, юмшақ позитсийә тутқан, әркин сулайман 15 күнлүк дәп "тәрбийәләш" кә әкитилгән кишиләрниң һечбирсиниң техичә өйгә қайтмиғанлиқи вә көпинчисиниң кесилип кәткәнликини билдүрүп: "тәрбийәләш" кә беришни рәт қилған вә бу рәт қилиши сәвәплик бешиға келидиған һәрқандақ ақивәткә өзиниң тәйяр икәнликини билдүргән, бу чағда икки сақчи етилип берип, униң қолиға койза салған вә бешиға қара халта кийдүрүп сақчиханиға елип кәткән.

Корладики бир сақчи хадими, әркин сулайманниң сақчиханиға әкитилгән күниниң дәл7 ‏-айниң8 ‏-күни икәнликини дәлиллиди.

Мәлум болишичә, шу күни сақчиларниң пәйлидики бу шумлуққа шаһит болған әркин сулайманниң аяли вә башқа уруқ-туғқанлири әркин сулайманниң из-дерикини сүрүштә қилишқиму җасарәт қилалмиған. Аридин үч һәптә өткәндә сақчилар әркин сулайманниң җәситини елип келип аилисигә тапшурған вә дағдуғсиз һалда йәрликидә қоюшқа буйруған.

Инкаста йәнә дийилишичә, әркин сулайманниң җәсити аилисигә берилгән1 ‏-авғусттин та бүгүнгә қәдәр, әркинниң вә қериндашлириниң туралғуси, шундақла әркинниң мейити йәрликкә қоюлған зарәтгаһлиқ сақчилар тәрипидин назарәт қилинмақта икән. Алақидар сақчи хадимлири әркин сулайманниң аилисигә кирип чиқиватқан гуманлиқ пәтичиләрни көзитип назарәт қиливатқанлиқини билдүрүш билән бирликтә, һазирғичә 7-8 гичә кишини тутуп тәкшүргәнликини баян қилди.

Алақидар сақчи хадимлиридин бири, әркин сулайманниң тутулушида униң түркийәдики иниси билән алақисиниң сәвәп болғанлиқини йошурмиди. Әмма у әркин сулайманниң өлүм сәвәби, җүмлидин қейин-қистақтин өлгәнлик еһтималлиқи тоғрисидики соалимизға җавабән, сәвәбни өзлириниң ениқ билидиғанлиқи, әмма буни ашкарилашқа болмайдиғанлиқини әскәртти.

Телефонимизни қобул қилған йәнә бир сақчи хадими, әркин сулайманниң өткән айда тутулғанлиқи вә сақчиханида сорақтики мәзгилидә өлгәнликини ашкарилиған болсиму, әмма униң сорақ җәряни вә өлүм сәвәби һәққидә мәлумат беришкә болмайдиғанлиқини баян қилди.

Әркин сулайман лагерға беришни рәт қилғанлиқи үчүн сақчиханиға әкитилгән вә үч һәптидин кейин җәсити қайтурулған, әмма униң бешиға сақчиханиниң ичидә немә кәлгүлүкләрниң кәлгәнлики һазирчә мәлум әмәс.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт